KUNJAMSA UÑISISIÑAR ATIPJASISPA

3 | Uñisisiñ pʼeqemat apsuñamawa

Bibliajj akham siwa:

“Amuyunakam machaqar tukuyapjjam, ukhamat machaqar tukupjjañamataki, ukhamatwa jumanak pachpajj Diosan munañap yatipjjäta. Diosan munañapajj sumawa, perfectowa, jupan chuymapsa kusisiyarakiwa” (ROMANOS 12:2).

¿Kamsañsa muni?

Kuntï amuyktan ukajj Diosatakejj importantewa (Jeremías 17:10). Kuntï sisktan kuntï lurktan ukat amuyasiñasawa, ukampis janiw ukak lurañasäkiti. Uñisisiñajja, amuyusana chuymasanwa qallti. Ukhamajj chuymasana, amuyusana uñisisiñajj utjchi ukhajj apsuñasawa. Ukhamatakwa amuyus ‘machaqar tukuysna’ uñisisiñsa chuymasat apssna.

Akwa lurasma:

Kunjamsa yaqha markatäpki, yaqha kasta jañchinïpki ukanakarojj uñjta uk juma pachpaw amuytʼasiñama. Akham jisktʼasim: ‘¿Kunjamsa jupanakar uñjta? ¿Kuntï nayajj yatkta ukarjamakit jupanakar uñjta? ¿Yaqhachasiñampich apayasta?’ sasa. Internetansa peliculanakansa, uñisisiñanaka nuwasiñanaka utjki ukanak janiw uñchʼukiñamäkiti, ni liyiñamäkisa.

Diosan Arupaw uñisisiña chuymasat amuyusat apsuñatakejj yanaptʼistaspa.

Kunsa amuytan kunjamätansa uk jiwas pachpat amuyañajj chʼamakiwa. Ukampis kunanaktï chuymasan amuyktan munkaraktan ukanak amuyañatakejj Diosan Arupaw yanaptʼistaspa (Hebreos 4:12). Ukhamajj Bibliat yatjjataskakim. Ukatjja, kuntï Bibliajj yatichki kuntï jumajj amuykta ukamp igualtʼayam. Ukatsti kuntï Bibliajj siski ukarjam lurañatak chʼamachasim. Diosan Arupajja “torrenakar uñtat wali suma saytʼatäki” uka uñisiñ amuyusata chuymasat apsuñatakiw yanaptʼistaspa (2 Corintios 10:4, 5).

Experiencia (STEPHEN)

Janiw nayrjam amuyjjänti

Stephen chachasa familiapasa, janqʼo jañchini jaqenakamp uñisitaw uñjasipjjäna. Ukatwa jaqenakan derechonakap arjjatiri politiconakamp mayachasiñ qalltäna. Tiempompejja jupa pachpaw uñisisiñat jan walinak lurjjäna. Jupajj akham siwa: “Estados Unidos markankirinakajj África cheqat jutirinakar wal tʼaqhesiyapki uka peliculanak uñtiriw amigonakajamp sarapjjerïta. Uk uñjasajja, janqʼo jañchini waynanakaruw ukan nuwjapjjayäta, ukat kawkhantï janqʼo jañchininakajj jakapki, ukawjanakaruw nuwjir sarapjjerïta” sasa.

Stephen chachajj Jehová Diosan Testigonakapamp Bibliat yateqañ qalltjjäna ukhaw nayrjam jan amuyjjänti. Jupajj akham siwa: “Niyakejjay yaqha kasta jañchini jaqenakar uñisirïchiyätjja, kuntï Jehová Diosan Testigonakap taypin uñjkäyät ukajj wal muspharayitäna. Sañäni, janqʼo jañchini mä Testigojj yaqha markaru viajiñatakejja, chʼiyar jañchini mä Testigo familiaruw wawanakap uñjañapataki jaytawayäna. Yaqhajja, mä janqʼo jañchini familiajj chʼiyar jañchini mä waynaruw utapan jakasiñapataki jawstʼapjjäna” sasa. Jesusajj munasiri cheqpach cristianonakan utjañapat parlkäna ukajj Jehová Diosan Testigonakap taypin utjatapwa Stephen chachajj amuyäna (Juan 13:35).

¿Kunas Stephen chacharojj uñisiña nuwasiña apanukuñatak yanaptʼäna? Juparojj Romanos 12:2 textow yanaptʼäna. Stephen chachajj akham siwa: “Bibliat yatjjatasajja, nayra jakäwejj jaytañ wakisitap amuyta. Janiw qhoru jaqëñ munjjayätti, ukatakejj chuymatpach mayninakar munasiñatakiw chʼamachasiñajäna” sasa. Stephen chachajj 40 maranakaw jan khitir uñisisa jakjje.