Yatiyir mistuñatak tantachäwinaka

1. ¿Yatiyir sarañatakix kunatsa waktʼayatarjam sarañasa?

¹ Jesusaxa yatiyañatakix wali sum wakichtʼäna, ukat ukarjamaw lurarakïna. Uraqpachanwa tama sarayir jilatanakax Jesusat yatiqasisaw kawkhanakans yatiyasini uk wakichtʼapxi. Ukatwa sapa taman gruponakax yatiyir mistuñatak tantachäwinak wakichapxi (Mat. 24:45-47, MT; 25:21; Luc. 10:1-7).

2. ¿Kunjamäñapas yatiyir sarañatak tantachäwinakaxa?

² Mä suma wakichäwi: Yatiyir mistuñatak tantachäwinakax yatiyir saririnakar chʼamañchañataki ukat yatichañataki uka amtampi wakichatawa. Examinando las escrituras diariamente sat qillqatan yatichäwipax yatiyir mistuñatañak askïchi ukhaxa yatxattʼasispawa. Awisaxa, Diosan Apnaqäwipat Yatiyañataki jan ukax Razonamiento ukat Benefíciese uka qillqatanakan utjki uka iwxtʼanakatwa yatxatasirakispa. Mä qillqat jaytañatakix inas mä demostración uñachtʼayañax wakischispa. Uka tantachäw Diosat mayisïwimpi janïr tukuykasaxa, khitimpis irnaqani ukat kawki chiqarus yatiyir sarapxani uk taqiniw sum yatipxañapa. Uka tantachäwi tukuyasax taqiniw yatiyir sarapxañapa, ukat uka tantachäwix tunka phisqhani minutot janiw jiläñapäkiti.

3. ¿Yatiyir mistuñatak tantachäwinakxa khitinakas sarayapxañapa?

³ Khitinakas wakichapxi. Yatiyañ tuqit irpir chuyman jilataw uka tantachäwi nayrar sarantayañapa. Semana tukuya urunakaxa, grup uñjiri jilatanaka ukat grup uñjirin yanapiripasa tamapampi chika yatiyirix mistupxañapapuniwa ukat kawki chiqanakansa yatiyapxani uksa sum uñjapxañapawa, kunjamtï Yatiyañ tuqit irpir chuymani jilatax waktʼayki ukhamarjama. Ukat yaqha urunakax mä irpir chuymanisa jan ukax irpir chuymanin yanapiripasa grup irpsurakispawa, Yatiyañ tuqit irpir chuymani jilataw yatiyañ tuqit sum uñjañapa ukat kawki chiqanakans yatiyasiñapa ukanaksa uñjañaparakiwa.

4-6. 1) Yatiyir mistuñatak tantachäwinak lurañatakixa, ¿kunatsa tantachasiñ utanakax yatiykañäni uka jakʼankañapa? 2) Yatiyir mistuñataki tantachäwinakax kawkins apasini uk waktʼayañatakixa, ¿kunas yanaptʼätamxa?

⁴ Kawkhansa ukat kuna horasarus uka tantachäwix apasiñapa. Yatiyaski uka chiqanak tamanakax sum yatiyapxañapatakixa, yatiyir mistuñataki tantachäwinak sum wakichtʼañaw wakisi, ukatakix mä lugaranak tantachasiñat sipansa inas jilat kullakanakan utanakapan tantachasiñax wakischini, ukampis uka utax kawkhantï tamax yatiykani uka jakʼankañapawa. Tantachasiñ Utansa tantachasipxarakispawa. Taqinitak arstʼäwi ukat Yatiyañataki revistat yatxatañataki tantachäwi tukuyasaw yaqhip tamanakax yatiyir sarañatak tantachäwi lurañ yatipxi. Ukampis yatiyir sarkañäni uka lugaratxa janiw jayankañapäkiti. Kawki chiqantï tamax yatiykani uka chiqanak taqpach yatiyañatakixa, Irpir chuymaninakat pʼiqtʼirinakaw sapa kuti sum uñakipapxarakispa.

⁵ Kuna horasarus yatiyañatak tantachäwix apasiñapa ukatak inas mä urun pä kutis yatiyir sarañatak tantachasiñax wakischini ukanak tamax kawki chiqanakans yatiyi ukarjam wakichasiñapawa. Kawkhansa ukat kunjamsa yatiyir sarañatak tantachäwix apasiñapa uk amtañatakix aka jisktʼanakaw yanaptʼätamxa.

⁶ ¿Kawki chiqanakas jukʼamppach yatiyasiñapa? ¿Kuna horasas utat uta yatiyañax askïspa? ¿Utat uta yatiyañatakis jan ukax wasitat kuttʼañatakis jaypʼutak waktʼayañax wakisispati? Kuna horasas yatiyir sarañatak tantachäwix apasini uk wakichtʼasaxa tableroruw uchasiñapa. Taqi yatiyirinakax kawkhantï yatiyañasäki uka chiqanak taqpach yatiyasaxa Pabljamarakiw sañäni: “luräwixxa akawjanxa tukuyxtwa” sasa, ¿ukham lurañax wali askïspaxaya? (Rom. 15:23.)

7. ¿Yatiyir mistuñatak tantachäwi sarayir jilatax kunanaks phuqañapa?

⁷ Kunjamsa uka tantachäwix apasiñapa. Uka tantachäwi sarayañatak wali sum wakichtʼastan ukhaxa Jehová Diosan kamachinakapar respetatas uñachtʼaytanxa. Tam irpskani uka jilatax uka tantachäwi janïr qalltkasaxa kawki chiqanakas yatiyasini uk sum yatxañapawa. Uka tantachäwix suma iwxtʼanakanïñapawa ukat horasaparuw qalltañapa, ukatxa tunka jan ukax tunka phisqani minutonakakïñapawa. Tantachäwi tukuyasax kawkhantï yatiyaskani ukar sarapxañapawa. Qhiptʼirinakar suyañax janiw wakiskaspati, ukampis kawkhansa yatiyasipkani uk qhiptʼirinakan yatipxañapatakixa mä yatiyäwi jaytañaw wakisispa. Uka tantachäwix wali sum waktʼayatächi ukat suma iwxtʼanakanïchi ukhaxa taqiniw kunjams yatiyapxañapa uk yatipxarakini (Pro. 11:14).

8. Yatiyir mistuñatak tantachäwi irpir jilataruxa, ¿kunjamats yanaptʼsna?

⁸ Yanaptʼirïñasawa. Yanaptʼirïñax wali wakiskiriwa (Heb. 13:17). Kawkïr jilat kullakarus yanaptʼañax wakisi ukxa yatiyir mistuñatak irpir jilataw sum uñjañapa. Wali yatxattʼatäpki uka jilat kullakaw jichhak mistupki ukat jukʼak yatipki ukanakar yanaptʼapxaspa. Ukat maynimp maynimp yatiyir sarañaxa maynirux yanaptʼarakiwa (Pro. 27:17; Rom. 15:1, 2). Horasar puriñatakix taqiniw chʼamachasiñasa. Ukham lurasax Jehová Diosan kamachinakaparu ukat jilat kullakanakar respeto uñachtʼaytanxa, ukaw tantachäwinakar horasapar purirïñatakix chʼamachistani (2 Cor. 6:3, 4; Fili. 2:4).

9. ¿Yatiyir mistuñatak tantachäwinakan precursoranakax kunjams yanaptʼapxi?

⁹ Precursoranakan yanaptʼapa. Precursoranakax uka tantachäwinakar yanaptʼapxi ukhaxa jilat kullakanakax kusisipxiwa ukat chʼamañchtʼatäpxarakiwa. Chiqpachansa, precursoranakax walja lurañanakanïpxiwa, kunattix Bibliat yatiqirinakaru yatichapxañapa, jukʼamp yatiqañ munirinakan ukar wasitat kuttʼapxañapa, familiap uñjapxañapa ukat irnaqiris sarapxañaparakiwa. Ukhamaxa, semanan sapüru yatiyir mistuñatak tantachäwix wakichatäki ukarux janiw taqpach tantachäwir sarañapatak mayksnati. Ukampis semanan inas mä qhawqha kuti uka tantachäwir sarapxchini. Yatiyir mistuñatak tantachäwinakax mä escueläkaspas ukhamawa, ukanwa precursoranakax Bibliat sum yatipxatapatsa experiencianïpxatapats mayni jilat kullakanakar chʼamachtʼapxaraki. Walja tiempo yatiyir mistusax precursoranakaxa wali yatxattʼatäpxiwa. Mayninakarus yatichtʼapxarakispawa. Taqi chuym yatiyir sarasa ukat yatiyir mistuñatak tantachäwir sarapxatapasa mayninakan yatiqaskañawa, ukatwa jupanakan yanaptʼap wal yuspärtanxa.

10. ¿Yatiyir sarañatak tantachäwinakarux kunatsa taqi chuym yanaptʼañasa?

¹⁰ Kunjamtï Jesusas arkirinakapas yatiyir sarapkänxa, ukhamarakiw jiwasax utat uta jukʼamppach yatiyir sartanxa. Ukat yatiyir sarañatak tantachäwinakax maynit maynikam yanaptʼasiñasatakiwa, ukhamatwa yatiyañatakis wali sum wakichtʼatarakïñäni. Ukhamaxa, waktʼayatäki ukarjamaw sapa maynix yatiyir mistuñatak tantachäwinakan yanaptʼañasa, ukhamatwa Diosan kamachinakapar respetatassa uñachtʼayarakiñäni (Hech. 5:42; 20:20). Ukhamax tantachäwinakar taqi chuym yanaptʼañatak chʼamachtʼasiskakiñäni, ukham lurasaxa, ¿kuna askinaks jikxatañäni? Yatiyañatak chʼamachasitasarux Jehová Diosaw bendisiskani ukat Jesucristo pʼiqtʼirisas kusisirakiniwa (Mat. 25:34-40; 28:19, 20).