‘Taqe kasta jaqes Diosatakejj mayakiwa’

¿Yaqha kasta jañchinïtamata, kuna documentonak lurkasa, kuntï munkayäta uk jan churapkstam jan ukajj jan qollqenïtam laykus mä kutis yaqhachawayapjjtamti? Ukhamächi ukhajja, suma yatiyäwinakaw utji. Kuna jiskʼachasiñanakatï aka Oraqen utjki ukanakajj alajjpachan janiw utjkiti. Ukatwa apóstol Pedrojj akham säna: ‘Diosatakejj taqe kasta jaqes mayakiwa’ sasa. (Hechos 10:34, 35 liytʼäta.)

Uka arunak arskäna ukhajja, Pedrojj Cornelio sat chachan utapankaskänwa. Ukampis ak sum amuytʼañäni, Pedrojj judío jaqënwa ukampis Corneliojj janiw judiökanti. Uka tiemponjja, judío jaqenakajj yaqha kasta jaqenakarojj jan walitwa uñjapjjerïna, ukat janipuniw jupanakampis chikachasipjjerïkänti. Ukhamajj ¿kunatsa apóstol Pedrojj ukankaskpachäna? Cheqas Jehová Diosaw jupar ‘ukar saram’ sasin säna. Ukat mä visionanjja, Pedrorojj akham sasirakïnwa: “Kuntï Diosajj qʼomachki ukarojja, jan qʼañuw samti” sasa. Ukampis janïr Pedron yatkipanwa Corneliojj Pedror jawsayañatak mä visionan katoqarakïna (Hechos 10:1-15). Ukat Jehová Diosan ukham jikisiyatap amuyjjäna ukhajja, apóstol Pedrojj akham sänwa:

“Jichhajj cheqpachanwa amuyta, Diosatakejj taqe casta jaqes mayakïtapa” [mä arunjja, jan yaqhacharïtapa] sasa (Hechos 10:34). Griego arut jaqokipatäki ‘yaqhachiri’ arojja, “ajanu uñjasak juchañchiri” sañ muni (Nueva Concordancia Strong Exhaustiva). Uka arojj kamsañs muni ukjja, akham sasaw Biblia toqet yatjjattʼat mä jaqejj qhanañchi “khiti juezatï jaqer juchañchañataki jan kuns yatjjatañ munki jan ukajj ajanup uñjasak juchañchañ muni ukatakiw uka arojj apnaqasi” sasa. Ukampis Diosajj janiw ukhamäkiti, Jupajj janiw yaqha markatätapatsa, jan ukajj yaqha kasta jañchinïtapatsa ni qollqenïtapatsa yaqhachkiti.

Antisas Jehová Diosajj chuymaswa uñji (1 Samuel 16:7; Proverbios 21:2). Ukatwa, Pedrojj akham sarakïna: “Jupasti kuna cast jaqerus katoqakiwa, khitinakatejj Jupar ajjsarki, ukhamarak aski lurapki taqe ukanakarusa” sasa (Hechos 10:35). Diosar ajjsarañajja, Jupar respetaña, confiyaña ukat kuna jan walinaktï Jupajj uñiski ukanak jan luraña sañwa muni. Ukat aski lurañajja, Jupan nayraqatapan kunatï cheqapäki uk taqe chuyma luraña sañ munaraki. Ukat khitinakatï taqe chuyma ukat respetomp kunatï askïki uk lurañatak chʼamachasipki ukanakarojj wali askitwa Diosajj uñji (Deuteronomio 10:12, 13).

Jumarutï mä kutis yaqhachawayapjjstamjja, apóstol Pedron arunakapajj wal chʼamañchtʼätam: Jehová Diosarojj taqe kasta jaqenakaw servipjjaspa, Jupajj janiw khitirus yaqhachkiti (Juan 6:44; Hechos 17:26, 27). Ukat khitinakatï Diosar taqe chuyma yupaychapki jan yaqhanakar jiskʼachasa, markapar jan jachʼañchasa ukanakan mayisitanakapjja istʼiwa ukat jaysarakiwa (1 Reyes 8:41-43). Cheqas Jehová Diosajj taqe jaqenakaruw jan yaqhachas alajjpachat uñtani. Ukhamajja, ¿jan yaqhachasiri Diosat janit jukʼamp yatjjatañ munkasma?