Yatichañatakix sum wakichtʼasiñäni
1. Bibliat yatichkasaxa, ¿kunatsa yatiqirin chuymapar purtʼañatak chʼamachasiñasäspa?
1 Yatiqiriru Bibliat yatichkasaxa, chuymapar purtʼañatakisa ukat Jehová Diosar taqi chuyma luqtañapatakisa sum wakichtʼasiñasawa. Kuntï yatichkañäni ukax jan inamayäñapatakixa, yatiqirix Biblian yatichäwinakapar munasiñapatakiw yanaptʼañasa; munasiñapatï utjanixa ukarjam sarnaqañwa munarakini (Deu. 6:5; Pro. 4:23; 1 Cor. 9:26). Ukham lurañapatakixa, ¿kun lurañasäspasa?
2. Yatiqirir yatichañatak wakichtʼaskasaxa, ¿kunatsa Diosat mayisiñasa?
2 Wakichtʼaskasax Diosat mayisiñasawa. Chiqa yatichäwinakxa Jehová Diosaw yatiqirin chuymapan jiltayaskani, ukatwa yatichañatak wakichtʼaskasax Diosat mayisiñasa, yatiqiritakix kuna yanaptʼas wakisi ukanaksa mayiraksnawa (1 Cor. 3:6; Sant. 1:5). Ukham lurañax yatiqirin chuymapar chiqpach yatichäwinakampi purtʼañataki ukat Diosan munañap yatichañatakiw yanaptʼistani (Col. 1:9, 10).
3. ¿Sapa yatiqiritakjam wakichtʼasiñax kunjamsa yanaptʼistu?
3 Yatiqiritakjam wakichtʼasiñasawa. Chuymar purtʼkir yatichañatakixa, istʼirinakatakjam arstʼañaw wakisi uk Jesusax sum yatïna. Amtañäni, pä kutiw aka tuqit jisktʼapxäna: “¿kuna lurañaxas wakisi wiñay jakañ katuqañaxatakixa?” sasa. Jesusax sapa maynitakjamaw qhanañchtʼäna (Luc. 10:25- 28; 18:18-20). Ukhamasti, yatichir sarañatakixa yatiqiritakjam wakichtʼasiñasawa. ¿Bibliat apstʼat kawkïri jiskʼa tʼaqanaksa liytʼarapiñäni? ¿Qhawqsa yatichañäni? ¿Kuna yatichäwit amuyañas yatiqañas jupatakix chʼamäspa? Ukanakat amuykiptʼañasawa. Kunanakatsa jisktʼistaspa uk amuyañäni ukhaxa, jisktʼanakapar qhanañchañatakix wakichtʼatäñäniwa.
4. ¿Kunjam wakichtʼasiñasäspasa?
4 Yatichañatakix sum wakichtʼasiñasawa. Kuntï yatichkañäni ukanak walja kutis yatiqawaystanxa, yatiqirisax jichhaw ukanak yatiqaskani. Yatiqirin chuymapar purtʼañ munstan ukhaxa, sapa kuti yatichañatakix wakichtʼasiñasawa. Ukhamaxa, wakichtʼaskasax Bibliat apstʼat jiskʼa tʼaqanakxa liytʼañasawa ukat kawkïri yatichäwis wali askïspa yatiqirisatakix uksa marktʼasiraksnawa, ukhamatwa yatiqirirux ukham wakichtʼasim sarakiñäni. Yatiqirisatakjam wakichtʼasiñasax wali wakiskiripuniwa (Rom. 2:21, 22).
5. Jehová Diosat yatiqasisaxa, ¿kunjamsa Bibliat yatiqiriru munasiñ uñachtʼaysna?
5 Bibliat yatiqirin nayrar sarantañapatakix Jehova Diosax yanaptʼiwa (2 Ped. 3:9). Sapa yatiqiritakjam sum wakichtʼasiñäni ukhaxa, kunjamtï Diosax munaskistu uka munasiñ uñachtʼayarakiñäniwa.