¿Kunsa Bibliajj angelanakat yatichi?

Diosajj jan uñjkañ mä espirituwa, angelanakajj ukhamäpjjarakiwa, ‘janiw jañchinïpkiti ni chʼakhanïpkisa’. Diosat jan jitheqtir angelanakajj alajjpachanwa jakapjje, Diosampis parlasipjjarakiwa (Lucas 24:39; Mateo 18:10; Juan 4:24).

Awisajja, angelanakajj jaqer tukusaw aka oraqer Diosan munañap lurir jutapjjäna, ukampis luräwinakap phoqasajja espíritu cuerponiw alajjpachar kutʼjjapjjäna (Jueces 6:11-23; 13:15-20).

Angelanakajj jaqer tukupkäna ukhajja, chachanakaruw tukupjjerïna. Bibliansa jupanakat chachanakäpkaspas ukhamwa parlaraki. Ukampis angelanakajj janiw chachäpkisa ni warmïpkisa. Janirakiw casarasipkaspasa ni wawanïpkarakispasa. Jupanakajj janiw mä asu wawjamasa ni jilïr jaqenakjamas aka oraqen jakawayapkiti. Janirakiw jiwjjasin alajjpachar angeljam sarapkänti. Jan ukasti Jehová Diosaw jupanakar luräna, ukatwa ‘Diosan wawanakapa’ sasin Bibliajj qhanañchi (Job 1:6, NM; Salmo 148:2, 5).

Biblianjja, ‘jaqenakana ukhamarak angelanakan arunakapatwa’ parli. Uka qellqatajja, angelanakajj pachpa arunïpjjatapa parlañ yatipjjatapwa qhanañchistu. Jehová Diosajj angelanak taypis jaqenakamp parlkchïnjja, janipuniw jupanakar adorañassa ni orañassa munkiti (1 Corintios 13:1; Apocalipsis 22:8, 9).

Angelanakajj walja tunka waranqäpjjewa, waranq waranqapunïpjjewa (Daniel 7:10; Apocalipsis 5:11).

Angelanakajj jaqenakat sipansa wali chʼamani, wali yatiñani ukhamäpjjewa. Ukhamarus jankʼakiw mä cheqat yaqha cheqar sarapjjaspa, jaqenakajj janiw uk amuyksnati (Salmo 103:20; Daniel 9:20-23).

Angelanakajj wali chʼamani wali yatiñanïpkchisa, janiw taqe kun yatipkiti (Mateo 24:36; 1 Pedro 1:12).

Angelanakajj sapa mayniw may maya chuymanïpjje, Diosjam munasirïpjjarakiwa. Jupanak pachpaw kun lurañsa ajllipjjaspa. Ukatjja jaqenakjamarakiw kunatï walïki jan walïkaraki ukanak ajllipjjaspa. Ukampis yaqhep angelanakajj Jehová Dios contraw saytʼasipjjäna (Judas 6).