Askïkis ukpun ajllipjjañäni

1, 2. Bibliajj qhepa urunakat parlki uka profecianakatjja, ¿kawkïritsa Jesusan arkirinakapajj yatjjatañ munapjjpachäna, ukat kunatsa?

JESUSAJJ ukhakiw arkirinakaparojj templon tʼunjäwipat parlaskäna. Ukat uka arunakjja, Pedro, Santiago (Jacobo), Juan ukat Andrés ukanakajj janiw armirjamäpkänti (Mar. 13:1-4). Ukatsti akham sasaw jisktʼapjjäna: “¿Kawkïrïnis chimpojja jumajj kuttʼankät ukkajja, ukhamarak akapach tukuskan uka urutsa?” sasa (Mat. 24:1-3). Jesusajj kunanakatï paskani ukanak sum qhanañchäna, ukajja janiw jaqenakan jakäwipak mayjtʼayañapäkänti, jan ukasti Supayan apnaqat akapachan qhepa urunakankatapwa uñachtʼayañaparakïna. Ukatjja, chʼajjwäwinakata, manqʼat pistʼañanakata ukat jan waltʼäwinakan jiljjattañapatwa Jesusajj parläna. Ukat suma yatiyäwinakatsa parlarakïnwa, uk istʼasaw arkirinakapajj wal yatjjatañ munapjjpachäna. Jesusajj akham sänwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasa (Mat. 24:7-14).

² Arkirinakapajj Jesusamp chika Diosan Reinopat suma yatiyäwinak yatiyasajj wali kusisitäpjjpachänwa (Luc. 8:1; 9:1, 2). Ukhajj Jesusan aka arunakapat inas amtapjjchïna: “Qhanpachanjja, yapu apthapiñajj waljawa, ukampis apthapirinakajj jukʼakiwa. Uka layku yapunir mayipjjam yapu apthapir irnaqerinak khitaniñapataki” (Luc. 10:2). Ukampis ¿kunjamsa ‘aka oraqpachansa ukat taqe markanakans yatiyapjjaspäna’? ¿Kawkitsa yapu apthapirinakajj mistupjjaspäna? Kunanakatï jutïrin paskani uk Jesusamp chik qontʼatäkasin uñjapjjaspäna ukhajja, kuntï siskäna uk sum amuyapjjaspäna. Ukat Mateo 24:14 qellqatan siski uka arunakan phoqhasir uñjapjjaspäna ukhas wal muspharapjjaspäna.

3. Jichhürunakanjja, ¿kunjamsa Lucas 21:34 qellqatajj phoqhasiski, ukat kunsa jisktʼasiñasa?

³ Jesusan uka profeciapajj jichhürunakanwa phoqhasiski. Kunattejj millón millón jilat kullakanakaw Diosan Reinopat suma yatiyäwinak oraqpachan yatiyasipki (Isa. 60:22). Ukampis yaqhep cristianonakajj Diosan Reinopat yatiyañjja, janiw nayrar uchjjapjjaniti, mä arunjja ‘chuymanakapan qalaratäpjjaniwa’ sasaw Jesusajj amuytʼayäna (Lucas 21:34 liytʼasiñapawa). Uka arunakan phoqhasiskatap jiwasajj uñjasktanwa. Ukat Jehová Diosan markapankirinakat yaqhepajj yaqha lurañanakarukiw chuym uchjjapjje. Ukjja, wal irnaqasa, jachʼa yateqañ utanakar sarasa, yänak thaqhasa jan ukajj anatañanakaru ukat kʼuchirtʼäwinakar tiempo aptʼasaw uñachtʼayapjje. Ukat yaqhep jilat kullakanakajj kunanakatï jakañatak wakiski ukanakat llakisisa ukat akapachan jan walinakar wiytat uñjasisaw jan nayrjam yatiyir sarjjapjjeti. Ukatwa sapa maynejj akham sasin jisktʼasiñasa: “¿Nayajj kunjamäsktsa? ¿Kuntï amtkta ukajj kun nayrar uchaskatajjsa uñachtʼayi?” sasa.

4. 1) Filipos markan jakapkäna uka cristianonakatakejja, ¿kunsa Pablojj mayïna, ukat kunatsa? 2) ¿Kunsa aka yatichäwinsa ukat jutïr yatichäwinsa yatjjataskañäni, ukat kunatakis yanaptʼistani?

⁴ Khä patak maranakanjja, walja cristianonakajj apóstol Pabljamarakiw ‘Diosan arunakap yatiyañanjja, jan ajjsarasa Tatitur jukʼamp katuyasisin parlapjjäna’ (Fili. 1:12-14). Ukampis Jehová Diosar yupaychañ nayrar uchaskakiñatakiw chʼamachasipjjañapäna. Ukatwa apóstol Pablojj Filipos markankir jilat kullakanakan kunatï “askïkis ukpin ajllipjjaña[pa]taki” Diosar mayïna (Filipenses 1:9-11 liytʼasiñapawa). Jichhürunakanjja niya ukhamarakiwa. Jiwasat niya taqeniw Diosan arunakapat jan ajjsaras yatiytanjja. Ukhamäkchisa, kuntï Jehová Diosan markapajj luraski ukanakat sum amuyañajj ¿janit Diosan arunakap jukʼampi yatiyañatak chʼamañchtʼkistu? Jïsa, chʼamañchistuwa. Mateo 24:14 qellqatan jikjjataski uka profecian phoqhasiñapatakejj kunanaksa Jehová Diosajj luraski uk amuykiptʼañatakiw aka yatichäwejj yanaptʼistani. ¿Jehová Diosan markapajj kuna amtanisa? Uk yatiñajja, ¿kunjamsa jiwasarusa ukat familiasarus chʼamañchtʼistaspa? Jan qarjtañatakisa ukat Jehová Diosan markapamp chika saraskakiñatakis kunas yanaptʼistaspa ukwa jutïr yatichäwin yatjjataskarakiñäni.

DIOSAN ALAJJPACHANKIR MARKAPAJJ JANIW SAYTʼKITI

5, 6. 1) Kunas alajjpachan pasaski ukjja, ¿kunatsa Jehová Diosajj servirinakaparojj visionan uñjaypachäna? 2) ¿Kunsa Ezequiel profetajj mä visionan uñjäna?

⁵ Jehová Diosajja, janiw taqe kunpun Bibliar qellqaykänti. Amuytʼañataki, jaqen lejjwipasa, alajjpachasa ukat aka oraqesa kunjam lurtʼatasa uk Biblian sum qhanañchañapajj wali wakiskirïkchispänsa, janiw ukanak qellqaykänti. Jan ukasti, kunanakatï amtanakap amuytʼañataki ukat ukarjam sarnaqañataki yanaptʼkistaspa ukanakwa Jehová Diosajj qellqayawayi (2 Tim. 3:16, 17). ¡Jehová Diosan alajjpachankir markapjjat Bibliajj amuytʼaykistu ukajj wali askipuniwa! Isaías, Ezequiel, Daniel ukat Juan chachanakajj Diosan alajjpachankir markapajj kunjam uttʼayatasa uka toqet qellqapkäna uk liytʼañajj wali muspharkañawa (Isa. 6:1-4; Eze. 1:4-14, 22-24; Dan. 7:9-14; Apo. 4:1-11). Jehová Diosas alajjpach jistʼarasin taqe kunatï ukan utjki uk uñjaykistaspa ukhamawa. ¿Kunatsa uka toqet Bibliar qellqaypachäna?

⁶ Alajjpachankiri ukat aka Oraqenkir markap taypinkatas amtañasatakiw Bibliar qellqaypachäna. Jehová Diosan amtap phoqhasiñapatakejj kunaymaninakaw pasaski, ukanak janiw taqpach uñjksnati. Amuytʼañataki, Ezequiel profetajj Diosan alajjpachankir markapwa uñjäna, ukasti jachʼa ukat muspharkaña carror uñtatänwa. Uka carrojj jankʼakiw saräna ukat maysar sarkasajj jankʼakiw maysar sararakïna (Eze. 1:15-21). Ruedanakapajj may muytasajj wali jayaruw saräna. Ukat uka carro Apnaqeritjja, akham sasaw Ezequielajj qhanañchäna: “Mä suma kʼajkiri metalar uñtataw kʼajarakïna, ninan muytata [...]. Ukhamwa nayajj uñjta Tatitun kʼajkir kankañapjja” sasa (Eze. 1:25-28). Uk uñjasajj wali muspharataw uka profetajj qheparpachäna. Diosarojj markapar wali sum apnaqaskiri ukat taqe kunsa qollan ajayup toqe uñjaskirwa uñjäna. ¡Jehová Diosan alajjpachankir markapajj kunjamsa irnaqaski uk mä visionan uñjatapajj wali muspharkañapuniwa!

7. ¿Kunjamsa Daniel profetan visionapajj Jehová Diosaru ukat Jesusar confiyañatak yanaptʼistu?

⁷ Daniel profetajj ukhamarakiw mä visionan uñjatayna, ukajj Diosar confiyañatakiw yanaptʼistu. Jupajja, Jehová Diosarojj “Jilïri chuymani” jaqjamwa uñjäna ukat “qonuñapasa, uka qonuñapan ruedanakapasa ninakamakirakïnwa” (Dan. 7:9). Kunjamsa markapajj jan saytʼasa munañap phoqhaski ukwa Jehová Diosajj Danielar uñjayañ munäna. Uka profetajj Jesusaruw “jaqen yoqapäkaspas ukhama” uñjarakïna, ukat Jehová Diosajj Jesusaruw aka oraqenkir markap pʼeqtʼañapatakejj uttʼayäna. Ukampis jupajj janiw mä jukʼa tiempok apnaqkaniti, kunattejj “chʼamapajj pachpakïskaniwa, reinopasa janirakiw tʼunjatäkaniti” (Dan. 7:13, 14). Ukajj Jehová Diosaru confiyañataki ukat kunanaksa luraski uk amuytʼasiñatakiw yanaptʼistu. Kunattejj “munañanïñasa, jachʼa kankañasa, reinosa” Yoqaparuw Diosajj churäna. Jupaw yantʼata uñjasisajj Awkipat jan jitheqtas yupaychatap uñachtʼayäna. Cheqansa, Jehová Diosajj Yoqapar confiyiwa. Ukat jiwasajj pʼeqtʼirisarjamaw confiyañasaraki.

8. Jehová Diosan markap uñjasajja, ¿kunjamsa Ezequiel ukat Isaías profetanakajj jikjjatasipjjäna, ukat kunjamsa jiwasajj jikjjatasiraksna?

⁸ Jehová Diosan alajjpachankir markap uñtʼañajja, ¿kunjamsa yanaptʼistu? Diosajj kuntï luraski uk amuytʼasajja, Ezequiel profetjamarakiw altʼat chuymani ukat wali muspharata jikjjataspachätanjja (Eze. 1:28). Jehová Diosan markapat amuytʼañajja Isaiasjam lurañatakiw yanaptʼistu. Jupajja, kunanaktï Jehová Diosajj luraski ukanakat jaqenakar yatiyañjamäkän ukhajj jankʼakiw yatiyäna (Isaías 6:5, 8 liytʼasiñapawa). Jehová Diosan yanaptʼapampejj taqe jan waltʼäwiruw atipjirista sasaw jupajj atinisïna. Jiwasarojj ukhamarakiw Jehová Diosan alajjpachankir markapat yatiñajj wal muspharayistu ukat Isaiasjam lurañatakiw yanaptʼistu. ¡Uka markajj jan saytʼas saraskatapa ukat Jehová Diosan amtanakap jan inaktʼas phoqhaskatap yatiñajj wal chʼamañchtʼistu!

DIOSAN AKA ORAQENKIR MARKAPA

9, 10. ¿Kunatsa Jehová Diosan aka oraqenkir markapan utjañapajj munasi?

⁹ Jehová Diosajj Yoqap toqew aka oraqenkir markapjja alajjpachankir markapamp chika irnaqtʼañapatak uttʼayawayi. ¿Kunatsa uka markajj Mateo 24:14 qellqatan jikjjataski uka arunak phoqhasiñapatakejj munasi? Uk kimsa toqet amuytʼañäni.

¹⁰ Nayrïri, “taqe aka oraqpachan[wa]” arkirinakajajj yatiyapjjani sasaw Jesusajj säna (Hech. 1:8). Payïri, Diosan arunakap yatiyapjjañapatakejj suma wakichtʼatäpjjañapawa ukat chʼamañchtʼatäpjjañaparakiwa (Juan 21:15-17). Kimsïri, Diosan suma yatiyäwinakap yatiyapki ukanakan Jehová Diosar yupaychapjjañapatakejj tantachasipjjañapawa ukat kunjamsa yatiyapjjani uk yateqapjjañaparakiwa (Heb. 10:24, 25). Taqe ukanak phoqhañatakejj Jesusan arkirinakapajj suma waktʼayatäpjjañapawa.

11. Jehová Diosan markapajj kuntï amtki ukarojja, ¿kunjamsa yanaptʼsna?

¹¹ Jehová Diosan markapajj kuntï amtki ukarojja, ¿kunjamsa yanaptʼsna? Khitinakarutï Jehová Diosasa ukat Jesusas aka oraqen suma yatiyäwinak yatiyañan pʼeqtʼapjjañapatak uttʼayki ukanakar confiyasa. Akapachanjja, kunayman luräwinakaw uka jilatanakarojj chʼam thayjtayaspa. Ukampis Diosan aka oraqenkir markapajj mä amtampiw irnaqaski. ¿Kunas uka amtapajja?

‘ASKÏKIS UKPIN AJLLIPJJE’

12, 13. ¿Kunjamsa irpir chuymaninakajj luräwinakap phoqhapjje, ukat ukajj kunjamsa jumar chʼamañchtamjja?

¹² Oraqpachanjja, yatjjattʼat irpir chuymaninakaruw uttʼayasi, ukhamat kawkhantï jakapki uka markanakan Diosan Reinopat yatiyañ toqet pʼeqtʼapjjañapataki. Jupanakajja, kuna amtar puriñatakisa Bibliatwa yanaptʼa thaqhapjje, ukhamatwa Bibliajj ‘sarnaqäwinakapatak mä qhanjamajja ukat thakipansa qhantirirakiwa’. Ukat Jehová Diosaruw sum amuytʼañatakejj taqe chuyma mayisipjje (Sal. 119:105; Mat. 7:7, 8).

¹³ Kunjamtï nayrïr cristianonakajj yatiyañ toqet pʼeqtʼapkänjja, ukhamarakiw irpir chuymaninakajj Diosan “arunakap yatichañaru” uskusipjje (Hech. 6:4). Ukat Diosan Reinopat yatiyäwejj markanakapana ukhamarak oraqpachan nayrar jukʼamp sartaskatap uñjasajj wal kusisipjje (Hech. 21:19, 20). Ukat Diosan Reinopat yatiyañajj kunjamsa nayrar sartaskakispa uk amtañatakejja, janiw jupanakaki kamachinaka ukat kunjamas lurasiñapa ukanak amtapkiti, jan ukasti kuntï Bibliajj siski ukwa yatjjatapjje ukat Diosan qollan ajayupamp irpayasisaw amtapjje (Hechos 15:28 liytʼasiñapawa). Ukhamatwa uka jilatanakajj tamankirinakatakejj wali yateqaskayäpjje (Efe. 4:11, 12).

14, 15. 1) ¿Aka oraqpachan yatiyasiski ukar yanaptʼañatakejj kunanakas lurasiski? 2) ¿Diosan Reinopat yatiyañ yanaptʼasajj kunjamsa jikjjatasta?

¹⁴ Bibliat apstʼat qellqatanakana, tantachäwinakana ukat jachʼa tantachäwinakan katoqtan uka yatichäwinak wakichañatakejj kunjamsa chʼamachasipjje ukjja, waljanejj janiw uñjapktanti. Uka qellqatanak 600 jila arunakar jaqokipañatakejj walja jilat kullakanakaw wal irnaqtʼapjje, ukhamat taqe jaqenakajj pacha arupat “Diosan jachʼa muspharkañ luräwinakapjjata” yateqapjjañapataki (Hech. 2:7-11). Bibliat apstʼat qellqatanak lurañatakejja, walja wayn tawaqo jilat kullakanakaw jachʼa maquinanakampi irnaqapjje. Ukatsti, oraqpachankir taqe tamanakaruw uka qellqatanakajj apayasi.

¹⁵ Tamasamp chika suma yatiyäwinak jukʼamp yatiyañatakejja, wal irnaqtʼasiski. Amuytʼañataki, walja jilat kullakanakaw Tantachasiñ Utanaka ukat Jachʼa Tantachasiñ Utanak lurañatak yanaptʼapjje. Yaqhepajja, jan waltʼäwinakan uñjasipki ukanakaru jan ukajj mä akatjamat usuntasin doctorar sarapjjañapäki ukanakarojj yanaptʼapjjarakiwa. Ukat jachʼa tantachäwinaka ukhamarak Diosan markapan utjir escuelanak wakichañatakis yanaptʼapjjarakiwa. Inas ukanakjja jan uñjkstanti. Ukampisa, ¿kuna amtampis ukham irnaqtʼapjje? Diosan Reinopat suma yatiyäwinakajj jukʼamp yatiyasiñapataki, yatiyirinakajj Diosar yupaychañ toqet jukʼamp chʼamañchatäpjjañapataki ukat cheqa yupaychäwin jiltaskakiñapatakiw wal irnaqtʼapjje. Jehová Diosan aka oraqenkir markapajja, taqe ukanakwa nayrar uchapjje.

DIOSAN MARAKAPAT YATEQASIPJJAÑÄNI

16. ¿Kuna toqet yatjjatañasa jiwasarusa ukat familiasarus yanaptʼistaspa?

¹⁶ ¿Kunanaktï Jehová Diosan markapajj luraski uk amuykiptʼañatakejj awisajj tiempo apsustanti? Yaqhep jilat kullakanakajj Familiana Diosar Yupaychañataki Arumana jan ukajj Bibliat sapaki yatjjatkasaw uka toqenakat yatjjatapjje ukat lupʼipjjaraki. Isaías, Ezequiel, Daniel ukat Juan chachanakan visionanakapat yatjjatañajj wali kusiskañawa. Ukat Los testigos de Jehová, proclamadores del Reino de Dios librota ukhamarak Bibliat apstʼat yaqha qellqatanakat yatjjatañasa ukat arusat mistki uka videonak uñtañasa, Jehová Diosan markap jukʼamp uñtʼañatakiw yanaptʼistu.

17, 18. 1) ¿Kunjamsa aka yatichäwejj jumar yanaptʼawaytamjja? 2) ¿Kunanaksa jisktʼasiñasa?

¹⁷ Jehová Diosajj kuntï markap toqe luraski uk amuytʼañajj wal yanaptʼistu. Ukhamajj Diosan markapamp chikajj kunatï jukʼamp askïki uk lurañ amtañäni. Ukhamatwa Pablot yateqasitas uñachtʼayañäni, jupajj akham sänwa: “Janiw nanakajj qarjasipkti, Diosasti khuyapayasiñapanwa aka luräwjja nanakar katuyapjjarakitu” sasa (2 Cor. 4:1). Ukat akham sasaw jilat kullakanakar chʼamañchtʼäna: “Aski lurañanjja janiw qarjasiñasäkiti, janitejj qarjtkañäni ukajja, horasaparuw cosechjja apthapiñäni” sasa (Gál. 6:9).

¹⁸ Jumasa jan ukajj familiamasa kunatï wali wakiskirïki uk nayrar uchañatakejja, ¿kunanaksa lurasma? ¿Diosan arunakap jukʼamp yatiyañatakejj kunanakatï wakiski ukampik jakasiña jan ukajj kʼuchirtʼäwinakar jan sinti sarañatak amtasmati? Jehová Diosan markapamp chika sarañatakejj kunanakas yanaptʼistaspa ukwa jutïr yatichäwin phesqa toqet yatjjataskañäni.