¿Kunatsa uñisisiñajj walpun utjpacha?
¿Kunatsa oraqpachan uñisisiñajj walpun utji? Uk yatiñatakejja uñisisiñajj kunasa, kunjamatsa uñisisiñajj qalltawayi, kunatsa uñisisiñajj taqe cheqan utji ukwa amuyañasa.
¿Uñisisiñajj kunasa?
Uñisisiñajja mayni jan ukajj mä grupo jaqenak conträña jupanakar enemigonakasarjam uñjaña ukawa. Uñisisiñajja maynitaki walja tiempo coleratäñarakiwa.
¿KUNATSA JAQENAKAJJ YAQHANAKAR UÑISIÑ QALLTAPJJE?
Jaqenakajj walja razonanakatwa uñisiñ qalltapjje. Jilapartejja jaqenakajj janiw mayninakarojj kuntï lurapki ukanakat uñisiñ qalltapkiti, jan ukasti jupanakajj kunjamäpjjesa ukarjamaw uñisipjje. Uñisitäpki ukanakajja jan wali jaqenakata, jan walinak lurir jaqenakata, jan cambiañ munir jaqenakatwa uñtʼatäpjjaspa. Jan ukajj mayninakat sipan minusäpkaspasa mayninakar jan waltʼayirïpkaspasa ukham uñtʼatäpjjaspawa. Jan ukajj jan walinak utjayir jaqenakjam uñjapjjchispa. Khitinakantï chuymapan uñisiñajj utjki ukanakajja, inas jan cheqaparjam uñjata tʼaqesiyata uñjasiwayapjjchi, jan ukajj inas ukham uñisirïpjjañapatakejj jakäwipan kunas pasawaychi.
¿KUNJAMSA UÑISISIÑAJJ TAQE CHEQAN UTJAWAYI?
Jaqenakajj janïr maynir uñtʼkasaw uñisjjapjje. Amuytʼañataki, jilapart jaqenakajja kuntï familiaranakapasa amigonakapasa mä grupo jaqenakat amuyapki uka pachparakwa amuyapjjaspa. Ukhamatwa uñisisiñajj jukʼamp utj-jjaspa, mä gruponjja taqeniw ukham amuyjjapjjaspa.
Uñisisiñajj kunjamsa ratuk jiljjatti ukaw kunatsa walja jaqenakajj uñisisirïpjje uk amuyayistu. Ukampis uñisisiña jan utj-jjañapatakejja, kunjamsa uñisisiñajj utjawayi ukwa amuyañasa. Bibliaw uk qhanañchistaspa.
BIBLIAW KUNJAMSA UÑISISIÑAJJ UTJAWAYI UK QHANAÑCHISTU
UÑISISIÑAJJ MÄ ANGELATWA QALLTÄNA. Uñisisiñajja alajjpachan mä angelajj Dios contra saytʼkäna ukhaw qalltäna, uka angelajja qhepat Supaya, Diablo sasin uñtʼatäjjänwa. Diablojj Dios contra saytʼañ “qalltkäna ukhatpach jiwayirïnwa”. ‘Kʼarïtap layku, kʼarin awkipätap laykojja’ uñisisiñanaka jan wali lurañanak utjayaskakiwa (Juan 8:44; 1 Juan 3:11, 12). Supayajja jan sinttʼasiri, jaqenakar jan waltʼayiriwa, wali coleratarakiwa sasaw Bibliajj qhanañchi (Job 2:7; Apocalipsis 12:9, 12, 17).
JAQENAKAJJ PANTJASIRÏPJJATAP LAYKUW UÑISIRÏPJJE. Adán sat nayrïr chachajja Supayjamarakiw jan wal luräna. Ukhamätapatwa jaqenakajj juchararätanjja pantjasirirakïtanjja (Romanos 5:12). Adanan Caín sat yoqapajja, uñisiñatwa Abel pachpa jilaparojj jiwayäna (1 Juan 3:12). Jaqenakajj munasiñampi khuyaptʼayasiñampi uñjirïpkstansa, juchararätas laykojj jiwasatakik taqe kuns muniri, envidiasiri, jachʼa jachʼa tukuri ukhamäpjjtanwa, ukanakaw uñisisiñ jukʼamp utjayi (2 Timoteo 3:1-5).
JAN JUPJAMÄKI UKAROJJ MAYNEJJ UÑISJJASPAWA. Akapachankir jaqenakajja, jan walinak lurasa jan wal sarnaqasaw uñisisiñar chʼamañchapjje. “Mundpachajj Supayan munañapankiwa” ukatwa jan jupanakjamäpki ukanakar uñisipjje, yaqhachapjje, jan wali arunakamp toqjjapjje, jiskʼachapjje ukat yaqha ukhamanakamp lurapjje (1 Juan 5:19).
Ukampis Bibliajj janiw kunjamsa uñisiñajj qalltawayi ukak qhanañchkiti, jan ukasti kunjamsa ukajj askichasispa uksa qhanañcharakiwa.