¿Suma jaqëñat jutïrin sum jakasiñatakejj yanaptʼistaspa?

Walja maranakaw suma jaqëñas jutïrin sum jakasiñatakejj yanaptʼkistaspa ukham waljanejj amuyawayapjje. Confucio chachat amuytʼañäni, jupajj mä yatichiri filósofo chachänwa, 551 ukhamarak 479 antes de Cristo maranwa jakäna. Jupajj akham sänwa: “Kuntï jumar jan lurapjjañap munkta ukjja, jan yaqhanakar luramti” sasa.a Uka arunakajj cheqawa sasaw Asia toqenkirinakajj sapjje.

¿KUNSA WALJANEJJ LURAPJJE?

Jutïrin sum jakasiñatakejja, sumsa sarnaqañasäkaspa ukhamwa waljanejj amuyapjje. Ukatwa respetasirïñataki, suma jaqëñataki, lurañanakap sum phoqañataki, suma conciencianïñataki chʼamachasipjje. Vietnam markan jakasiri Linh sat warmejj akham siwa: “Nayatï honrado jaqëyäjja, taqe kunas sumaw saritani sasaw amuyayäta” sasa.

Uka pachpa warmiw pobrenakaru jan utanïpki uka jaqenakar manqʼa churaski.

Yaqhepajj religionapan yatichataw kunatï askïki uk lurapjje. Taiwán markan jakiri Hsu-Yun chachajj akham siwa: “Kunapachatï maynejj jiwjje ukhajja, kunanaktï jakkasin lurawayki ukarjamaw kusisi jan ukajj tʼaqesi sasaw yatichapjjetäna” sasa.

¿UKAJJ JAQENAKAR YANAPTʼITI?

Taqe lurañanakap tukuyasinjja uka pachpa warmejj wali llakita qarita ukhamäskiwa, jiskʼa wawaparuw ichjjasiskaraki.

Cheqansa kunapachatï mayninakatakejj kunatï askïki uk lurtan ukhajja, taqe kunas sumaruw sari. Ukampis yaqhanakar yanaptʼapki ukanakajja, munapki ukarjam jan phoqasitapwa amuyapjje. Hong Kong markankiri Shiu Ping sat warmejj akham siwa: “Sumanak lurapki ukanakajja, janiw sumanakpun katoqapkiti ukwa uñjawayta. Familiajar sum uñjañataki, kunatï sumäki uk lurañatakiw chʼamachasiyäta. Ukampis matrimoniojan jan walinwa uñjasiwayta, esposojäjja nayarusa wawajarus apanukuwayapjjetuwa” sasa.

Religionar saririnakat janiw taqenipunejj suma jaqëpkiti, ukwa waljanejj amuyawayapjje. Japón markan jakasiri Etsuko sat warmejj akham siwa: “Nayajj mä religionankayätwa, waynanakaruw pʼeqtʼarakiyäta. Religionajar sarapkäna ukanakajja, janiw sumäpkänti. Ukatwa chuyma ustʼatäyäta, taqeniw pʼeqtʼañ munapjjäna, iglesian qollqepsa janiw sum apnaqapkänti” sasa.

“Familiajar sum uñjañataki, kunatï sumäki uk lurañatakiw chʼamachasiyäta. Ukampis matrimoniojan jan walinwa uñjasiwayta, esposojäjja nayarusa wawajarus apanukuwayapjjetuwa” (SHIU PING, HONG KONG)

Mä religionar taqe chuyma saririnakat yaqhepajja, sum lurapjjatapat jan kuns jikjjatapjjatapat chuyma ustʼatäpjjewa. Vietnam markankir Van sat warmejj ukhamwa jikjjatasïna. Jupajj akham siwa: “Nayra jiwat awkinakajan altaranakaparuw frutanaka, panqaranaka, manqʼa sapür uchirïyäta, ukhamat jutïrin mä qhawqha bendicionanak katoqañataki. Walja maranakas taqe chuyma ukham lurirïkchiyätjja, esposojajj wal usuntäna, qhepatsti phuchajajj yaqha markan yateqkasinwa pä tunka maranïsin jiwjjäna” sasa.

¿KUNATSA SUMA JAQËÑAKEJJ JAN WAKISKI?

Mayninakampejj sumas apaskstanjja jutïrin sumaw jakasiñäni sasin janiw sañ munkiti. ¿Kunatsa? Kuntï Bibliajj siski uk uñjapjjañäni.

JANIW TAQENIPUNEJJ SUMÄKI UK LURAÑ MUNAPKITI

“Kunanakatï sumäki ukanakjja mä jucharar jaqekiw tukjaspa” (ECLESIASTÉS 9:18).

Maynejj suma jaqëñatakis chʼamachaskchejja, yaqhanakaw jan walin uñjasiyaspa. Amuytʼañataki, mä pandemianjja, jumajj autoridadanakar istʼasmawa, janiw yaqhanakampejj añch chikachaskasmati. Ukampis yaqhanakatï jan istʼapkaspajja sum sarnaqañ munapki ukanakarojj jan walinwa uñjasiyaspa.

WALJANIW KUNATÏ WALÏKI JAN WALÏKI UK JAN AMUYAPKITI

“Mä thakiw utji, uka thakejja jaqetakejj cheqa thakïkaspas ukhamawa, ukampis qhepatjja uka thakejj jiwañaruw api” (PROVERBIOS 14:12).

Waljanejja kunatï walïki uksa lurapkaspa ukhamwa amuyapjje, ukampis qhepatjja ukham lurapjjatapajj jan walïtapwa amuyapjjaraki. Kuna sumanaktï lurañ amtktan ukanakajja jan walirojj puriyarakistaspawa.

JAKÄWISAN KUNJAMÄÑÄNISA UKAJJ JANIW YATIÑJAMÄKITI

“Kunas qharürojj jakäwinakaman pasani ukjja janiw yatipktati” (SANTIAGO 4:14).

Wali suma jaqesa kuna horasas jiwakispawa. Amuytʼañataki, pandemia tiemponjja maynir yanaptʼkasajj waljaniw jiwapjje. China markankir Liting sat warmin awkipajj mä accidenten jiwkäna ukhajja, kunas pasäna uk uñjapjjañäni. Jupajj akham siwa: “Janiw amuyirjamäkayätti, ¿kunatsa awkijajj suma jaqëkasin jiwañapäna? Jupajj wali trabajtʼiri, humilde, jan kʼarisiri ukhamänwa, ukampis uka auton jupa sapakiw jiwäna” sasa.

Suma jaqëñatï jutïrin sum jakasiñataki jan yanaptʼkistaspa ukhajja, ¿kunas yanaptʼistaspa? Uk yatiñatakejj confiykañ mä yanaptʼaw munasi. Jisktʼanakasar qhanañchiri, kunsa jutïrin lurañäni uk yatiyir suma ewjjtʼanakwa muntanjja. ¿Kawkinsa uk jikjjatsna?

a Kunsa Confucio chachajj yatichäna uk yatiñatakejja, El hombre en busca de Dios sat libron 7 yatichäwipan párrafos 31-35 uñjjattʼäta, ukajj Jehová Diosan Testigonakapan luratawa. Internetan jw.org cheqanwa utjaraki.