Diosan Arupasti wali chʼamaniwa
1. Mä uru jachʼa tantachäwejj 2013 maran septiembre phajjsit 2014 agosto phajjsikam apaskani ukajja, ¿kuna pʼeqeñchäwinïnisa, ukat kuna jisktʼanakarus qhanañchasiskani?
1 Jucharar jaqenakan luratanakapat janiw Bibljam wali chʼamanejj utjkaspati. ¿Kunatsa? Kunattejj uka librokiw lupʼïwinakassa ukat luratanakassa Diosan munañaparjama lurañatakejj yanaptʼistaspa. Ukampis Diosan Arunakapajj ¿qawqha chʼamanisa? ¿Kunjamatsa walja askinak apssna? Ukat mayninakar yanaptʼañatakis ¿kunjamanakatsa sum apnaqaraksna? Uka jisktʼanakan qhanañchäwiparojj mä uru jachʼa tantachäwin 2013 maran septiembre phajjsit 2014 agosto phajjsikam apaskani ukanwa qhanañchasiskani, pʼeqeñchäwipajj “Diosan Arupajj wali chʼamaniwa” satawa, ukasti Hebreos 4:12 jiskʼa tʼaqat apstʼatawa.
2. ¿Kuna jisktʼanakarus wakichäwin qhanañchasiskani?
2 Wakiskir jisktʼanaka. Wakichäwi istʼkasajj aka jisktʼanakarojj kunjamsa qhanañchtʼasma uk amuytʼam:
• ¿Kunatsa Jehová Diosan Arupar atinisiñasa? (Sal. 29:4.)
• ¿Kunjamatsa Diosan Arupajj chʼamanïtap jakäwisan uñachtʼaysna? (Sal. 34:8.)
• Diosan wali chʼaman Arupjja, ¿kunjamatsa yatiykasajj wali sum apnaqsna? (2 Tim. 3:16, 17.)
• ¿Kunjamatsa Supayan munañapampi apnaqat akapachampejj jan apayasksna? (1 Juan 5:19.)
• Wayn tawaqo, ¿kunas ajay toqen nayrar sartaskakiñatakejj yanaptʼätam? (Jer. 17:7.)
• Aynachtʼat jikjjataskañäni ukhajja, ¿kunas wali chʼamani tukuyistani? (2 Cor. 12:10.)
• Chuymasan utjki uka wali luräwinaka ukat amtanaka apanukuñatakis chʼamachasiskstanjja, ¿kunas jukʼampi nayrar sartaskakiñatak yanaptʼistaspa? (Efe. 4:23.)
3. Mä uru jachʼa tantachäwin arstʼäwinakap istʼkchiñäni ukhasa, ¿kuna yaqha askinaksa apsuraksna?
3 Ukhamajj aka wakichäwejj walja askinakwa churistani. Ukampis mä uru jachʼa tantachäwinjja, yaqha tamankir walja jilat kullakanakaruw uñtʼañäni ukat maynit maynikamaw chʼamañchtʼasirakiñäni, ukhamarakïniw pä uru ukat kimsa uru jachʼa tantachäwinakansa (Sal. 133:1-3; 2 Cor. 6:11-13). Ukhamajj amigonakasampi parltʼasiñataki ukat yaqhanakar uñtʼañatakis tiempo apstʼasipjjapuniñäni. Ukat jachʼa tantachäwirutï tamanak tumptʼirinakan uñjiripa jan ukajj Betelat mä arstʼir jutkani ukhajja, ¿janit juparus ukat warmiparus arunttʼir sarksna? Cheqas walja toqenakatwa mä uru jachʼa tantachäw suyañatak utjistu.