Taqeniw jutïrin sum jakasiñ munapjje
Jumasa familiamasa ¿kunjam jakasiñsa jutïrin munapjjasma? Kusisit jakasiña, jan usuntaña, suman jakasiñwa munapjjpachätajja. Cheqas taqeniw ukham jakasiñ muntanjja.
Ukampis ukham jakasiñ janiw jikjjatksnati sasajj waljaniw amuyapjje. Taqe kunas mä akatjamatwa maytʼaspa. COVID-19 usu utjatapatsa, yaqha ukham jan walinak utjatapatsa, jukʼamp jan walinakanwa jaqenakajj uñjasiwayapjje, waljaniw jan qollqeni uñjasiwayapjje, walja jaqenakarakiw jiwawayapjje. Ukatwa waljanejj janipuniw sum jakasiñajj utjkaniti sasin amuyapjje.
Ukham jan walinak utjatapatjja, jaqenakajj kunas jutïrin sum jakasiñatakejj yanaptʼaspa ukwa yatiñ munapjje. Yaqhep jaqenakajj destinoru jan ukajj suerteruw wal creyipjje. Waljanisti wali yatjjatatäña walja qollqenïñaw yanaptʼistaspa sasaw amuyapjje. Yaqhepajja, suma jaqëñaw suman jakasiñatakejj yanaptʼistaspa sasaw amuyapjjaraki.
¿Ukampis cheqapunit ukanakajj sum jakasiñatakejj yanaptʼistaspa? Uk yatiñatakejj akanakat amuytʼam:
¿Jutïrin kunjamsa jakasiñäni uk kunjamatsa yatsna?
¿Wali yatjjatatäñasa, walja qollqenïñas sum jakasiñatakejj yanaptʼistaspati?
¿Suma jaqëñat jutïrin sum jakasiñatakejj yanaptʼistaspa?
¿Jutïrin sum jakasiñatakejj kawkinsa suma ewjjtʼanak jikjjatsna?
Aka revistanwa uka jisktʼanakan qhanañchäwinakap jikjjatäta.