Amuytʼasiñapatak yanaptʼañäni

1. ¿Kunas sum yatiyañasatakix yanaptʼistani?

¹ ¿Kunas sum yatiyañasatakix yanaptʼistani: jan amuytʼayas Bibliat chiqak qhanañchañati, jan ukax jupanak pachpa amuytʼasipxañapataki ukat suma amtar puripxañapatak yanaptʼañacha? Aka qhipa amuytʼarjamaw Apóstol Pablox Tesalónica markankir judionakar yanaptʼäna, ukhamatwa “yaqhip judionakax iyawsapxä[na]” (Hech. 17:2-4). Ukampis ukatakixa, ¿kunsa lurañasa?

2. Suma yatiyäwinak yatiykasaxa, ¿kunjamsa Pablot yatiqassna?

² Kuns amuyapxi uk sum amuyañasawa. Jaqinakar amuytʼasiñ yanaptʼañatakixa, kunsa amuyapxi ukwa amuytʼañasa. Apóstol Pabloxa, Areópago chiqankapkäna uka jan iyawsir griegonakaruxa, kunanakarutï jupanakax iyawsapkäna ukat uñtʼapkäna ukanakatwa parlañ qalltäna (Hech. 17:­22-31). Ukhamarusa, yatiyir sarañatak wakichtʼastan ukhaxa, jaqinakax kunanakarus iyawsapxi ukat kunanakas jupanakatakix jan walïki ukanakwa amuytʼañasa (1 Cor. 9:19-22). Inas istʼirisax jiwasamp jan parlañatakix kuns sischistaspa, ukampis kuna tuqitsa parlañ munaspa uk sum amuyañasawa ukat ukarjamaw parlañasaraki.

3. ¿Kunjamsa maynir amuytʼayañatakix sum amuytʼas jisktʼañax yanaptʼistu?

³ Sum amuytʼasapun jisktʼapxañäni. Khititï viajki ukar yanaptʼañatakixa, janitï kawkharus saraski uk jan yatksna ukhaxa, kawkjnämsa sarañapa uk janiw sisksnati. Ukhamarakiwa, ­kunsa istʼirisax amuyi uk jan yatkañänixa, janirakiw jupa pachpa amuytʼasiñapataki ukat mä amtar puriñapatak yanaptʼkañäniti. Jesusaxa, jaqinakar janïr amuytʼaykasax kunsa jupanakax amuyapxi uk yatiñatakiw jisktʼirïna. Amuytʼañataki, maynix akham sasaw jisktʼäna: “¿Kuna lurañaxas ­wakisi wiñay jakañ katuqañaxatakixa?” sasa, janïr uka jisktʼar qhanañchkasaxa, kunsa jupax amuyi ukwa Jesusax nayraqat yatxatäna (Luc. 10:25-28). Mä kutixa, Pedrox jan sum amuytʼasaw mä jisktʼar qhanañchäna, ukampis ukax janiw ukhamäkanti, uk jupa pachpa amuytʼasiñapatakix Jesusax sum amuytʼasaw jisktʼäna (Mat. 17:24-26). Ukhamasti, istʼirinakasatï pantjat amuyunipxani jan ukax pächasis kuns arsupxani ukhaxa, jupanak pachpa amuytʼasipxañapatakix jisktʼañasapuniwa.

4. ¿Kunatsa jupanak pachpa amuytʼasipxañapatak yanaptʼañasa?

⁴ Istʼirinakasaru amuytʼasipxañapatak yanaptʼtan ukhaxa, Suma Yatichiri Jesusata ukat nayrïr suma yatiyir cristianonakatwa yatiqasisktanxa. Ukhamarus respeto uñachtʼayaraktanwa (1 Ped. 3:15). Ukhamatwa jaqinakax jupanakan ukar wasitat kuttʼañasxa munapxarakini.