BIBLIA TOQET JISKTʼANAKA
¿Kunjamatsa suma awk taykässna?
¿Wawamar Diosar munasiñapatak yatichasktati?
Awk taykanakapar munasiñampi, respetompi jakasir uñjasajja, wawanakajj kusisitakiw jakasipjje (Colosenses 3:14, 19). Janiw ukakïkiti, qawqsa jupanakar munasipjje ukat jupanakatsa kunja kusisitas jikjjatasipjje ukanaksa yatiñ munapjjarakiwa. Jehová Diosatwa awk taykanakajj yateqasipjjaspa, Jupajj Jesucristo Yoqaparojj munat wawaja, nayaw ajllisma sasaw säna. (Mateo 3:17 liytʼäta.)
Alajjpachankir Jehová Dios Awkisajja, sapa mayniruw istʼistu, kunjamas jikjjatastan uksa amuyarakistuwa. Awk taykanakajj Diosat yateqasipjjañapa, kuntï wawanakapajj sapki uksa istʼapjjañaparakiwa (Santiago 1:19). Kunsa wawanakajj munapjje uksa respetapjjañaparakiwa, janirakiw mä jukʼa pantjasipansa, sinti jan walipunïkaspas ukham amuyañapäkiti. (Números 11:11, 15 liytʼäta.)
¿Kunjamsa wawamar suma jaqëñatak yanaptʼasma?
Awk taykanakajja, wawanakapajj kunsa utan lurapjjañapa, kunsa jan lurapjjañapäki uk amtapjjañapajj walikïskiwa (Efesios 6:1). Ukampis Diosjamarakiw ukanakat sum qhanañchañapa, jan ukar istʼkani ukhajj kunansa uñjasipjjani uksa sum qhanañchtʼañaparaki. Ukham lurasinjja, munasiñwa uñachtʼayaski (Génesis 3:3). Munkir jan munkir phoqayañat sipansa, kunatsa ukarjam sarnaqañajj askejja, ukwa amuytʼayañapa. (Isaías 48:18, 19 liytʼäta.)
Wawanakamarojj Diosar munasipjjañapatakiw yanaptʼañama. Ukhamtï lurätajja, wawanakamajj suma amtaruw puripjjani, jan ukankkäta ukhas ukham lurapjjarakini. Diosajj wali sum yatichawayistu, jumajj ukham lurañamarakiwa. (Deuteronomio 6:5-7 ukat Efesios 4:32; 5:1 liytʼäta.)