‘Akjja nayat amtasisin lurasipkakim’
Abril 5 uru saraqataruw Jesusan jiwäwipajj amtasini
1. ¿Kunatsa Jesusan jiwäwip amtañajj wali wakiskirejja?
1 ‘Akjja nayat amtasisin lurasipkakim’ (Luc. 22:19). Uka arunakampiw Jesusajj jiwäwip amtapjjañapatakejj arkirinakapar ewjjtʼawayäna. Jesusan jiwäwip toqejj walja bendicionanakaw jikjjatasiwayi, cristianonakatakejj uk amtañajj wali wakiskiriwa. Aka marajj abril 5 uru saraqataruw amtasini. Uka urojj niyaw jakʼachasinki, ukhamajj ¿kunjamatsa Jehová Diosarojj yuspäratas uñachtʼaysna? (Col. 3:15.)
2. ¿Kunjamsa Biblia liyisasa ukat lupʼisasa Jesusan jiwäwip amtañajj wali askit uñjatas uñachtʼaysna?
2 Wakichtʼasipjjañäni. Mä wakiskir uru amtañatakejja, jayäkipanwa maynejj wakichtʼasi. Jesusan jiwäwip amtañatakejj ukhamarakiw chuymas wakichtʼañasa, ¿kunjams uk lursna? kunanakas Jesusan jiwañap jakʼajj pasäna, ukanakatwa familiasamp lupʼipjjsna (Esd. 7:10). Calendariosansa ukat Diosan Arupat sapür yatxatañataki folletonsa, uka urunakajj kunanakas pasäna uka toqenakat Biblia liyiñatakiw waljja tʼaqanak wakichtʼat utji. Ukat Yatiyañataki abril-junio 2011 (23 ukat 24 jananaka) revistansa mä listaw uka toqet utjaraki, ukajja, El hombre más grande librot apstʼatawa.
3. Jesusan jiwäwip amtañajj jiwasatak wali wakiskiritapjja ¿kunjamsa yatiyir sarasajj uñachtʼaysna?
3 Yatiyapjjañäni. Ukat jaqenakar taqe chuyma yatiyasaw Jesusan jiwäwip amtañajj wali wakiskiritap uñachtʼayaraksna (Luc. 6:45). Jichha marajja, marzo 17 uru saraqataruw Jesusan jiwäwip amtañatakejj oraqpachan invitación lakirañajj qalltasini. ¿Uka phajjsinakan jukʼamp irnaqtʼañataki jan ukajj precursor auxiliarjam irnaqtʼañatakis janit wakichtʼaskasma? Uka toqenakatjja Diosar Yupaychañataki aruma sat wakichäwinwa familiamampi parltʼasipjjasma.
4. ¿Jesusan jiwäwip amtañajj kunjams yanaptʼistu?
4 Cheqansa Jesusan jiwäwip sapa mara amtañajj wal yanaptʼistu. Jehová Diosajj munat sapa yoqapwa jiwasanakar qhespiyañatak khitani. Uka toqet amuyañajja, wal chʼamañchistu ukat Jehová Diosarus uk yatisajj jukʼampiw munasiraktanjja (Juan 3:16; 1 Juan 4:9, 10). Ukatsti janiw jiwasatakik jakañ munjjtänti (2 Cor. 5:14, 15). Taqe jaqenak taypinwa Jehová Diosar jachʼañchañ munaraktanjja (Sal. 102:19-21). Diosan serviripjamajja wali yusparasaw abril 5 uru saraqat suyasktanjja. Ukhamajj Jesusan ‘jiwatap yatiyaskakiñajj’ wali askïniwa (1 Cor. 11:26).