¡Jankʼaki yatiyapxañäni!
1. Jichhürunakanxa, ¿Pablon kawkïr iwxtʼaparus istʼañasa?
1 Diosan “arunakap [jankʼak] parlam.” (2 Tim. 4:2.) ¿Kunatsa Pablon uka iwxtʼapax jiwasatakix wali wakiskiripunixa? ¿Kunjamatsa jankʼaki yatiyañax yanaptʼistaspa ukat yatiyktan ukanakarus yanaptʼarakispa?
2. ¿Kunatsa suma yatiyäwinak janïr istʼapki ukanakarux jankʼaki yatiyañ muntanxa?
2 Janiw khitin jiwañaps munktanti. Uraqpachanxa, millón millón jaqinakax qhispiyasiñ suma yatiyäwinakxa janïraw istʼapkiti (Rom. 10:13-15; 1 Tim. 4:16). Suma chuyman jaqinakatxa waljaniw kutin kutin yatiyktan uka chiqanakan jakasipxaraki. ¿Kunjamatsa uka jaqinakar yatiysna? Utanakapar yaqha urunakana jan ukax yaqha horasanakan visittʼasa. Ukhamatwa suma yatiyäwinak janïr istʼapki ukanakampix parltʼaraksna. Jankʼak yatiyañäni ukhaxa, chuymasans sumakiw jikxatasiñäni ukat jaqin wilapats janirakiw juchanïkañäniti (Hech. 20:26).
3. Suma yatiyäwinak yatiykasaxa, ¿kunjamsa tiempxa wali amuyump uñjsna?
3 Arknaqata ukat wali uñisitas uñjasipkchïnxa, nayrïr cristianonakax ‘yatichäwinakapampix Jerusalén markpacharuw phuqtʼayapxäna’ (Hech. 5:28). ¿Jupanakjamarakiti ‘suma yatiyäwinak taqinir yatiyañatakix’ taqi chuyma chʼamachasiñäni? (Hech. 10:42, NM.) ¿Yatiyañataki tiempo apstʼasktan ukxa wali amuyumpit uñjasktanxa? Mä qhawqha jilat kullakanakampi chika mä autot sarasin Bibliat yatiqañ munirinakaru wasitat visittʼañ amtstan, ukat revisita lurasipki ukanakar auton suyaskstan ukhaxa, ¿callen sarnaqasipki uka jaqinakarux janit yatiyksna?
4. Jankʼak yatiyañaxa, ¿kunjamsa Diosar yupaychañ tuqit jan ikjañasatakix yanaptʼistu?
4 Amuyasipxañasatakiw yanaptʼistu. Akapachan tukusiñapax wali jakʼankapuniwa, ukatwa Diosar yupaychañ tuqitxa jan ikjañasäkiti, amuyasipxapuniñasawa (1 Tes. 5:1-6). Diosan Apnaqäwipax kuna bendicionanaktï apankani ukanakat parltʼapuniñäni ukhaxa, akapachan kunayman llakinakax utjki uka llakinakampix janiw aynachtʼkañäniti (Luc. 21:34-36). Ukhamarusa, Jehová Diosan jachʼa urupat jan armtʼasiñaw qhispiyasiñ suma yatiyäwinak jukʼampi yatiyañasatakix wiytistani (2 Ped. 3:11, 12).
5. Jakäwir respetatasaw yatiyañatakix wiytistu, ¿kunatsa ukham sistanxa?
5 Jankʼak yatiyktan ukhaxa, Jehová Diosax kunjamtï jakäwxa uñjki ukham uñjataswa uñachtʼayaraktanxa, kunattix Diosax “janiw munkiti khitin chhaqañapsa, jan ukasti muniwa taqininsa” arrepentisiñapa (2 Ped. 3:9; Eze. 33:11). Ukhamasti, Jehová Diosax jachʼañchatäñapatakix yatiyktan uka chiqanakan jaqinakar taqi chuyma yatiyañataki amtapxañäni (Sal. 109:30).