Jumaw kunjamas jutïrin jakasïta uk amtasma

Mä 3.500 maranak nayrajja, jutïrin sum jakasipjjañapatakejj kunsa lurapjjañapa ukwa Jehová Diosajj jupar adoririnakar säna. Jupajj akham sänwa: “Jumanak nayraqatanjja jakañampi jiwañampi ukhamarak bendicionampi maldicionampwa nayajj uchaskta [...]. Jumanakasa jumanakat jutir wawanakamasa jakañwa ajllisipjjañama, ukhamat jakasipkakiñamataki” (Deuteronomio 30:19).

Jupanakatï jutïrin sum jakasiñ munapjjchïnjja, kunatï ukatakejj yanaptʼkaspäna ukwa ajllisipjjañapäna. Jiwasajj ukhamarakiw ajlliñasa. Kunas jutïrin sum jakasiñatakejj yanaptʼistaspa uka toqetjja, Bibliajj akham sasaw qhanañchi: “Jehová Diosamar munasipjjam, aruparus istʼapjjam” sasa (Deuteronomio 30:20).

¿KUNJAMSA DIOSAROJJ MUNASISMA ARUPARUS ISTʼARAKISMA?

KUNTÏ BIBLIAJJ SISKI UK YATEQAM. Jehová Diosar munasiñatakejja, kunsa Bibliajj jupat qhanañchi ukwa nayraqat yateqañama. Ukham luräta ukhajja, Diosajj wali munasirïtapa, sum jakasiñam munatapwa amuyäta. Niyakejjay Diosajj jumat wal llakischejja, jupar orasiñamwa muni (1 Pedro 5:7). Jupar uñtʼañatak chʼamachasïta ukhajja, Diosajj jumarojj jakʼachasirakiniwa sasaw Bibliajj qhanañchi (Santiago 4:8).

YATEQKTA UKARJAM SARNAQAÑATAK CHʼAMACHASIM. Diosar istʼañatakejja, ewjjtʼanakaparjam sarnaqañasawa. Uka ewjjtʼanakajj Bibliankiwa. Ukhamtï lurätajja, kuntï Josué 1:8 textojj siski ukaw juman phoqasini. Ukan akham siwa: “Taqe kunas sumaru[w] sarani, wali yatiñampirakiw taqe kunsa luräta” sasa.