¿Jesusan jiwatap amtañatak wakichasisktanti?

Jesusajj qhepa kuti Pascua amtkäna ukajja, wali importantënwa. Niyakejjay jiwañapajj jakʼachasisinkchïnjja, apostolonakapampiw Pascua amtañ munäna, ukatjja Tatitun Cenapa ukat uksar amtapjjañapwa munarakïna. Ukatwa Pedrompir Juanampirojj Pascuatak wakichapjjañap mayïna (Lu 22:7-13; nayrïr paginankir dibujo uñjjattʼäta). Ukajja, kunatsa Jesusan jiwatap amtañatakejj wakichtʼatäñasa ukwa amtayistu. Jichha marajja, 27 de marzo uruw Jesusan jiwatapajj amtasini. Jilïr irpirinakajja, khitis discurso arstʼani, khitinakas tʼantʼampi vinompi pasayapjjani, ukat yaqha ukhamanak wakichjjapjjewa. Ukampis sapa mayni uka urutaki wakichtʼatäñatakejj ¿kunsa lurañasa?

Chuymaswa wakichtʼañasa. Jesusan jiwatapajj amtaskani uka semanajj kawkir textonakatï liytʼasiñapäki ukanak liytʼasajja, lupʼiñasawa. Uka textonakajja, Diosan Arupat sapür yatjjatañataki sat folletonwa uñsti. Diosan Arupat yatjjatañataki yanaptʼa sat folleton 16 yatichäwipanwa mä programajj utjaraki. Tantachäwin yatjjatañataki abril, 2020 qellqatansa utjarakiwa. Jesusan jiwatapajj kunja wakiskirisa uka toqet familiamp jukʼamp yatjjatañ munapjjsta ukhajja, Índice de las publicaciones Watch Tower ukhamarak Jehová Diosan Testigonakapan Bibliat yatjjatapjjañapataki sat qellqatanakwa uñjjattʼapjjasma.

Yaqhanakaruw invittʼañasa. Jaqenakar Jesusan jiwatap amtañatak taqe chuyma invittʼapjjañäni. ¿Khitinakarus invittʼsna? Revisitanakasaru, Bibliat nayrajj yateqapkäna ukanakaru, familiaranakasaru ukat yaqhanakampiruw invittʼsna. Jilïr irpirinakajj inactivo jilat kullakanakar invittʼañatakiw chʼamachasipjjañapa. Mä jaqetï yaqha zonan jakaschi ukhajja, jupar invittʼañatakejj uka lugaran kawkjansa ukat kuna horarusa Jesusan jiwatapajj amtasini ukwa Internetan jw.org cheqan thaqtsna, NANAKJJATA siski ukaruw mantsna, ukatjja “Jesusan jiwäwip amtañataki” siski ukaruw mantaraksna.

¿Uka urutak wakichtʼatäñatakejj kunampsa lursna?