BIBLIA TOQET JISKTʼANAKA
¿Kunatakis aka Oraqen jakpachätanjja?
¿Janit walja maranak jakasiñ munkasma?
Akham sasin jisktʼasirïtati, ‘¿jakañajj anattʼaña, trabajiña, casarasiña, wawanakanïña, ukat chuymankipstaña, ukakïpachati?’ (Job 14:1, 2). Wali yatiñani jaqenakas ukhamwa jisktʼasipjjarakïna, sasaw Bibliajj qhanañchi. (Eclesiastés 2:11 liytʼäta.)
Mä suma amtampi luratätas yatiñatakejja, nayraqatajj kunjamatsa jakañajj utjawayäna uk yatjjatañasa. Yaqhepanakajj kunja suma lurtʼatas lejjwisa, (jan ukajj lajjwisa) ukat jaqenakan cuerpopasa, ukanak yatjjatasajja, ‘mä wali yatiñani Luririw lurpachïstu’ sasaw sapjje. (Salmo 139:14 liytʼäta.) Ukhamajj maynin luratästan ukhajja, jupajj mä amtampiw lurpachïstu. Kuna amtampi luratätansa uk yatiñajja, sum jakasiñatakiw yanaptʼistani.
¿Kuna amtampis Diosajj lurpachïstu?
Kunapachatï nayrïr awk taykasar lurkäna ukhajja, mä amtampiw jupanakar luräna. Nayrïr awk taykasajja, aka Oraqer jaqenakampiw phoqantapjjañapäna, mä paraisoruw tukuyapjjañapäna ukat wiñayatakiw jakapjjarakiñapäna. (Génesis 1:28, 31 liytʼäta.)
Kunapachatï nayra awk taykasajj Diosar kutkatasipkäna ukhajja, Diosajj janiw amtap mayjtʼaykänti. Diosajj ukhat jichhakamas irnaqaskakiwa, ukhamat aka Oraqen amtapajj phoqasiñapataki sasaw Bibliajj qhanañchi. Jehová Diosajj wali kusisit jakassna ukwa muni. (Salmo 37:29 liytʼäta.) Ukhamasti, Diosan amtaparjam jakasiñatakejj kuns lursna uk Bibliaw sum qhanañchistu.