Taqe chuyma churirejj jukʼampwa katoqani

JEHOVÁ DIOSAR sacrificionak loqtañajj nayratpachaw wali wakiskirïna. Israelitanakajja, animalanakwa sacrificiot loqtapjjerïna, cristianonakajj ‘jachʼañchir sacrificionak’ loqtirit uñtʼatäpjjewa. Ukampis yaqha sacrificionakaw Diosar kusisiyaraki (Heb. 13:15, 16). Sacrificio loqtirinakajj kusisitäpjjewa, bendicionanakwa katoqapjjaraki, uk jichhajj uñjañäni.

Anajj Jehová Diosar jan jitheqtasaw servïna, jupajj mä yoqall wawanïñwa munäna, ukampis janiw wawanïñ puedkänti. Ukatwa Jehová Diosarojj jumatï mä yoqall wawa churitäta ukhajja, “uka wawsti jumar serviritakiw uywä” sasin säna (1 Sam. 1:10, 11). Tiempompejja, cheqapuniw Anajj mä yoqall wawa ususïna, Samuel sasaw sutichäna. Ñuñu tʼaqasajj tabernaculoruw Jehová Diosar serviñapataki arupar phoqasa apjjäna. Jehová Diosajj ukham sacrifio loqtatapat bendisïnwa. Qhepatjja, Anajj phesqa wawanakanëjjänwa, Samuelusti profetäjjarakïnwa, jupajj Bibliankir mä qhawqha libronakwa qellqarakïna (1 Sam. 2:21).

Kunjamtï Anasa, Samuelusa Jehová Diosar taqe chuyma servipkänjja, ukhamarakiw jiwasajj Diosar serviraksna. Jutïrinsa walja bendicionanakwa Diosar servipjjatamat katoqapjjäta sasaw Jesusajj säna (Mar. 10:28-30).

Nayra patak maranakanjja, Dorcasajj “walja suma luräwinakwa luräna”, “pobrenakarus khuyapayasiñatwa yanaptʼäna”. Qhepatjja, “usuntasaw jupajj jiwjjäna”, congregacionapankir jilat kullakanakajj wal llakisipjjäna. Ukatwa apóstol Pedrojj uka jakʼanakankaskatap yatisajja, utapar jankʼaki sarañapatak ruwtʼapjjäna. Pedrojj purinisin Dorcasar jaktayäna ukhajj walpun kusisipjjäna. Ukhakamajj apostolonakat jupapuniw nayraqat jaktayäna (Hech. 9:36-41). Kunanaktï Dorcasajj lurawayki ukanak Jehová Diosajj janiw armkiti (Heb. 6:10). Ukatwa taqe ukanak Bibliar qellqayawayi ukhamat yateqasiñasataki.

Apóstol Pablojj ukhamarakiw wali khuyaptʼayasirïna, taqe chuymaw mayninakar yanaptʼirïna, tiempsa apstʼasirïna. Corintonkir cristianonakarojj akham sasaw qellqäna: “Nayajj taqe chuymaw jumanak laykojj kunanakatï utjkitu ukanak churäjja, naya pachpaw qʼal merqʼsusëjja” sasa (2 Cor. 12:15). Mayninakar yanaptʼañatak chʼamachasisajj kusisitätanwa. Yamas Jehová Diosan bendicionanakapwa katoqtanjja, Jupampis sum apasiraktanjja, ukjja apóstol Pablojj jupa pachpaw uñjarakïna (Hech. 20:24, 35).

Jehová Diosan Reinop layku, jilat kullakanakas layku chʼamassa, tiempossa apstʼastan ukajj Diosar wal kusisiyi. ¿Kunanakampsa luraraksna? Qollqempi yanaptʼasaw Jehová Diosar jachʼañcharaksna. Qollqe churatasajj aka oraqpachan Diosan Reinopat yatiyasiñapatakiw yanaptʼi. Sañäni, uka qollqempiw misioneronakarusa, Betelan trabajirinakarusa, precursor especialanakarusa, jan ukajj yaqha ukham servirinakarus yanaptʼasiraki. Qellqatanaka, videonaka lurasiñapatakisa, Tantachasiñ Utanaka lurasiñapatakisa, jan waltʼäwinak utjki ukan yanaptʼañatakis uka qollqempiw yanaptʼasiraki. Jiwasatï taqe chuyma churañäni ukhajja, walja bendicionanakwa katoqañäni. Ukatjja, Jehová Diosaruw ‘taqe qamir kankañasampejj jachʼañchañäni’ (Pro. 3:9; 11:25).

Kunjamanakatsa Oraqpachan Yatiyasiskakiñapatak Yanaptʼasma

Apóstol Pablojj jakkäna uka tiemponjamarakiw jichhürunakan waljanejj qollqepat ‘apaqtʼapjje’, ukat congregacionan “Oraqpachan yatiyasiñapataki” siski uka cajar uchapjje (1 Cor. 16:2). Ukatsti sapa phajjsiw uka qollqjja markapan sarayki uka sucursalar apayapjje. Yanaptʼañtï munstajja, Jehová Diosan Testigonakapan sucursalapajj markaman utjki ukaruw apayarakisma. Kuna sutjjarus apayasma uk yatiñatakejj sucursal sarayiri jilatanakampiw parlañama. Sucursalan direccionapjja, jw.org/ay cheqanwa Internetan jikjjatasma. Akhamanakatwa yanaptʼasma (markaman kunjamächiy ukarjama).

JAN KUN MAYIS CHURAÑA

Banco toqe, tarjeta de débito jan ukajj tarjeta de crédito toqe, jan ukajj yaqha ukhamanak toqew qollqejj sucursalar apayasispa. Yaqhep sucursalajj Internetan jw.org toqe, jan ukajj yaqha ukham cheqanak toqew katoqaraki.
Qollqe, joyanaka, jan ukajj yaqha ukham yänakwa churasma. Ukatsti, ‘janiw kuns maykäti’ sasinwa mä cartampi apayañamaraki.

MÄ AMTAMPI CHURAÑA

Qollqe churasintï qhepat mayisiñ munjjäta ukhajja, kuttʼayatäjjasmawa.
‘Qollqe churatajat munä ukhajj kuttʼayjjapjjetätawa’ sasin mä cartanwa qhanañchtʼañama.

SUM AMUYTʼASISAW CHURASIÑAPA

Diosan Reinopat oraqpachan yatiyasiñapatakejja, kunjamanakatsa yanaptʼaraksna uk jichhajj uñjañäni. Ukanakat kawkïrimpiy yanaptʼañ munsta uk janïr lurkasajja, markaman utjki uka sucursal sarayirinakampiw parltʼañama. Leyinakasa impuestonakasa janiw taqe markan kikpäkiti, ukatwa sum amuytʼasiñatakejj uka toqet yatjjattʼatanakampi yanaptʼayasiñama.

Seguronaka, jubilacionanaka: Seguro de vida, fondo de jubilación, jan ukajj plan de jubilación sasin uñtʼatäki ukanakjja, Jehová Diosan Testigonakapan sucursalaparuw katuyjjasma.

Bancor qollqe imasitama: ‘Bancon imat qollqjja, jiwjjä ukhajj Jehová Diosan Testigonakapan sucursalaparuw churasjjani’ sasaw banconakatak leyejj utjki ukarjam qhanañchasispa.

Accionanaka, bononaka: Ukanakjja, Jehová Diosan Testigonakapan sucursalaparuw jan kun mayisak churasma, jan ukajj uka sutjjaruw mä contrato lurasma, ukhamat jiwjjasma ukhajj uka qollqe jupanakan irtjjapjjañapataki.

Utanaka, oraqenaka: Kunatï aljañjamäki ukanakjja, Jehová Diosan Testigonakapan sucursalaparuw jan kun mayisak churasma. Mä utächejja, jiwañkam ukan utjasiñatakiw mayirakisma.

Testamentonaka fideicomisonaka: Utsa, oraqsa jan ukajj qollqsa, Jehová Diosan Testigonakapan sucursalaparuw notario nayraqatan mä testamento lurasa churjjasma, jan ukajj fideicomiso contratsa sucursalan sutiparuw jupanakan katoqañapatak jaytarakisma. Ukham lurasajja impuesto pagañatsa iraqtʼapjjeristamwa.

“Sum amuytʼasisaw churasiñapa” siski ukarjamajja, kun churañatakis maynejj sum amuytʼasiñapawa. Jehová Diosan Testigonakapajj oraqpachan yatiyasipki ukar yanaptʼañ munirinakatakejja, Donaciones planificadas para favorecer el servicio del Reino en todo el mundo sat folletow wakichasi, uka folletojj español, inglés arunakanwa utji. Jichhasa, jutïrinsa kunjamanakatsa qollqessa jan ukajj cosasanakassa chursna ukaw uka folleton qhanañchasi. Kunatï qhanañchaski ukajj inas taqpachapunejj jan yanaptʼkchistaniti. Kunattejj leyinakas impuestonakas sapa markan mayj mayjawa. Ukham donacionanak churasaw waljanejj Diosan Reinoparusa, kuna jan waltʼäwinakatï utjki ukanakarus yanaptʼapjjaraki. Ukham churasajja, impuestonak pagañatsa iraqtʼatäpjjarakiwa. Uka folletotï markaman utjchejja, congregacionamankir secretario jilataruw mayisma.

Jukʼampi yatjjatañatakejja, Internetankir jw.org/ay cheqaruw “Donacionampi yanaptʼañataki” siski ukar mantasma, jan ukajj markamankir sucursalaruw jawsasma.