Yuspäratasax qhanäñapawa
Abril 17, Jesusan jiwäwipaw amtasini
1. ¿Salmonak qillqirin kawkïr arunakapas Jesusan jiwäwip amtaskani uka phaxsinakatakix wali askixa?
1 Jehová Diosan walja khuyaptʼayasiñapa ukat qhispiyäwip katuqasaw salmonak qillqirix akham säna: “¿Kunampirak [Jehová] Tatitur phuqhirista, nayatak askinak luratapatsti?” sasa (Sal. 116:12). Jichhürunakanxa, Jehová Diosan luqtirinakapax jukʼampiw yuspärañasa. Kunattix liytʼaniwayktan uka arunak qillqasitap walja maranak qhipatxa, Jehová Diosax wali munat Yuqaparuw jiwasar qhispiyañatak khitanitayna. Ukhamasti, abril phaxsit 17 uru saraqatar Jesusan jiwäwip amtañatak wakichtʼasisawa, uka yuspäratasax qhan amuyasiñap muntanxa (Col. 3:15).
2. ¿Kunanakatsa Jesusan jiwäwipat wal yuspärtanxa?
2 Jesusan jiwäwipampix kuna askinaks katuqtan. Jesusan jiwatap laykuw ‘juchanakasat pampachäwiʼ katuqtanxa (Col. 1:13, 14). Ukatwa Jehová Diosarux qʼuma chuymampi luqttanxa (Heb. 9:13, 14). Jehová Diosar oracionan mayisktan ukhasa jan axsartʼasaw jakʼachastanxa (Heb. 4:14-16). Jesusan jiwäwipar iyawsatas laykurakiw wiñay jakañsa wal suytanxa.
3. ¿Kunjamanakatsa Jehová Diosarux Jesusan jiwäwipat yuspäratas uñachtʼaysna?
3 Yuspäratasax qhanäñapawa. Jesusan jiwäwipat yuspäratasxa, akanak lurasaw uñachtʼaysna: uka urunakatak Biblia liyiñataki mä suma wakichäwix utjki uk liytʼasa ukat uka tuqit lupʼisa. Uk phuqañ yanaptʼañ amtampiwa “¿Wakichtʼatäxtat Jesusan jiwäwip amtañatakixa?” siski uka yatichäwix lurasiwayi (Yatiyañataki abril-junio, 2011). Ukat oración tuqirakiw Jehová Diosar taqi chuyma yuspäratasxa yatiyaraksna (1 Tes. 5:17, 18). Ukatsti Jesusan jiwäwip amtañataki tantachäwir sarasaw yuspäratas uñachtʼaytanxa, uk lurasax Jesusarus istʼaraktanwa (1 Cor. 11:24, 25). Ukatxa, Jehová Diosax munasiñap taqi jaqir uñachtʼayki uk yatiqasisaw jiwasamp chika Jesusan jiwäwip amtapxañapatak qhawqhanirutï invitañjamäki ukatak chʼamachassna, ukhamatwa yuspäratas uñachtʼayaraksna (Isa. 55:1-3).
4. ¿Kunäñapas amtasaxa?
4 Jehová Diosar taqi chuyma luqtirixa, Jesusan jiwäwip amtañatak tantachäwxa janiw aliq tantachäwikïkaspas ukham uñjkiti. Jan ukasti, maran wali wakiskir tantachäwipuniw jupatakixa. Ukhamax uka wakiskir uru jakʼachasinkipanxa, salmonak qillqirjamaw akham amtaraksna: “Taqpach chuymaxampiw [Jehová] Tatitur jachʼañchä, janiw khuyapayasiñapat armaskäti” sasa (Sal. 103:2).