¿Yatiyätati?

Uñisirinakap nayraqatanjja, ¿kunatsa Estebanajj jan ajjsarayaskäna?

ESTEBANAJJ Sanedrinankir 71 juezanak nayraqatankaskiwa, uka jachʼa tribunalankir chachanakajj Israel markan wali munañanïpjjewa, Estebanar wal uñisipjjaraki. Juparojj Caifás sat jachʼa jilïr sacerdotew tribunalar jawsayäna, uka sacerdoterakiw Jesusar jiwayañatakejj pʼeqtʼäna (Mat. 26:57, 59; Hech. 6:8-12). Kʼari testigonakajj may mayaw uñsti. Sanedrinankir jaqenakajja, Estebanar uñkatasajj mä angelan ajanupäkaspas ukhamwa uñjapjje (Hech. 6:13-15).

Uñisirinakap nayraqatankkasajj ¿kunatsa Estebanajj jan ajjsarayaskpachäna? Sanedrinar janïr apatäkasajja, Diosan espiritupan yanaptʼatäsajj taqe chuymaw Estebanajj congregacionan serviskäna (Hech. 6:3-7). Tribunalankkäna ukhajja, uka espiriturakiw chuymachtʼäna taqe kunsa amtayarakïna (Juan 14:16, nota). Cheqas tribunalan juchañchatäskäna ukhajja, espíritu santow Hebreo Arut Qellqatanakat niya pä tunka textonak amtayäna. Estebanajj kunjamsa tribunalan arsusïna ukajj Hechos capítulo 7 ukan qellqatawa (Juan 14:26). Ukampis Jesusarojj Diosan kupëjjapan saytʼata mä visionan uñjäna ukhajja, Estebanajj jukʼampiw Diosar confiyäna (Hech. 7:54-56, 59, 60).

Inas mä urojj Esteban chachjam ajjsarayata, jan waltʼayañatak arknaqata uñjaschiñäni (Juan 15:20). Ukampis jiwasatï Diosan Arup sapüru liyiñäni, taqe chuyma yatiyañäni ukhajja, Diosan espíritu santopajj yanaptʼistaniwa. Jan waltʼäwinakar saykatañatakisa jan sint llakisiñatakis chʼam katoqarakiñäniwa (1 Ped. 4:12-14).