Revista katuqasirinakar Bibliat yatichapxañäni
1. ¿Kuna amtampis revistanakampi yatiyir sartanxa?
1 Sabadonakaxa La Atalaya ukat ¡Despertad! revistanakampiw yatiyir sartanxa. Ukampis ukax qalltakïskiwa, kunattix taqi chuyma Bibliat yatiqañ munirinakar yanaptʼañwa muntanxa. Ukat kunjamsa wasitat kuttʼasin Kunsa yatichi sat libro jaytsna ukat kunjamsa uka librompix Bibliat yatichsna, ukatakiw akxarükis uka yanaptʼaxa. Kawkjantï yatiyasktan ukarjamaw aka yanaptʼanakampix parltʼsna, ukat arusarjamarakiw arstʼaraksna, jan ukax yaqha yanaptʼanakatsa arstʼarakismawa.
2. Kunsa yatichi sat libron qallta jananakapampixa, ¿kunjamsa Bibliat yatichañ qalltsna?
2 Qallta jananakat yatichañäni. Kuttʼasaxa akhamwa sisna: “Jaytawayksma uka revistanakax Bibliat apstʼatawa. Kunatsa Biblia liyiñax wali wakisirïpacha uk akan uñxatañäni”. Isaías 48:17, 18; Juan 17:3 uka qillqatanakwa liytʼsna, jan ukax yaqha jiskʼa tʼaqsa liytʼaraksnawa. Ukat Kunsa yatichi sat librot parltʼasin uka libro churasaxa, akham saraksnawa:
◼ “Bibliaxa wali suma jakäwiw jutïr urun utjani sistuwa.” Ukatxa 4, 5 jananak uñxattʼayasaxa akham jisktʼañasawa: “Akan utjki ukanakatxa, ¿kawkïr phuqasiñapsa munasma?” sasa. Ukat kamschiniy ukarjamaw librot thaqtañasa, ukat istʼirjamäskchi ukaxa mä tʼaqatsa jan ukax pä tʼaqatsa parltʼaraksnawa.
◼ Jan ukax akhamsa saraksnawa: “Jakäwisat wali wakiskir jisktʼäwinakarux Bibliaw sum qhanañchistu”. Ukatxa 6 jana jistʼarasaxa aka jisktʼanak jisktʼasirïtati sasaw saraksna. Kawkïr jalja uñxattʼayañaxay wakischini uka jaljatwa mä tʼaqsa jan ukax pä tʼaqsa uñxattʼayaraksna.
◼ Jan ukaxa, “Akanakaniwa” siski ukawjat walja jaljanak uñxattʼayasaxa, kawkïritsa yatxatañ munasma sasaw jisktʼaraksna. Kawkïr jaljatxay yatxatañ munchini uka jalja thaqtasaxa, kunjamsa Bibliat yatiqaspa ukwa mä jukʼa yatichtʼaraksna.
3. Jaytktan uka revistax 1) akapach jan waltʼäwinakata 2) familiata 3) Bibliax atiniskañaw sasa, parlaspa ukhaxa, ¿kunjamsa Bibliat yatichañ qalltsna?
3 Maynimpi parltʼasaxa kuttʼañatakix mä jisktʼwa jaytañasa. Jukʼampi yatxatañ munañapatakixa qalltatpachwa wakichtʼawayaraksna. Revistanak katuqasini ukhaxa, mä jisktʼwa jisktʼañasa, ukatxa, mayanwa uka jisktʼar qhanañchtʼäma sañasarakiwa. Ukatxa kunürus kuttʼañäni uka tuqitsa parltʼañasarakiwa ukat arsutasarux phuqañasarakiwa (Mat. 5:37). Kuttʼasaxa, kuna jisktʼat parlapxañamänsa uk amtayäta, ukat Kunsa yatichi sat librot mä tʼaqa jan ukax pä tʼaqa liytʼasax mä jukʼa qhanañchtʼäta. Ukat yatiqañapatakix mä libro churarakïta. Akham jisktʼanakampiw parltʼsna:
◼ Revistatï akapachan jan waltʼäwinakat parlchi ukaxa, akhamwa sisna: “¿Kunanaksa Diosax aka Uraqin lurpachäni uk yattati? Mayan kuttʼanisawa uka jisktʼar Bibliampi qhanañchtʼäma” sasa. Ukat mayan kuttʼasaxa 4 ukat 5 jananakatwa parltʼsna. Inas akham jisktʼaraksna: “¿Diosan munañapäpachati chijinakar puriñaxa?” sasa. Mayan kuttʼasaxa, nayrïr jaljan 7 ukat 8 tʼaqanakap uñachtʼaysna.
◼ Revistatï familiat parlchi ukaxa, janïr sarxkasax akham jisktʼsna: “Familian kusisit jakasiñatakixa, ¿kunjamsa sapa maynix yanaptʼsna?”. Ukat mayan kuttʼasaxa, 14 jaljan 4 tʼaqapat yatxatapxañäni.
◼ Revistatï Bibliax atiniskañawa sas parlchi ukaxa, aka jisktʼwa jaytawaysna: “¿Ciencia tuqit Bibliax chiqti parlpacha?” sasa. Wasitat kuttʼasaxa päyir jaljan 8 tʼaqapat parltʼañasa.
4. ¿Kunsa yatichi sat libro jan munkani ukhax kamachsnasa?
4 Sapa kuti parlañ tukuyxasaxa mä jisktʼwa mayan qhanañchtʼañataki jaytañasa. Sapa kuti Bibliat yatichxañäni ukhaxa, librotxa qalltat tukuykamaw jukʼat jukʼat yatichañasa. ¿Kunsa yatichi sat libro jan munkani ukasti? Revistanakxa apaskaksnawa ukat Bibliatsa parltʼaskakiñasawa. Ukham lurañäni ukaxa inas tiempompix mä Bibliat yatiqirixchispa.
5. Janiw revistanak mayak jaytañasäkiti, ¿kunatsa?
5 La Atalaya ukat ¡Despertad! sat revistanakaxa kuntix Bibliax chiqpachapuni yatichki uk yatiqapxañapatakiw chʼamañchaspa. Ukhamaxa, khitinakatï revistanak katuqasipki ukanakaru Bibliat yatichañatakix chʼamachasisipkakiñäni. Ukhamatwa, Jesusan ‘arkir tukuyapxam’ ukat ‘yatichapxarakim’ siski uka arunakaparux istʼaskañäni (Mat. 28:19, 20).