Diosan arunakap yatiyañxa wali askitpuni uñjapxañäni
1. Yatiyir saratasatxa, ¿kamsapxis walja jaqinakaxa?
1 Supayan apnaqat akapachanxa, yatiyir saratasax ‘luqhi kankañäkaspasa’ ukat inamayäkaspas ukhamwa waljanix amuyapxi (1 Cor. 1:18-21). Jiwasatï jan sum amuytʼaskañänixa, uka amuyunakampi apayasisaw aynachtʼsna ukat janirakiw taqi chuyma ukat kusisita yatiyir sarxsnati (Pro. 24:10; Isa. 5:20). Ukhamasti, ¿Jehová Diosan Qhanañchiripäsin wali kusista jikxatasiñatakix kuna razonanakas utjistu? (Isa. 43:10.)
2. ¿Kunatsa yatiyir sarañax mä ‘qullan luräwiw’ sasin sissna?
2 Qullan luräwi. Yatiyir saratasax mä ‘qullan luräwiwa’, (NM) sasaw apóstol Pablox säna (Rom. 15:15, 16). ¿Kunatsa ukham sispachänxa? Kunattix yatiyir sarasinxa, Qullan ‘Diosaruw yanaptʼtanxa’ ukat sutips qʼumachañ yanaptʼaraktanwa (1 Cor. 3:9, MT; 1 Ped. 1:15). Ukat Jehová Diosax mä “suma sacrificiot[wa]” yatiyir satasxa uñji, ukatwa Jupar yupaychkasax yatiyir sarañax wali askipunixa (Heb. 13:15).
3. ¿Kunatsa yatiyir sarañax jan kikpani luräwiw sasin sistanxa?
3 Suma yatiyäwinak yatiyir sarañax mä aski churäwipuniwa, ukampis jukʼanikiw uka luräw katuqapxi. Angelanakax uk lurañ munapxarakiwa ukat sumwa phuqapxarakispa (1 Ped. 1:12). Ukampisa, jiwas jucharar jaqinakaruw uka jan kikpani luräw churawayistu (2 Cor. 4:7).
4. Yatiyir sarañax jiwasatak wali askïtapxa, ¿kunjamsa uñachtʼaysna?
4 Nayrankañapawa. Jiwasatï yatir sarañ mä aski churäwjam uñjstanxa, jakäwisanx ‘ukpun nayraqat ajlliñäni’ ukat yatiyir sarañatakis sapa semanaw tiempo apstʼasirakiñäni (Fili. 1:10). Walja markanakan uñtʼata orquestankir musicüksnas ukham amuytʼañäni. Niyakixay ukham orquestankañax wali askïchispaxa, music toctʼir sarañatakix sum wakichtʼassna ukat jukʼamp sum toctʼañ yatsuskaksnawa. Ukhamarakiw yatiyir sarañatakix ‘chiqaparu Tatitun arunakap parlañataki’ wakichtʼastanxa ukat sum yatichañatakis chʼamachasiraktanxa (2 Tim. 2:15; 4:2).
5. ¿Khitinakas yatiyir saratas askirjam uñjapxi?
5 Jaqinakan amuyunakapamp jan aynachtʼapxañäniti. Kawkhantï yatiyktan uka chiqanakanxa, yatiyir saratasat waljaniw yuspärapxi. Yaqhipax janis yuspärapkchixa, jaqinakamp askit uñjatäñ munañat sipansa Jehová Diosampiw wali askit uñjatäñ muntanxa. Ukat kuntï lurktan ukxa Jehová Diosax wali askitwa uñji, janipuniw ukat pächasiñasäkiti (Isa. 52:7).