Diosat jan jitheqtir angelanakat yateqasipjjañäni

1, 2. 1) ¿Kunansa angelanakampejj jan igualäktanjja? 2) ¿Kunansa angelanakampejj igualätanjja?

JEHOVÁ DIOSAN servirinakapjamajja, wali munasiri Diosar adorir familia taypinktanwa. Oraqpachankir jilat kullakanakampi, millón millón angelanakampiw uka familia taypinkapjje (Dan. 7:9, 10). Angelanakat amuytʼtan ukhajja, jiwasanakat mayjäpjjatapwa amuytanjja. Jupanakajj jaqenakat sipans walja maranak nayra luratäpjjewa (Job 38:4, 7). Wali chʼamanïpjjewa, cheqaparjam kuns luriri santöpjjarakiwa, jucharar jaqenakjamajj janiw jupanakjamäñ puedksnati (Luc. 9:26).

² Janis uka toqenakan angelanakamp igualäkstanjja, aka toqenakanwa igualätanjja: angelanakajj Jehová Diosjam suma chuymanïpjjewa, jiwasajj ukham chuymanirakïsnawa, kunatï walïki jan walïkaraki uk amtsna, sapa mayniw sutinïtanjja, chuymasas mayj mayjarakiwa, Diosar serviñan kunayman luräwinirakïtanwa. Angelanakjamaw Luririsar adorañ munaraktanjja (1 Ped. 1:12).

3. ¿Kunsa Diosat jan jitheqtir angelanakat yateqassna?

³ Niyakejjay angelanakampejj walja toqenakan igualästanjja, jupanakan yateqaskañäpjjatapajj chʼamañchtʼistuwa, waljanakwa jupanakat yateqasiraksna. Aka yatichäwinjja, angelanakan humildëpjjatapatsa, jaqenakar munasipjjatapatsa, aguantapjjatapatsa, congregacionan qʼomäñapatak wal chʼamachasipjjatapats kunsa yateqsna ukwa yatjjataskañäni.

ANGELANAKAJJ HUMILDËPJJEWA

4. 1) ¿Kunjamsa angelanakajj humildëpjjatap uñachtʼayapjje? 2) ¿Kunatsa angelanakajj humildëpjje? (Salmo 89:7).

⁴ Jehová Diosat jan jitheqtir angelanakajja, humildëpjjewa. Jupanakajj wali experiencianïpkchisa, chʼamanïpkchisa, yatiñanïpkchisa, Jehová Diosan instruccionanakaparojj istʼapjjapuniwa (Sal. 103:20). Jehová Diosat katoqapki uka luräwinakamp phoqkasajj janipuniw ukanakat jachʼañchasipkiti. Janirakiw jaqenakat sipans wali chʼamanïpjjatapat jachʼañchasipkiti. Janisay yaqhanakajj sutinakap yatipkchinejja, kusisit chuymampiw angelanakajj Jehová Diosan munañap lurapjje (Gén. 32:24, 29; 2 Rey. 19:35).a Janiw jupanakajj jachʼañchayasiñ munapkiti, antisas Jehová Diosar jachʼañchasiñapwa munapjje. ¿Kunatsa angelanakajj wali humildëpjje? Kuna laykutejj Jehová Diosaruw munasipjje, wali respetompiw uñjapjjaraki (Salmo 89:7 liytʼäta).

5. Apóstol Juanar cheqañchasajj ¿kunjamsa mä angelajj humildëtap uñachtʼayäna? (Dibujo uñjjattʼarakïta).

⁵ Kunjamsa angelanakajj humildëpjjatap uñachtʼayapjje uk amuytʼañäni. Niya 96 maranjja, mä angelajj apóstol Juanaruw mä musparkañ visión uñjayäna, uka angelan sutipajj janiw yatiskiti (Apoc. 1:1). Uk uñjasajj ¿kunsa apóstol Juanajj luräna? Jupajj angelar adorañatakiw qonqortʼasïna, ukampis uka angelajj jan adorayasiñ munasajj jankʼakiw jupar akham säna: “¡Wal amuyasim! ¡Jan uk luramti! Nayajj jumjam esclavokirakïtwa, […] jilatanakamjam esclavokirakïtwa. Antisas ¡Diosar adoram!” sasa (Apoc. 19:10). Uka angelajj wali humildënwa, janiw jachʼañchayasiñ munkänti. Antisas jankʼakiw Diosar adoram sasin Juanar säna. Janirakiw Juanarojj jupat sipans minusäkaspas ukham amuyayañ munkänti. Uka angelajj jupat sipans walja maranakas Jehová Diosar sirvchïnjja, wali chʼamanirakïchïnsa, humilde chuymampiw “jumjam esclavokirakïtwa” sasin apostolor säna. Uka angelajj apostolor cheqañchkchïnsa, janiw chuyma ustʼayir arunakamp siskänti, antisas wali munasiñampiw jupar parltʼäna. Juanajj uka visión uñjasajj wal musparäna, ukatwa angelar adorañatak qonqortʼasïna, uk angelajj sum amuyäna.

6. ¿Kunjamsa angelanakat yateqasisajj humildësna?

⁶ ¿Kunsa angelanakjam humildëñatak lursna? Angelanakat yateqasisajj Jehová Diosatak wal trabajtʼañ munaraktanjja, ukampis janiw ukanakat jachʼañchayasiñ munktanti, ni suma lurtʼirïksnas ukham tukuñ munktanti (1 Cor. 4:7). Inas mayninakat sipans Jehová Diosar walja maranak sirvjjstan jan ukajj privilegionak katoqarakstan, ukhamächi ukhajja, janiw jilanksnas ukham amuyasiñasäkiti. Antisas Diosan markapan jukʼamp luräwinakanïsajja, jukʼamp minusanksnas ukhamwa amuyasiñasa (Luc. 9:48). Angelanakjamaw mayninakar serviñ muntanjja, janiw mayninakarojj jukʼamp importantëksnas ukham amuyayañ munktanti.

7. Cheqañchkasasa jan ukajj ewjjtʼkasas ¿kunjamsa humildëtas uñachtʼaysna?

⁷ Mayninakar cheqañchasasa ewjjtʼasas humildëtaswa uñachtʼayaraksna, inas mä kullakarusa, mä jilatarusa jan ukajj wawasarus cheqañchañasa ewjjtʼañas wakischini. Awisajj qhan ewjjtʼañaw wakisispa, ukampis kunjamtï angelajj Juanar munasiñamp cheqañchkänjja, ukhamarakiw jiwasajj qhana arunakamp ewjjtʼsna, ukampis janiw aynachtʼayañasäkiti. Jiwasatï mayninakat jilanksnas ukham jan amuyaskañäni ukhajja, munasiñampi respetompiw Bibliarjam ewjjtʼañäni (Col. 4:6).

ANGELANAKAJJ JAQENAKAR WAL MUNASIPJJE

8. 1) Lucas 15:10 textorjamajj ¿kunjamsa angelanakajj jaqenakar wal munasipjjatap uñachtʼayapjje? 2) ¿Kunjamsa angelanakajj predicacionan yanaptʼapjjestu? (Fotompi dibujompi uñjjattʼarakïta).

⁸ Angelanakajj janiw jaqenakat jayankapkiti, janirakiw jaqenakajj janis importantëpkaspa ukham amuyapkiti, antisas jaqenakar wal munasipjje. Maynejj juchapat arrepentisisin Jehová Diosar kuttʼanjje, jan ukajj Diosar uñtʼasin jupar serviñatak cambionak luri ukhajja, angelanakajj wal kusisipjje (Lucas 15:10 liytʼäta). Predicacionans yanaptʼapjjarakistuwa (Apoc. 14:6). Janisay jaqenakar predicapkchejja, Jehová Diosar uñtʼañ munki ukamp parlañasatakiw irpapjjestaspa. Ukampis angelanakaw maynin ukar irpapjjetu sasin janiw siskapunksnati. Jehová Diosajj espíritu santop toqe, jan ukajj yaqha toqenakaw jupar uñtʼañ munki ukar yanaptʼaspa, servirinakaparus irpaspa (Hech. 16:6, 7). Ukhamäkchisa prediktan ukhajj angelanak toqew Diosajj yanaptʼistu. Ukhamajj predicacionan angelanakajj yanaptʼapjjapunistuwa, janiw ukat payachasktanti. (“Oracionanakaparojj jaysänwa” sat recuadro liytʼäta).b

9. ¿Kunjamsa angelanakjamajj jaqenakar munasitas uñachtʼaysna?

⁹ ¿Kunjamsa angelanakjamajj jaqenakar wal munassna? Maynin Diosan markapar kuttʼanjjatap yatiyasjje ukhajja, angelanakjamarakiw wal kusisiñasa. Juparojj sum katoqtʼañasawa, Jehová Diosar wasitat sirvjjatapat kunja kusisitätansa ukajj jupatak qhanäñaparakiwa (Luc. 15:4-7; 2 Cor. 2:6-8). Predicañatak wal chʼamachasisaw angelanakat yateqasitas uñachtʼayaraktanjja (Ecl. 11:6). Kunjamtï angelanakajj predicañan yanaptʼapkistojja, ukhamarakiw jilat kullakanakar predicacionan kunjamat yanaptʼañatakis chʼamachasiñasa. Ukhamajj ¿janit mä machaq publicadoramp predikir sarksna? ¿Janit jilïrëjjapjje jan ukajj usutäpki uka jilat kullakanakar predicañan yanaptʼkaraksna?

10. ¿Kunsa Sara kullakan experienciapat yateqsna?

¹⁰ Jiwasatï Jehová Diosar serviñan jan nayrjam lurirjamäjjstan ukhajj ¿kunsa lursna? Angelanakajj predicañan yanaptʼasipkakistaniwa. India markankir Sarac kullakan experienciapat amuytʼañäni. Mä 20 maranak precursoräsajj usuntänwa, janiw ikiñapats sartirjamäkänti. Ukatwa jupajj wali llakitapunïna. Ukampis jilat kullakanakan yanaptʼapampisa, munasiñamp uñjatäsasa, Biblia liyisas jukʼat jukʼatwa kullakajj kusisitäjjäna. Kullakajj qhawqtï puedkäna ukarjamaw predicarakïna, janiw cartanak qellqañatakis qontʼasirjamäkänti, ukatwa telefonotak predicäna. Kullakajj revisitanakaparuw telefonot jawsäna, jupanakajj khitinakas Bibliat yatiñ munapjjaspa ukwa sapjjarakïna. Ukham luratapatjja, kullakajj mä qhawqha phajjsinakwa 70 jaqenakar Bibliat yatichjjäna. ¡Janiw jupa sapakejj taqenir yatichañ puedkänti! Ukatwa congregacionankir jilat kullakanakarojj mä qhawqhanir Bibliat yatichapjjañapatak mayïna. Yateqerinakat waljaniw jichhajj tantachäwinakar sarjjapjje. Sara kullakjamajj walja jilat kullakanakaw qhawqtï puedipki ukarjam predicañatak chʼamachasipjje, jupanakamp trabajisajj angelanakajj wali kusisitäpjjpachawa.

ANGELANAKAJJ AGUANTIRÏPJJEWA

11. ¿Kunjamsa Diosat jan jitheqtir angelanakajj aguantirïpjjatap uñachtʼayapjje?

¹¹ Diosat jan jitheqtir angelanakajj aguantañan wali yateqaskañäpjjewa. Jupanakajj walja waranqa maranakaw kunayman jan walinak aguantawayapjje. Kunjamsa jupanakamp chik Jehová Diosar servir walja angelanakasa Supayas Dios contra saytʼasipjjäna uks uñjapjjarakïnwa (Gén. 3:1; 6:1, 2; Jud. 6). Kunjamsa mä angelajj mä chʼamani demoniomp nuwasïna uka toqetwa Bibliajj parli (Dan. 10:13). Janiw ukakïkiti, Adanampin Evampin tiempopat jichhakamajja, kunjamsa mä jukʼa jaqenakajj Diosar serviñ amtapjje uks uñjapjjarakiwa. Taqe ukanak uñjasas angelanakajj wali kusisita ukat taqe chuymaw Jehová Diosar servisipki. Cheqas horasaparuw Diosajj taqe jan walinak chhaqtayani, jupanakajj uk sum yatipjje.

12. ¿Kunas aguantañatak yanaptʼistaspa?

¹² ¿Kunjamsa angelanakjam aguantsna? Jiwasajj angelanakjamarakiw kunayman jan walinak uñjsna, jiwas contras saytʼapjjaspawa. Ukhamäkchisa Diosaw uka jan walinak horasapar chhaqtayani sasaw taqe chuym jupanakjam confiytanjja, ukhamajj ‘kunatï walïki uk jan jaytas lurasipkakiñäni’ (Gál. 6:9). Diosan arsutaparjamajja, jupajj aguantañatakiw yanaptʼistani (1 Cor. 10:13). Jiwasajj paciencianïñatakisa kusisitäñatakis Jehová Diosaruw espíritu santop oracionan mayiñasa (Gál. 5:22; Col. 1:11). Juma contra saytʼapjjani ukhajj ¿kunsa lurasma? Jehová Diosar taqe chuym confiyam, jan ajjsarayasimti. Jupajj yanaptʼapunïtamwa, chʼamañchtʼarakïtamwa (Heb. 13:6).

ANGELANAKAJJ CONGREGACIONANAKAN QʼOMÄÑAPATAKIW YANAPTʼAPJJE

13. ¿Aka qhepa urunakan angelanakajj kuna importante luräwinïpjjesa? (Mateo 13:47-49).

¹³ Aka qhepa urunakanjja, Jehová Diosajj mä importante luräwi angelanakar churi (Mateo 13:47-49 liytʼäta). Kunayman jaqenakaw suma yatiyäwinak yatiñ munapjje. Yaqhepajj suma cristianöñatakiw cambionak lurapjje, ukampis yaqhepajj janiw ukanak lurapkiti. Angelanakajj aka luräwinïpjjewa: ‘Cheqapar sarnaqer jaqenak taypit jan wali jaqenakaruw ajllirapjjañapa’. Ukhamasti congregacionanakan qʼomäñapatakiw yanaptʼapjje, ukampis ukajja jiwasamp jan chikachasirinakajj janipunis kuttʼanjjapjjaspa, janipunis congregacionan kuna problemas utjkaspa ukham janiw sañ munkiti. Ukhamäkchisa angelanakajj congregacionanak qʼomachañatakejj wal chʼamachasisipki, janiw ukat payachasiñasäkiti.

14, 15. ¿Kunjamsa congregacionan qʼomäñapatak yanaptʼsna? (Fotonak uñjjattʼarakïta).

¹⁴ ¿Kunjamsa angelanakjamajj congregacionan qʼomäñapatak yanaptʼsna? Sapa mayniw Jehová Diosamp sum apasiñatak wal chʼamachassna. Jehová Diosar munasir amigonak ajlliñasawa, Jehová Diosamp sum apasitas jan waltʼaykaspa ukanakats jitheqtañasarakiwa (Sal. 101:3). Jilat kullakanakarojj Jehová Diosat jan jitheqtapjjañapatakiw yanaptʼaraksna. Mä jilatana jan ukajj mä kullakan jachʼa juchar purtʼasitap yatstan ukhajj ¿kunsa lursna? Jupar munasitasatjja, ancianonakamp parltʼañapatakiw chʼamañchtʼsna. Jupatï ancianonakar jan yatiykani ukhajj jiwasaw yatiyañasa. Jilatasasa jan ukajj kullakasas jankʼak Jehová Diosamp sum apasjjaspa ukwa muntanjja (Sant. 5:14, 15).

¹⁵ Wali llakkañäkchisa, yaqhepanakajj jachʼa juchar purtʼasipjjatapat congregacionat apsutaw uñjasipjje. Ukhamächi ukhajj jan jukʼamp jupanakamp chikachasipjjañäniti (1 Cor. 5:9-13).d Ukham lurañajj congregacionan qʼomäñapatakiw yanaptʼaraki. Ukhamarus congregacionat apsutanakamp jan chikachasitasajja, jupanakar cheqpachapun munasitaswa uñachtʼayi. Uka toqen Jehová Diosar istʼatasajja, jupanakan kuttʼanipjjañapatakiw yanaptʼaspa. Kuttʼanjjapjje ukhasti, jiwasajj Jehová Diosampi angelanakapamp chikaw wal kusisiraktanjja (Luc. 15:7).

16. ¿Kunanaksa angelanakat yateqasisma?

¹⁶ Cheqas angelanakat yateqañasa, jupanakamp chik trabajiñas mä jachʼa privilegiopuniwa. Ukhamajj jupanakat yateqasipjjañäni, jupanakajj humildëpjjewa, jaqenakarojj wal munasipjje, aguantirïpjjewa, congregacionan qʼomäñapatakis yanaptʼapjjarakiwa. Jiwasatï angelanakat yateqasiñäni ukhajja, Jehová Diosar adorapki uka familia taypinwa wiñayatak jupar adoraraksna.