Jehová Diosar yanapañjja wali askit uñjapjjañäni
“Jiwasajj Diosan yanapirinakätanwa.” (1 COR. 3:9)
1. Luratanakap uñjasajja, ¿kunjamas Diosajj jikjjatasi, ukat servirinakapan kunjam jikjjatasipjjañapsa munaraki?
JEHOVÁ DIOSAJJ kun lurasas walpun kusisi (Gén. 1:25; Juan 5:17). Ukatjja, angelanakasa jaqenakasa ukham kusisipjjarakispa, uk munaraki, ukatwa kunayman lurañanak churi. Sañäni, qalltanjja, Diosajj Jilïr Yoqapampiw aka Oraq lurañatakejj yanaptʼayasïna (Colosenses 1:15, 16 liytʼañataki). Ukatwa Biblianjja, Jesusajj janïr aka Oraqer jutkasajj Diosaruw yanapaskäna sasajj qhanañchistu (Pro. 8:30, NM).
2. Jehová Diosajj angelanakar kunayman lurañanak churatapjja, ¿kunjamatsa yattanjja?
2 Biblianjja, qalltat tukuykamaw Jehová Diosajj angelanakaparojj kunayman lurañanak churatap qhanañchistu. Sañäni, kunapachatï Adanampi Evampejj juchar puripjjatap layku Edén paraisot jaqsuta uñjasipkäna ukhajja, “querubines sat angelanakwa Diosajj [uka huertor] usküna, ukanakasti mä aqkir espada aytʼasitäpjjänwa, taqe toqet muyuntapjjarakïna, jan khitis jakañ qoqar puriñapataki” (Gén. 3:24). Ukatjja, Apocalipsis 22:6 qellqatanjja, Jehová Diosajj mä angelwa khitäna, “servirinakaparu uñachtʼayañataki kunatejj mäki luraskani ukanakata” sasaw sarakistu.
DIOSAJJ LURAÑANAK JAQENAKAROJJ CHURI
3. ¿Kunsa Jesusajj aka Oraqenkkäna ukhajj Awkipat yateqasisajj luräna?
3 Jesusajj aka Oraqenkkäna ukhajja, kuntï alajjpachankir Awkipajj siskäna ukjja taqe chuymaw phoqäna. Awkipat yateqasisarakiw arkirinakaparojj wakiskiri lurañanak churäna. Uk sum phoqapjjañapatakejj akham arunakampiw chʼamachtʼäna: “Khititejj nayar iyawskitu ukajja, lurarakiniwa kuntejj nayajj lurktjja ukanaka, jukʼamp jachʼa luräwinakampwa lurani, Awkejjajj kawkinkkitejj ukaru saratajj layku” sasa (Juan 14:12). Uka luräwjja kunatsa jankʼaki phoqapjjañapäna uk amuytʼayañatakejj akham sarakïnwa: “Khititejj khitankitu ukan lurañanakapjja urükïpanwa lurañasajja. Arumajj jutaskiwa, ukansti janiw khitis irnaqkaspati” sasa (Juan 9:4, NM).
4-6. 1) ¿Kunatsa Noé chachan Diosar istʼatapajj jiwasatak wali askejja? 2) ¿Kunatsa Moisesan luratanakapajj jiwasatakejj wali askejja? 3) Kuntï Diosajj lurañasatak maykistu ukajja, ¿kunatsa wali askejja?
4 Janïr Jesusajj aka Oraqer jutkäna ukhajja, Jehová Diosajj jaqenakan kusisit jakasipjjañapatakejj kunayman lurañanakwa churäna. Adanamp Evampejj kuna lurañanaktï Diosajj churkäna ukjja janiw phoqapkänti, ukampis yaqhepajj kuntï Diosajj maykäna ukanakjja sum phoqapjjäna (Gén. 1:28). Sañäni, Jehová Diosajj Noé chacharojj mä arca luram sasaw säna, uka arca toqew jupasa familiapasa Uma Juiciot qhespiyasipjjañapäna. Noé chachasti kunjamtejj Diosajj siskatayna ukhamwa taqe kunsa luräna. Ukatwa jiwasas jakaskaraktanjja (Gén. 6:14-16, 22; 2 Ped. 2:5).
5 Jehová Diosajja, ukhamarakiw Moisesarojj tabernáculo uta lurañapataki ukat sacerdotenak uttʼayañapataki mayïna. Moisesasti kunjamtï Diosajj siskäna ukhamarjamaw lurarakïna (Éxo. 39:32; 40:12-16). ¿Kunatsa Moisesan luratanakapajj jiwasatakejj wali askejja? Kunjamtï apóstol Pablojj siskänjja, tabernáculo utasa sacerdotenakar uttʼaykäna ukasa, kunatï jutïrin ‘utjañapäkäna’ ukwa uñachtʼayäna (Heb. 9:1-5, 9; 10:1).
6 Jehová Diosan amtapajj sumaw phoqasiski, ukarjamaw servirinakapan lurañanakapajj mayjtʼaskaraki. Ukampis kuntï Diosajj lurañasatak maykistu ukajja, juparuw jachʼañchi ukat jiwasan askisatakirakiwa. Cheqansa, kunanaktï Jesusajj alajjpachankkasasa aka Oraqenkkasasa lurkäna ukanakajj Diosaruw jachʼañchäna ukat jiwasan askisatakirakïnwa (Juan 4:34; 17:4). Jichhürunakanjja, kunanaktï Diosatak lurktan ukanakajj ukhamarakiw Jehová Diosarojj jachʼañchi (Mat. 5:16; 1 Corintios 15:58 liytʼañataki). ¿Kunatsa ukham sistanjja?
DIOSAJJ KUNA LURAÑANAKTÏ CHURKISTU UK WALI ASKIT UÑJAÑÄNI
7, 8. 1) Kunanaksa jichha tiempo cristianonakajj lurapjjañapa uk qhanañchtʼam. 2) ¿Kunjamsa Jehová Diosan mayitanakaparojj istʼañasa?
7 Jehová Diosajj jucharar jaqenakarojj jupan yanapiripäñatakiw jawsi, ukajj wali kusiskañapuniwa (1 Cor. 3:9, NM). Khitinakatï Tantachasiñ Utanaka, Jachʼa Tantachasiñ Utanaka, sucursalanaka lurañan yanaptʼasipki uka jilat kullakanakajja, Noé ukat Moisés chachanakjamaw yanaptʼasipki. Inas jiwasajj mä Tantachasiñ Uta askichañansa, jan ukajj Warwick (Nueva York) sat markan Betel uta lurañansa yanaptʼaskstan (23 janankir dibujo uñjjattʼam). Taqe uka utanak lurañajj Diosar serviñamp sasiwa, ukhamajj wali askit uñjapjjañasawa. Ukampis taqe cristianonakatakejj yaqha ukham suma luräwiw utjaraki: ukasti Diosan arunakapa jaqenakar yatiyañawa. Ukham yatiyañajja, Jehová Diosaruw wal jachʼañchi ukat taqe istʼasirinakarus wal yanaptʼaraki (Hech. 13:47-49). Jehová Diosan markapaw uk sum phoqañatakejj irpaskistu, ukatwa awisajj yaqha lurañanakamp churistu.
8 Jehová Diosan servirinakapajja, taqe chuymaw markapan mayitanakaparojj nayratpachsa istʼapjjäna (Hebreos 13:7, 17 liytʼañataki). Inas qalltanjja, kunatsa yaqhep luräwinakajj mayjtʼi uk jan sum amuykchiñäniti, ukampis Jehová Diosan mayjtʼayataparu taqe chuyma istʼañäni ukhajja, askisatakïniwa.
9. ¿Kunjamsa irpir chuymaninakajj tamanakatakejj yateqaskayäpjje?
9 Irpir chuymaninakajj taqe chuymaw Diosan munañap lurañ munapjje ukwa tamarus uñachtʼayapjjaraki (2 Cor. 1:24; 1 Tes. 5:12, 13). Kuna mayjtʼäwinakatï utjki uk sum phoqañatakejj wal chʼamachasipjje. Diosan Reinopat yatiyasiñapatak mayjtʼäwinakajj utjki ukanaksa, wali kusisitaw phoqapjjaraki. Telefonot yatiyañasa, barco puriñanakana ukhamarak kawkjantï walja jaqenakajj utjki ukanakan yatiyañasa kunjamsa wal yanaptʼaski ukwa jupanakajj sum uñjawayapjje. Inas jupanakatjja, mä qawqhanejj qalltanjja, pächasipjjchïna, ukampis qhepatjja, ukham lurañajj kunja askïnsa ukwa uñjawayapjje. Amuytʼañataki, Alemania markankir mä tamanjja, mä qhaturuw yatiyir sarañ amtapjjatayna. Ukarusti pusi precursoranakaw sarapjjäna, jupanakat maynïrejj Michael satänwa. Jupasti siwa: “Walja maranak nayraw ukham yatiyirejj sarapjjerïyäta, ukampis jichhajj wal ajjsarayasipjjayäta. Jehová Diosajj sumwa uk yatiskpachäna, wali sumpun yatiyañatakejj yanaptʼaniwayapjjetu. ¡Jupar taqe chuyma confiyapjjatajatsa ukat Diosan Apnaqäwipat Yatiyañataki sat qellqatarjam lurapjjatajatsa wal kusisipjjayäta!” sasa. Jiwasajj ¿ukhamarakti Diosan arunakap yatiyañatakejj kunayman toqet chʼamachasisktanjja?
10. ¿Kuna mayjtʼäwinakas Diosan markapan utjawayi?
10 Awisajj Diosan markapanjja, yaqha mayjtʼäwinakaw utjaraki. Aka qhepa maranakanjja, yaqhep sucursalanakajj mä sucursalarukiw mayachasiwayjje. Uka sucursalanakankir jilat kullakanakatakejj mä jukʼa chʼamäkchïnsa, qhepatjja walja askinakaw utjawayi (Ecl. 7:8). ¡Jehová Diosan markapan wali kusisita uka jilat kullakanakan yanaptʼasipkatapajj wali askipuniwa!
11-13. Diosan markapan mayjtʼäwinak utjatapatjja, ¿kunjamsa yaqhep jilat kullakanakajj chʼamachasiwayapjje?
11 Kawkïr sucursalanakatï mayachasiwayapki ukan servir jilat kullakanakatjja, walja yatichäwinakwa apssna. Yaqhepanakajj walja maranakaw uka Betel utanakan servipjjäna. Casarat mä jilatamp kullakampejja, Centroamérica toqenkiri mä jiskʼa sucursalanwa yanaptʼasipkäna, ukampis jupanakarojj México markankir jachʼa Betel utaruw jawsapjjäna. Rogelio jilatajj siwa: “Familiaru ukat amigonakaru jaytañajj wali chʼamapunïnwa” sasa. Juan sat yaqha jilatarojj ukhamarakiw México markar apapjjäna, jupasti siwa: “Machaqatsa jakañ qalltkirista ukham amuyasta, jichhajj yaqha amigonak jikjjatañataki yaqha lurañanakaru yatintañataki chʼamachasiñajawa, yaqha amuyunakaru yatinoqtañajarakiwa” sasa.
12 Khaysa Europa toqenjja, ukhamarakiw yaqhep betelitanakajj Alemania sucursalar sarjjapjjäna, jupanakatakejj mä jukʼa ukham chʼamarakikïnwa. Yaqhepajj Suiza markanwa jakasipjjäna, Alpes sat qollunak jakʼana. Yaqhepasti Austria markan jakasipjjarakïna, uka Betelanjja mä qawqhanikiw utjasipjjäna.
13 Khitinakatï yaqha sucursalanakar sarjjapjje uka jilat kullakanakajj yaqha utanakanwa jakasjjapjje, jan uñtʼat jilat kullakanakampiw irnaqjjapjje, yaqhepanakajj yaqha luräwinakwa yateqapjjaraki. Jichhajj yaqha tamampiw tantachasjjapjjaraki, jupanakampiw yaqha jaqenakaru, awisajj yaqha aru parlirinakaru yatiyir mistupjjaraki. Ukham lurañajj chʼamäkchisa, walja betelitanakaw iyaw sasin uka sucursalanakar sarawayapjje. ¿Kunatsa ukham lurawayapjje?
14, 15. 1) ¿Kunjamsa walja jilat kullakanakajj Diosamp chika irnaqañarojj wali askit uñjapjjatap uñachtʼayapjjäna? 2) ¿Kunsa jupanakat yateqassna?
14 Grethel sat mä kullakajj siwa: “Jehová Diosarojj munasitaj laykuw iyaw sawayta, nayarojj janiw mä markasa, ni mä utasa, ni Diosar kunjaman serviñas apaqkitaspati” sasa. Dayska sat mä kullakajj sarakiwa: “Niyakejjay Jehová Diosan munañapächejja, jan pächasisaw iyaw sista” sasa. André jilatampi Gabriela kullakampejj ukhamarakiw iyaw sapjjatayna, jupanakasti akham sapjjewa: “Uka invitacionarojj wali askitwa uñjapjjta, wasitampiw munañanakaj maysar apanukusa, Jehová Diosar nayraqat serviñ amtawayapjjta. Ukat akham sapjjarakta: ‘Kunapachatï Jehová Diosan thayapajj thaytʼanki ukhajja, jupampejj apayasiñasakiwa, janiw mä perqa saytʼayañasäkiti’ sasa”.
Jehová Diosan yanapiripäñajj mä suma bendicionawa
15 Niyakejjay yaqhep sucursalanakajj mayachthapisiwayjjchejja, mä qawqha betelitanakarojj precursorjam servipjjañapatakiw invittʼasi. Dinamarca, Noruega, Suecia uka markankir sucursalanakajj Escandinavia sat markankir sucursalar mayachasjjäna ukhajja, yaqhep jilat kullakanakarojj precursorjam servipjjañapatakiw khitapjjäna. Florian sat jilatampi Katherine sat kullakampejj ukham serviriw sarapjjäna, jupanakasti sapjjewa: “Precursorjam serviñajj chʼamakïkchisa, wali kusisitaw ukham serviñjja katoqasipjjta. Kawkinkkañänisa Jehová Diosampi apnaqatäñajj wali askipuniwa. Taqe chuymaw ‘walja bendicionanak katoqawayapjjta’ sasin sapjjerista” sasa. Inas jiwasanakatjja, jilapartejj jan ukhaman uñjaskchiñäniti, ukampis ¿kunsa jupanakat yateqassna? ¿Janit jupanakan suma chuymanïpjjatap yateqasksna? ¿Janit jupanakjam Diosan Reinopar nayrar uchañataki chʼamachaskaraksna? (Isa. 6:8.) Jiwasanakatï Jehová Diosar iyaw sasa kawkinsa jupar serviskakiñäni, jupamp chika irnaqaskakiñäni ukhajja, wal bendicistani.
JEHOVÁ DIOSAMPI CHIKA IRNAQAÑAROJJ WALI ASKIT UÑJASKAKIÑÄNI
16. 1) Gálatas 6:4 qellqatajja, ¿kunsa ewjjtʼistu? 2) ¿Kuna jachʼa bendicionsa Diosajj churistu?
16 Jucharar jaqenakjamajja, awisajj luratanakasat lupʼiskañat sipansa, mayninakan luräwinakapwa uñchʼukiñ yattanjja. Ukampis Diosan Arupanjja, sapa mayniw luräwinakapat amuytʼasiñapa sasaw ewjjtʼistu (Gálatas 6:4 liytʼañataki). Jiwasanakat jilapartejj janiw taman mä irpirjamajj yanapktanti, janirakiw taqenisa precursorjamasa, misionerjamasa, betelitjamasa servktanti. Ukampis janipun armasipjjañäniti, Jehová Diosajj mä suma bendicionwa taqenir churistu. Ukasti arunakapat yatiyañawa, ukhamatwa Diosarojj yanaptanjja. Ukajj ¡wali jachʼa bendicionapuniwa!
17. Supayan apnaqata akapachanjja, ¿kunanakas awisajj utji, ukat kunatsa jan aynachtʼañasäki?
17 Supayan apnaqat akapachanjja, Jehová Diosar kunjam serviñtï munktan uk phoqañajj chʼamakïspawa. Inas familianakasar uñjañasa, usuntañasa, jan ukajj yaqha ukham jan waltʼäwinakasa utjchispa. Ukampis janiw aynachtʼañasäkiti, jan ukasti tiemposarjamajj Jehová Diosan sutipatsa, Reinopatsa qhanañchaskañasakiwa. Qawqtï lurirjamäktan ukarjam lurañataki chʼamachasiskakiñasawa, ukaw jukʼamp askejja. Ukatjja, jiwasat sipansa, jukʼampi lurasipki uka jilat kullakanakataki Jehová Diosan yanapap mayirapipjjañäni. Jehová Diosan sutip jachʼañchirinakajj wali askit uñjatäpjjewa, uk janipun armasiñäniti.
18. ¿Kunatsa munañanakas maysar apanuktanjja?
18 Jucharar jaqëkstansa, Jehová Diosajj jupar yanapatasat wali kusisitaw jikjjatasi. Jiwasajj ukhamarakiw aka qhepa urunakan Jehová Diosamp chika irnaqañarojj wali askit uñjtanjja. Ukatwa munañanakas maysar apanuktanjja. Jutïrinwa kuntï munktan ukanakjja katoqjjañäni. Ukanwa taqenis wali kusisita sumana wiñayataki jakasjjañäni (1 Tim. 6:18, 19).
¿Jehová Diosamp chika irnaqañarojj wali askitti uñjasktanjja? (16-18 tʼaqanaka uñjjattʼäta)
19. ¿Kunsa Jehová Diosajj jutïrin churistani?
19 Niyakejjay akat mä jukʼarojj mä suma paraisor mantchiñänejja, kuntï Moisesajj janïr Suma Oraqer mantkasajj israelitanakar siskäna uk amtasipjjañäni, jupasti sänwa: “Ukapachasti Diosajj taqe luräwinakamanwa jachʼaptayapjjätam [jilarkirwa churapjjätam, NM]” sasa (Deu. 30:9). Armagedón pasatatsti, Jehová Diosajj khitinakatï Jupar taqe chuyma yanaptʼawayktan ukanakarojj aka Oraqwa churistani. Ukat yaqha luräwimpwa churarakistani: aka Oraqjja mä suma paraisoruw tukuyapjjañäni.