Yatiyir sarasax kunjamsa tiempom uñjaskta
1 Walja lurañaw utjaski, ukhamarusa jukʼa tiempokiw utjxistu (Juan 4:35; 1 Cor. 7:29). Ukampis sum waktʼayasiñäni ukhaxa, yatiyir sarasaxa janiw inamayaru tiempos aptʼkañäniti.
2 Wakichasipxañäni. Yatiyir mistsuñataki tantachäwiru janïr sarkasaxa, kuna qillqatampis yatiyäta uk apasiñamawa, ukat kunjamsa uka qillqatampix parltʼäta uksa yatsuwayañamawa. Uka tantachäwin Diosat maytʼäwi tukuyxani ukhaxa, jankʼakiw yatiyirix sarxañama. Ukhamatwa jumasa ukat jumamp chika saririnakasa tiemp jan ina chʼusar aptʼapkaniti.
3 Yatiyir mistsuñataki tantachäwin jum yatichsta ukhaxa, horasaparuw qalltañama, 10-15 minutonakakiw mä qhawqha arunakamp parltʼañama. Janïr jilat kullakanakax yatiyir mistkipanxa, khitimp khitimpis sarani ukat kawki chiqanakarus yatiyir sarapxani ukxa taqiniw yatisipxañapa.
4 Yatiykasa. Yatiyir mistsuñataki tantachäwi tukuyxasaxa jan inamay kun lurasas tiempo aptʼamti; jan ukasti jankʼakiw yatiyir sarañama. Waljani sarapxsta ukhaxa, jilat kullakanakamat amtasipunïtawa, inas jupanakax jumar suyasipkstam jankʼak parlañ tukuyxaspa sasa. Mayan kuttʼañatakiw uka jaqimpix parltʼaniwayañama, ukat jiskhisiñak munaskchi ukhaxa wali amuytʼampiw jaytaniwayañama, ukham jilat kullakanakam layku lurañax wali askïspawa (Mat. 10:11).
5 Yatxatañ munirinakan utapar kuttʼañ munasaxa, janiw jaya chiqanakar sarasax inamayak tiemp aptʼañamäkiti, jan ukasti, uka jakʼankki ukanakarukiw sarañama. Awisaxa, utankaskaniti janich uk yatiñatakixa telefonot jawsañaw wakisispa (Pro. 21:5). Ukat jaya tiemp parlapxäta ukhaxa, mayni jilat kullakanakarux yatiyañamawa.
6 Walja apthapiñ cosech tiempon jakasktanxa (Mat. 9:37, 38). Niyaw uka luräwisax tukusxani. Ukatwa yatiyir sarasax jan inamayar tiempo aptʼañasäkiti.