“Nayat qhanañchapjjetäta”

1, 2. 1) ¿Khitis Jehová Diosan jilïri Qhanañchiripajja? 2) ¿Jesús sutejj kamsañsa muni, ukat kunjamsa Diosan Yoqapajj ukarjam phoqäna?

JESUSAJJ Judea markankir romano apnaqerirojj akham sänwa: “Reyïtwa nayajja, kunjämtï jumajj siskta ukhama. Nayajj ukatakiw nasta, akapacharusti juttwa kunatejj cheqäki uk yatiyiri” sasa (Juan 18:33-37 liytʼañataki). Jakäwipsa aptʼasirpachaw reyïtwa sasin säna. Walja maranak qhepatjja, apóstol Pablojj Jesusan jan ajjsartʼatapat akham sänwa: “[Jesusasti] suma arsüwi qhanañcharaki Poncio Pilaton nayraqatapana” sasa (1 Tim. 6:13). Supayan apnaqata akapachajja, uñisisiñampi phoqantatawa, ukatwa awisajj “khititï cheqap testigöki, cheqpachäkaraki” uka Jesusjam jan ajjsarirïñajj wali wakiskirejja (Apo. 3:14, MT).

² Jesusajj judionakat jutirïnwa ukatwa Jupajj jiskʼatpacha Jehová Diosan Qhanañchiripäjjäna (Isa. 43:10). Jesusajja, Jehová Diosana jilïr qhanañchiriparuw tukuwayi, janipuniw jupjam Diosan sutip apirejj utjawaykiti. Jesusajj sutiparjamapuniw sarnaqäna, uka sutjja Jehová Dios pachpaw usküna. Janïraw Jesusajj naskänti ukhaw mä angelajj akham sasin José chachar säna: “Mariajj mä yoqall wawa wawachasini, Jesús sasaw suticharakïta, juparakiw markaparojj juchapat qhespiyani” sasa (Mat. 1:20, 21). Biblia toqet yatjjatirinakajja, Jesús sutejja Jesúa hebreo sutit juti sasaw sapjje, uka sutisti “Jehová Diosajj Qhespiyiriwa” sañwa muni. Uka sutirjamaw Jesusajj “Israel markan chhaqatäkis uka ovejanakar” arrepentisipjjañapatak yanaptʼäna (Mat. 10:6; 15:24; Luc. 19:10). Uka amtampirakiw Diosan Reinopatsa taqe chuyma yatiyarakïna. Biblia qellqer Marcosajj sänwa: “Jesusajj Galilearuw sarjjäna, Diosan reinopat suma yatiyäwi arunak parlasa, sänwa: ‘Horasajj phoqhasjjewa. Diosan reinopasti jakʼankjjewa. Juchan sarnaqañanakjja apanukupjjam, qhespiyasiñ arunakapar iyawsapjjarakim’” sasa (Mar. 1:14, 15). Jesusajj judio­nakan religionap pʼeqtʼirinakarojj jan ajjsartʼasaw jan wali luratanakapat juchañchäna. Qhepatsti uka judionakarakiw Jesusar mä lawar chʼakktayapjjäna (Mar. 11:17, 18; 15:1-15).

‘DIOSAN JACHʼA MUSPHARKAÑ LURATANAKAPA’

3. Jesusan jiwatapatjja, ¿kunas kimsïr urun pasäna?

³ Jehová Diosajja, kimsïr urunwa Jesusar jiwatat jaktayäna, ukampis janiw jañchini chʼakhani cuerpoparu jaktaykänti jan ukasti ajayjamwa jaktayäna, ukajj wali muspharkañapunïnwa (1 Ped. 3:18). Cheqapuni jaktanitap uñachtʼayañatakejja, Jesusajj jañchini chʼakhani jaqeruw tuküna. Jaktkäna uka urojja, Jesusajj phesqa kutiw yaqh yaqha ­arkirinakapar uñstäna (Mat. 28:8-10; Luc. 24:13-16, 30-36; Juan 20:11-18).

4. Jesusajj jaktkäna uka urojja, ¿kunjamsa arkirinakapar yanaptʼäna ukat kun lurapjjäta sänsa?

⁴ Jesusajj jaktkäna uka urojja, apostolonakampi mayni arkirinakampiw tantachasisipkäna ukhamaruw phesqëri kutin Jesusajj uñstäna. Ukapachaw Jesusajj Diosan Arupat sum yatichäna, sum “Qellqatanakatjj jupanakarojj amuytʼayäna”. Ukhamatwa arkirinakapajj kunjamsa Diosan uñisirinakapajj Jesusar jiwayapjjañapäna ukat kunjamsa Diosajj Jesusar jaktayañapäna ukanak sum amuyapjjäna. Uka tantachäwi tukuyarojja, kunsa arkirinakapajj lurapjjañapa ukwa Jesusajj akham säna: ‘Taqe markanakaruw parlasini, Jerusalenat qalltasina, akham sasa: “Jan wali jakäwinakamatjja [Criston sutipjjaru] arrepientisipjjam juchanakamajj perdonatäñapataki” sasa’. Ukasti sarakïnwa: “Jumanakaw taqe akanakatjj testigonakäpjjtajja” sasa (Luc. 24:44-48).

5, 6. 1) ¿Kunatsa Jesusajj “testigonakajjäpjjätawa” sasin sispachäna? 2) ¿Kunsa Jesusan arkirinakapajj yatiyjjapjjañapäna?

⁵ Pusi tunka urunak qhepatsti, wasitampiw Jesusajj apostolonakapar qhep qhepa kutin uñstäna, ukat akham sänwa: “Jumanakasti nayat qhanañchapjjetäta [jan ukajj “testigonakajjäpjjätawa”, MT] Jerusalén markana, Judeana, Samariana, taqe aka oraqpachana” sasa (Hech. 1:8). Kunsa uka arunakampejj Jesusajj sañ munaskäna uk apostolonakajj sum amuyapjjpachäna. Ukampis ¿kunatsa Jesusajj “testigonakajjäpjjätawa” sasin sispachäna, janit Jehová Diosan Qhanañchirinakapäpjjätawa sasin sañapäkänjja? Uk saspänwa, ukampis israelitanakaruw parlaskäna, jupanakajj Jehová Diosan Qhanañchirinakapäjjapjjänwa.

⁶ Jehová Diosajj Egipto markan esclavöñatwa nayrajj israelitanakar qhespiyäna, qhepatjja Babiloniatwa qhespiyarakïna, ukampis jichhajj Jesusan arkirinakapajj ukanakat sipansa jukʼamp jachʼa qhespiyäwitwa qhanañchapjjañapäna: Diosajj Jesusan jiwatap toqe ukhamaraki jaktatap toqew juchampita jiwañampita jaqenakaru qhespiyañapäna. 33 marana Pentecostés urunwa qollan ajayun ajllita cristianonakajj “Diosan jachʼa muspharkañ luräwinakapjjata” yatiyapjjäna, ukatjja waljanirakiw istʼapjjäna. Jesusajj alajjpachan Awkipan kupëjjaparu qontʼasisinjja, kuntï sutipajj sañ munki uk phoqasirwa uñjanïna: walja jaqenakaw arrepentisipjjäna, Jehová Diosan jupa toqe qhespiyataparus iyawsapjjarakïna (Hech. 2:5, 11, 37-41).

‘WALJA JAQENAKAR QHESPIYIRIW JUTI’

7. Kunatï 33 maran Pentecostés urun paskäna ukajja, ¿kunsa uñachtʼayäna?

⁷ Kunatï 33 marana Pentecostés urun paskäna ukajja, Jesusan jan juchani cuerpop wali askita Jehová Diosan katoqatapaw qhan amuyasïna, uka loqtasitapjjaruw jaqenakan juchanakapajj perdonasi (Heb. 9:11, 12, 24). Kunjamtï Jesusajj qhanañchkänjja, “janiw serviyasiñatak [jupajj] jutkiti jan ukasti serviriw juti, ukhamarak jakañap churiri walja jaqenakar qhespiyañataki” (Mat. 20:28). Jesusan jiwatap toqejj janiw arrepentisir judionakakejj qhespipjjañapäkänti, jan ukasti “walja” jaqenakaw qhespiyasipjjañapäna. Niyakejjay Jesusan jiwatapjjarojj ‘akapachan juchapajj qʼomachaschejja’ Jehová Diosajj “taqenin qhespiyatäñapwa” muni (1 Tim. 2:4-6; Juan 1:29).

8. ¿Jesusan arkirinakapajj kawkhakamas Diosan Arupat yatiyapjjäna, ukat kunjamsa phoqapjjäna?

⁸ Jesusan nayrïri arkirinakapajj jan ajjsarasaw sapüru Jesús toqet yatiyapjjäna. Jehová Diosan qollan ajayupaw yatiyasipkakiñapatakejj chʼamañchtʼäna, janiw jupanakan chʼamapampikejj uk lurapkänti (Hechos 5:31, 32 liytʼañataki). 33 marat pä tunka paqallqoni maranak pasjjäna ukhajja, “Diosan qhespiyasiñ arunakapajj” judionakarusa jan judionakarusa taqeniruw yatiyasïna, ukatwa “taqe cheqanwa parlasi” sasin arsusïna (Col. 1:5, 23).

9. Jesusajj kuntï siskäna ukarjamajja, ¿kuna jan walinsa cristian tamajj uñjasïna?

⁹ Nayra cristian tamajja, jukʼat jukʼatwa jan walin uñjasiwayi (Hech. 20:29, 30; 2 Ped. 2:2, 3; Jud. 3, 4). Kunjamtï Jesusajj siskänjja, Supayaw kʼari yatichäwinakampi cristiano tamar chʼamaktʼayawayi, ‘akapachan tukusiñapan qalltañapkama’ (Mat. 13:37-43). Ukjjarusti Jehová Diosajj Jesusaruw mä Reyjama uttʼayañapäna. Ukasti 1914 octubre phajjsinwa phoqasïna, ukaw Supayan apnaqata akapachajj ‘qhepa urunakaru’ mantatapa uñachtʼayäna (2 Tim. 3:1).

10. 1) Qollan ajayumpi ajllitanakajja, ¿kunsa janiräkipan sisjjapjjäna? 2) 1914 maran octubre phajjsinjja, ¿kunas pasäna ukat ukajj kunsa uñachtʼayawayi?

¹⁰ Qollan ajayumpi ajllita cristianonakajja, 1914 octubre phajjsejj wali askipunïniwa sasaw janïräkipan sapjjäna. Kuntï Daniel profetajj siskäna ukarjamaw uk amuyapjjäna, Daniel profetajj mä jachʼa khuchsut qoqatwa parläna, ukasti ‘paqallqo maranakatwa’ wasitampi alsuniñapäna (Dan. 4:16). Jesucristojja ‘kuttʼaniñapata’ ‘akapachan tukusiña’ urunakapata parlkasinjja, uka paqallqo maranakajja ‘markanakaru tiempojj churatäki’ ukawa sasaw säna. Khä 1914 maratjja, Criston Reyëjjatapajj qhanaw amuyasjjäna (Mat. 24:3, 7, 14; Luc. 21:24). Ukhamajj Jehová Diosan Jesusaru Reyjama uttʼayatapajja, ‘Diosan jachʼa muspharkañ lurataparakiwa’.

11, 12. 1) Jesucristojj aka Oraqen machaq Reyipjamajja, ¿kun lurañsa 1919 marat aksarojj qalltäna? 2) 1935 maranjja, ¿kunas qhana amuyasiwayi? (28 janankir foto uñjjattʼam.)

¹¹ Jesucristojj aka Oraqen machaq Reyipja­majja, jankʼakiw ‘Jachʼa Babiloniatjja’ ajllit cristianonakaparojj qhespiyäna (Apo. 18:2, 4). Nayrïri Jachʼa Chʼajjwäwi qhepatjja, 1919 maranjja, aka oraqpachanwa Diosan Reino­pan suma yatiyäwinakapasa ukhamaraki kunjamsa Jehová Diosajj qhespiyistu ukanakasa yatiyasiñ qalltasïna. Ukhamatwa walja waranqa ajllita cristianonakarojj tantachthapisiwayi, jupanakaw Cristompi chika alajjpachat apnaqanipjjani.

¹² Jesucristojja, millón millón ‘yaqha uwijanakaparuwa’ tantachthapiwayaraki, ukasti 1935 marat aksaruw qhan amuyasiwayi, jupanakaw taqe markanakata misturi ‘walja jaqenaka’ sasin uñtʼatäpjje. Ajllit cristianonakan yanaptʼapampejja, uka walja jaqenakajj Jesusat yateqasisinwa, jan ajjsartʼasa akham sasin qhanañchapjje: ­“Jehová ­Diosampi Je­sucristompiw qhespiyistu” sasa. Jichhajj jupanakatï Jesucriston loqtasitaparu iyawsa­sipkakini ukat Diosan Arupat jan qarjtasa yatiyasipkakini ukhajja, ­Supayan pachapajj ‘jachʼa tʼaqhesiñan’ tukjatäkani ukhasa uka cristianonakajj qhespipjjarakiniwa (Juan 10:16; Apo. 7:9, 10, 14).

‘TAQE CHʼAMAMPI DIOSAN ARUNAKAP YATIYAPJJAÑÄNI’

13. Jehová Diosan Qhanañchirinakapjamajja, ¿kunsa luraskakiñasa, ukat kunjamatsa uk phoqsna?

¹³ Kunanaktï Diosajj lurawayki ukat kunanaktï jutïrin lurkani uka ‘jachʼa muspharkañ luratanakapat’ qhanañchañajj wali kusiskañapuniwa. Ukham qhanañchañajj awisajj chʼamakïspawa. Walja jilat kullakanakajja, jiskʼachasiri jan istʼasiri, jaqenakaruw yatiyapjje, yaqhepasti uñisirinakan arknaqataw uñjasipjjaraki. Ukhaman uñjasisajja, apóstol Pablompita mayni cristianonakampitwa yateqassna. Pablojj sänwa: “Diosaw nanakaru yanapapjjetu jupan qhespiyasiñ arunakap taqe iyawsañampi jumanakar ya­tiyañataki, jachʼa tʼaqhesïw taypina” sasa (1 Tes. 2:2). Ukhamajj janipun aynachtʼapjjañäniti, jan ukasti Supayan apnaqata akapachan tukusiñapkama aguantasipkakiñäni, kuntï bautisasiñatak arsuwayktan ukjja phoqasipkakiñäni (Isa. 6:11). Ukatjja amtapjjapuniñäni janiw chʼamasampikejj uk lurksnati. Nayra cristianonakat yateqasisina Diosat qollan ajayupa mayipjjañäni, ukhamatwa Diosajj ‘jachʼa chʼamapa’ churistani (2 Corintios 4:1, 7 liytʼañataki; Luc. 11:13).

14, 15. 1) Nayra tiemponjja, ¿kunjamsa jaqenakajj cristianonakar uñjapjjäna? 2) Cristianonakat ¿kamsänsa apóstol Pedrojja? 3) Jehová Diosan Qhanañchiripätas layku jiskʼachapjjestani ukhajja, ¿kamachañasasa?

¹⁴ Jichhürunakanjja, walja millón jaqenakaw ‘cristianöpjjtwa, Diosaruw servipjjta’ sasin sapjje, ukampis “luräwinakapampejj janiw ukham uñachtʼayapkiti, jupanakajj uñisirinaka, jan yäqasiñan qhoru jaqenakäpjjewa, janirakiw kuna sumsa lurirjamäpkiti” (Tito 1:16). Amtañäni, nayra cristianonak tiemponjja, walja jaqenakaw cheqa cristianonakarojj uñisipjjäna. Ukatwa apóstol Pedrojj akham säna: “[Cristo] laykutejj jumanakar jan wali arunakampi toqepjjätam ukajja, kusisiña­nïpjjtawa, Diosan ajayupasti jumanakjjaruw uttʼasi” sasa (1 Ped. 4:14).

¹⁵ Jichha tiemponjja, ukhamarakiw ­Jehová Diosan Qhanañchirinakapajj Cristo layku jiskʼachata uñjastanjja. Jiwasanakajj janiw Jehová Dios toqetak parlktanti, jan ukasti Jesusatsa parlaraktanwa, Diosan ­Reinopanjja Jesusaw Reyejja sasaw qhanañcharaktanjja. Ukhamasti, Jehová Diosan sutipa apatasat uñisitäñasa, ‘Cristo layku uñisitäñasa’ pachpakiwa. Jesucristorojj ukhamarakiw Dios ­toqet parlatapat uñisipjjäna, ukatwa jupajj säna: “Nayajj Awkejjan khitanitaw jutta, jumanakasti janiw katoqapkistati” sasa (Juan 5:43). Ukhamajj Diosan arunakap yatiyatasat jan sum uñjapkistani ukhajja, janipun aynachtʼapjjañäniti, qhanañchasipkakiñäni. Jehová Diosajj wali askitwa uñjistu, qollan ajayupwa churarakistu.

16, 17. 1) Walja cheqanakanjja, ¿kunjamas Diosan markapajj nayrar sartaski? 2) ¿Kunsa jichhajj lurañäni?

¹⁶ Amtapjjañäni, Jehová Diosan markapajj oraqpachanwa wal jiljjattaski. Diosan Arupajj walja kuti yatiyatäjje uka cheqanakansa, qhespiyasiñ arunakat yatiñ munir jaqenakajj utjaskakiwa. Ukhamasti, Diosan Arupat yatjjatañ munirinakarojj yatichir kuttʼaskakiñäni, ukatjja Bibliat yatichasa yanaptʼasipkakiñäni, Jehová Diosar jakäwip katuyasina bautisasipjjañapkama. Sudáfrica cheqankir Sarie sat kullakat parltʼañäni, jupajj paqallq tunka maranak jilaw Diosar serviski. Kullakajj siwa: “Walpunwa Jehová Diosarojj Jesusan jiwas layku jiwatapat yuspärtjja, uka sacrificio toqew Taqe Kunjjar Munañani Jehová Diosarojj jakʼachasta, ukatjja Diosan jachʼa sutipat yatiyañajj wal kusisiyarakitu” sasa. Jupampi Martinus esposopampejj waljaniruw Diosar serviñ yanaptʼawayapjje, kimsa wawanakaparus ukhamaraki. Sarie kullakajj saskakiwa: “Ukham kusiskañ yaqha luräwejj janipuniw utjkaspati, ukhamaraki Jehová Diosajj qollan ajayupampiw chʼama churistu, ukhamat qhespiyasiñ arunakap yatiyaskakiñasataki” sasa.

¹⁷ Jiwasajj bautisatäjjstansa janisa, Jehová Diosan Qhanañchirinakapampi mayachtʼatäñajj wali kusiskañapuniwa. Ukhamasti Diosan arunakapa taqenir yatiyaskakiñäni, Supayan ñanqha pachapat jitheqtatäñatakis chʼamachasiskakiñäni. Ukhamatakwa Jehová Diosan qollan sutipa apirinakjamajj Alajjpachankir munasiri Awkisarojj jachʼañchañäni.