Perdonañatakejj jankʼakïñamawa

BIBLIAJJ AKHAM SIWA: “Jumanak purajj [...], maynit maynirus perdonasipjjarakim jan wali lurasipjjsta ukapachajja. Kunjämtï jumanakarojj [‘Jehová Diosajj’, NM] perdonapjjtamjja, ukhamarak jumanakajj perdonapjjam” sasa (Colosenses 3:13).

¿Kamsañsa muni? Bibliarjamajja, juchajj mä manumpi sasiwa, perdonañajj uka manu phoqañampi sasirakiwa (Lucas 11:4, NM). Bibliat mä qellqatajj “perdonaña” siski uka arut akham qhanañchi: ‘Griego arurjamajja, “maynin manup armasjjaña, jan mayampitaki amtasjjaña” sañwa munaspa’ sasa. Ukatwa perdonkañäni ukhajj jan mayampitaki armasjjañasa. Ukampis perdonañajj jan wali luratapajj janis kunäkaspa ukham janiw sañ munkiti. Jan wali luratapajj chuymsa ustʼaykchistojja, janiw chuymasar imjjasiñasäjjeti.

¿Uka ewjjtʼajj yanaptʼistaspati? Pantjasir jaqjamajj taqeniw jan walinak lurtanjja (Romanos 3:23). Ukatwa mayninakar perdonañajj wakisi, kunatejj mayninakan jiwasar perdonañap munarakiñäniwa. Perdonasajj jiwasas askinak jikjjatarakiñäniwa. ¿Kuna askinaksa jikjjatsna?

Jiwasatï jan perdonkañäni, ukhamarak colerata, chuymas ustʼata sarnaqaskakiñäni ukhajja, jan waliruw purtʼassna. Ukham sarnaqañajj janiw kusisit jakasiykistaspati, llakimpiw aynachtʼsna, awisajj usuntañar kunaw purtʼassna. Uka toqet Yoichi Chida sat doctorampi, Andrew Steptoe sat Psicología toqet yatichirimpejja, akham sasaw mä qellqatan (Journal of the American College of Cardiology) qhanañchapjje: “Colerat sarnaqañajja, chuyma may akatjamat saytʼañaruw puriyaspa (cardiopatía coronaria)” sasa.

Perdonañajj kuna askinaksa apanispa uk jichhajj amuytʼarakiñäni. Kunapachatï mayninakar jan wali luratanakapat perdontan ukhajja, sumankañasa, mä wawak jakasiñas utjiwa, ukhamarak mayninakampis sumarak apastan. Ukampis jukʼampi wakiskirejja, Jehová Diosat yateqasitaswa uñachtʼaytanjja, Jupasti juchapat arrepentisirinakarojj perdoniwa, ukham lurañaswa jiwasat suyaraki (Marcos 11:25; Efesios 4:32; 5:1).