2010 marataki mä uru jachʼa tantachäwi
1. 1) ¿Bibliat kawkïr tʼaqanakats pasir mä uru jachʼa tantachäwinakan pʼiqiñchäwinakapax apstʼasiwayäna? 2) ¿Pasïr mä uru jachʼa tantachäwinakat kawkïris Diosar luqtäwiman wal yanaptʼawaytamxa?
1 “Jiwasax ñiqʼïtanwa, Jehová Diosaw Luririsaxa”, “Kuna lurañtï Tatitux churktam uk sum phuqaskakma” (Isa. 64:8; Col. 4:17). Ukanakatwa pasïr mä uru jachʼa tantachäwinakan qhanañchasiwayäna. Niyaw 2010 marataki mä uru jachʼa tantachäwix purinini, pʼiqinchäwipax 1 Corintios 7:29 qillqatat apsutäniwa ukanxa tiempox niya tukusiñampïtapatwa qhanañchasini. ¿Taqinixay sarañ wal muntanxa?
2. ¿Mä uru jachʼa tantachäwi wali kusisit suyañatakix kunanak lurañas wakisispa?
2 Mä uru jachʼa tantachäwix kunürunisa uk tamaman yatiyasxanixa, ukhatpach sarañatakix taqi chuyma wakichasxañama. Ukham lurañatakixa, yaqhip awk taykanakax calendarioruw uka fecha qillqtʼasipxi, tantachäwitakix kunanakas munasini ukanaks qillqtʼasipxi ukat qhawqha urunakakis faltxi ukwa wawanakampix suyapxi. Pasïr mä uru jachʼa tantachäwin kuna tuqinakatsa parlasïna ukanakxa, Familiana Diosar Yupaychañataki Arumaw uka qillqtʼasitanakam uñxattʼapxasma. Ukat Benefíciese sat libron 13-16 jananak uñxattʼañaw jumarusa familiamarus ‘sum istʼapxañamatakix’ yanaptʼapxarakïtamxa (Luc. 8:18).
3. ¿Yatichäwinak jan armasiñataki ukat jan inamayäñapatakis kunanak lurañasasa?
3 Yatiqawayktan ukarjam sarnaqañäni. Jachʼa tantachäwi tukuyipanxa akham arunakax istʼasipuniwa: “¡Wali suma yatichäwipunïnwa!” sasa. Jïsa, wali sumapunïskiwa, kunattix Jehová Diosan mä bendicionapawa ukat ukarakiw wal chʼamañchistu (Pro. 10:22). Kunanaktï yatiqaniwayktan ukanakax jiwasatak wali askïñapatakixa, istʼaniwayktan uka tuqit lupʼiñasawa ukat amxasiñasarakiwa (Luc. 8:15). Ukhamaxa, ¿familiamampisa jilat kullakanakampis utar kuttʼkasin janit uka wakichäwinakat parltʼañax wakiskaspa? Jïsa, kunanak lurañsa amtawayapxta ukat kuna iwxtʼanakas Diosat yatiyir saraskakiñatakix chʼamañchtʼawayapxtam ukanakat parltʼapxañamawa. Ukhamatwa uka yatichäwinakax jukʼamp yanaptʼapxätamxa (Sant. 1:25).
4. ¿Jutïr mä uru jachʼa tantachäwix kunatsa taqinitakix wali askïni?
4 Kuntï munkayätan ukpun regalapxistu ukhax wal kusistanxa, ¿janicha? Ukatwa kunanaktï Jehová Diosax mä uru jachʼa tantachäwin churkistani ukanak wali kusisita suytanxa. Jakäwisanxa kunaymanitwa yanaptʼistani, kunattix Jehová Dios Awkisaw kunanakatï Jupat yatiyir sarañatakix munaski ukanak churistani: yatichistani ukat chuymacharakistaniwa (2 Tim. 4:2; Sant. 1:17).