¿Kunjamsa qhanañchsna?
1. ¿Kunatsa mä jisktʼar qhanañchañatakix Jesusat yatiqasiñasäspa?
1 Jesusax kunjamsa mayninakan jisktʼanakapar wali sum qhanañchirïna, uka tuqit jichhürunakkamaw muspharapxi. Jesusat yatiqasiñax wali wakiskiripuniwa kunattix Diosan Arupat yatiyir sarktan ukhax jaqinakax kunayman tuqit jisktʼapxistu (1 Ped. 2:21).
2. ¿Jisktʼanakar sum qhanañchañatakix kun amuyañasas wakisispa?
2 Nayraqat istʼañasawa. Kuna amtampis jisktʼapxäna uk Jesusax sum amuyäna. ¿Kunjamatsa ukham luraraksna? Kuna amtampis jisktʼapxistu uk sum amuyañatakixa, jisktʼañasaw wakisirakispa. Inas maynix akham jisktʼchistaspa: “Jumanakaxa, ¿Jesusarux iyawsapxtati?” sasa, ukham jisktʼasax kunatsa Navidad fiesta jan lurktan uk yatiñ inas munchi. Maynix kuna tuqits yatiñ muni uk sum amuyañäni ukhaxa Diosan Arupampi amuytʼayañax janiw chʼamäkaniti (Luc. 10:25-37).
3. ¿Kawkinsa Bibliat suma qhanañchäwinak jikxatsna?
3 Bibliampi qhanañchañasawa. Chiqas Bibliampi qhanañchañax wali wakiskiripuniwa (2 Tim. 3:16, 17; Heb. 4:12). Razonamiento librosa ukat Traducción del Nuevo Mundo de las Santas Escrituras ukan “Temas bíblicos para consideración” siski ukasa kawkïr jiskʼa tʼaqsa thaqktan uk jikxatañatakiw yanaptʼistu. Maynix janis Bibliar yäqkani ukhaxa, wali amuyump kuntï Bibliax siski uk qhanañchtʼsnawa. Biblian wakiskir iwxanakapax jichhürunakkamas wali askikïskiwa sasaw amuytʼayaraksna. Jesusat yatiqasisa jisktʼanakar sum qhanañchañäni ukhax arsutasaxa “quri mansanax qullqir kʼiñintatäkixa ukham[äni]wa”, mä arunxa, chuymar purtʼkiri, wali wakiskiri ukat askirakïniwa (Pro. 25:11).
4. ¿Taqi jisktʼanakarupunit qhanañchañasäspa?
4 ¿Qhanañchañasapuniti? Jisktʼatax jan qhanañchañjamäni ukhax akham sañamawa: “Janiw yatkti, ukampis yatxataniwayäwa ukat kuttʼanï” sasa. Qhan arsüta ukat jupar yanaptʼañ munatam uñachtʼayarakïta ukhaxa kuttʼasinkakim siristamwa. Ukampisa sum amuyañamawa, inas maynix Bibliat jan kuns yatiñ munkchiti ukat jiskhisiñatakiki kunanaks parlchi, ukhamäspa ukhax Jesusat yatiqasiñamawa: ukham jaqinakarux janiw kuns qhanañchkänti (Luc. 20:1-8). Ukat maynitix Bibliat jan yatxatañ munkchi ukat jiskhisiñak munarakchi ukhaxa, suma arunakampiw parlañ tukuyxañama ukat khitinakatï Diosan arupat chiqpachapuni yatiqañ munapki ukanakar yatiyiriw sarxañama (Mat. 7:6).
5. Jisktʼanakar qhanañchañatakixa, ¿kunsa Jesusat yatiqawaytanxa?
5 Chiqpachansa, Jesusax “kunatix chiqäki uk yatiyiri” sarañatakisa wakiskir jisktʼanakar sum qhanañchañatakisa Jehová Diosarupuniw atinisïna (Juan 18:37). Ukhamaxa, ¡“Wiñay jakañatak wakichatäpk[i]” ukanakan jisktʼanakapar qhanañchañatakix Jesusat yatiqasiñasawa! (Hech. 13:48.)