Kuna aski luräwinaktï Diosax churkistu ukxa sum uñjapxañäni
1 Qalltatpachwa Jehová Diosax luqtirinakaparux kunayman walja aski luräwinak chachanakarusa warminakarusa kunayman jaqinakarusa churatayna (Luc. 1:41, 42; Hech. 7:46; Fili. 1:29). ¿Jichhürunakan ukhamarakiti? ¿Kuna aski luräwinaksa Jehová Diosax churistu?
2 Yaqhip aski luräwinaka. Mayaxa, Jehová Diosan yatichäwinakapxa katuqtanwa janiw yaqhanakax uk katuqapkiti (Mat. 13:11, 15). Ukatxa, tantachäwinakansa arstʼäwinakasampix Diosar yupaycharaktanwa (Sal. 35:18). Ukhamaxa, tantachäwinakanxa arstʼañasapuniwa ukhamarak kuna luräwinaksa taman katuqañäni ukxa taqi chuymaw kusisita lurañasa. ¿Tantachasiñ Utax sumäñapataki ukhamarak qʼumachañatakisa yanaptʼapuntanti? Ukaxa mä suma aski luräwirakiwa.
3 Ukatxa, millón millón jaqinakax janiw yatipkiti Diosax mayitanakap istʼit janicha ukxa, ukampis jiwasanakarux Taqi kunjar munañani Dios kikpaw mayitanakasxa istʼistu (Pro. 15:29). Jehová Dios kikpaw yupaychirinakapan mayitanakapxa istʼi (1 Ped. 3:12). Ukatxa walja kuti mayistan ukxa istʼaskakistuwa. Ukhamaxa, ‘taqi urunakanwa’ jupat mayissnaxa (Efe. 6:18, Machaka Testamento).
4 ‘Diosan yanapirinakapa.’ Jiwasanakax Diosan Apnaqäwipat suma yatiyäwinak qhanañchañanxa ‘Diosan yanapirinakapäpxtanwa’, ukaxa mä suma luräwiwa janiw ukham luräwix yaqhanakar churaskiti (1 Cor. 3:9, MT). Uka irnaqäwixa chʼamañchistuwa ukat wal kusisiyistu (Juan 4:34). Jehová Diosax yaqhanakampiw ukxa lurayaspäna, ukampisa jupax munasiñatwa uka irnaqäwxa jiwasanakar churistu (Luc. 19:39, 40). Ukxa Jehová Diosax janiw taqi jaqiru churkiti, jan ukasti khitinakatï uka yatiyäwinak apapki ukanakaxa Bibliarjam walja mayitanakwa phuqapxañapa (Isa. 52:11). Ukhamaxa, ¿aka aski luräwxa sapa semanati nayrar uchasktanxa?
5 Jehová Diosan uka aski luräwinak churkistu ukaxa jakäwisanxa qamiriptayistuwa (Pro. 10:22). ¡Janiw ukhamak uñjañasäkiti! Chiqapun valorataswa uñachtʼayañäni. Ukhamatwa alaxpachankir Awkisar yuspäratas uñachtʼayañäni, kunattixa “taqi kunatix askïki ukhamarak chiqäki” ukaxa jupatwa juti (Sant. 1:17).