Jukʼamp sum yatiyañataki: jan istʼañ munirinakarojj ¿kunjamsa parltʼaskaksna?

Kunatsa parltʼaskakiñajj wakisi. Jaqenakar jiwarayir mä jan waltʼäwi niy puriniskataps yatkasma ukham amuytʼañäni. Ukat vecinomar yatiyir sarasma ukhajj “janiw tiemponïkti” siristam ukhajja, ¿kuns lurasma?, ¿ukhamakit sarawayjjasma? Cheqas janiw uk lurksnati. Diosan arunakap yatiyktan ukhajja, ukhamarakwa sapjjestu, kunattejj qhespiyasipjjañapatak yatiyir saraskatas janiw amuyapkiti. Visitʼtktan ukhajj inas llakitäsipkchi (Mat. 24:37-39). Jan ukajj inas jiwasjjat kʼarinak parlir istʼapjjchi (Mat. 11:18, 19). Ukat mayni religionanakjamäpjjpachaw sasin inas amuyapjjarakchi (2 Ped. 2:1, 2). Ukhamajja, utanitï qalltan jan istʼañ munkanejja, janiw ukhamak jaytañasäkiti jan ukasti parltʼañatak chʼamachasiskakiñasawa.

Parltʼaskakiñatakejj kunsa lursna:

• Utat uta yatiyir janïr sarkasajja, kunanaksa jan istʼañ laykojj parlapjje uksa amuytʼañasarakiwa.

• Utanitï jan istʼañ munkani ukhajja, suma arunakamp parlaskakiñatak chʼamachasiñasawa. Amuytʼañataki, “nayajj iglesiar sararaktwa” sistanejja, inas akham sissna: “Walikpun Diosar uñtʼañatak chʼamachasisktajja” sasa. Utanimpi parlaskakiñatakejj respetasirïñajj wali wakiskiriwa. Inas utanejj “janiw tiemponïkti” sischistani, ukham sapjjestanejja, “jan llakisimti, ukampis aka qellqat jaytawayäma” sasaw sissna. Ukat “janiw kuns yatiñ munkti” sapjjestanejja, akhamwa jisktʼaraksna: “¿Bibliatti jan yatiñ munkta, jan ukajj religionanakatcha?” sasa.

• Wali amuyumpiw parltʼañasa. Jehová Diosajj janiw munkir jan munkir arunakap istʼayasiñ munkiti (Deu. 30:19). Sapa mayniw luratanakasat cuenta Diosar churañäni (Gál. 6:5). Ukampis utanitï qhoru arumpi ‘janiw’ sistani ukhajja, sarjjañasakiwa. Ukhamatwa respeto uñachtʼayarakiñäni, ukat mayanakan inas istʼjjchini (1 Ped. 3:15).

Aka phajjsejj ak lurañatak chʼamachasiñäni:

• Jan istʼañ munkistu uka jaqemp parlañ tukuyasajja, kamsañas walïspäna sasaw khitimpitï yatiyasktan ukamp parltʼasiñasa.