Uñisisiñajj wiñayatakiw chhaqtjjani
Uñisisiñ chuymasat apskchiñänisa, janiw mayninakan chuymapat uñisisiñ apsksnati. Yaqhepajj ina chʼusat uñisitaw uñjasipjje. Ukhamajj ¿khitis uñisisiñ wiñayatak chhaqtayaspa?
Jehová Diosakiw taqe uñisisiñanak jan mayampitak chhaqtayaspa, Bibliaw ukham qhanañchi (Proverbios 20:22).
KUNANAKATÏ UÑISISIÑ UTJAYKI UKANAK DIOSAW CHHAQTAYANI
1. SUPAYA. Dios contra saytʼkäna uka angelaw mä arunjja, Supayaw aka mundon uñisisiñ utjañapatak juchani. Diosaw Supayampiru Supayan apnaqatäpki uka uñisisir jaqenakampirojj tukjani (Salmo 37:38; Romanos 16:20).
2. SUPAYAN APNAQATA AKA JAN WALI PACHA. Khitinakatï uñisisiñ utjayapki taqe ukanakaruw Diosajj aka oraqet tukjani, jan wali politiconakarusa, uñisisiñar chʼamañchir religión pʼeqtʼirinakarus tukjarakiniwa. Qollqe sinti munasin negocionak luririnakaru, jaqenakar engañjasa tʼaqesiyapki ukanakarus Diosajj tukjarakiniwa (2 Pedro 3:13).
3. JAQENAKAN PANTJASIRÏPJJATAPA. Jaqenakajj pantjasirïtanwa sasaw Bibliajj qhanañchi, ukatwa jan walinak lupʼtan, jan walinaksa luraraktan, mayninakar uñisiñas chuymasan utjaraki (Romanos 5:12). Chuymasan uñisisiñ jan utj-jjañapatakejja Diosaw yanaptʼistani, wiñayatakirakiw taqe ukanak chhaqtayjjani (Isaías 54:13).
UÑISISIÑAJJ CHHAQTJJANIWA SASAW BIBLIAJJ SISTU
1. JANIW KHITIS INA CHʼUSAT TʼAQESIYATAJJ UÑJASJJANITI. Diosan Reinopaw alajjpachat aka oraqer apnaqanini, jan khitis ina chʼusat tʼaqesiyatäjjañapatakiw yanaptʼarakini (Daniel 2:44). Janiw yaqhachañasa ni jiskʼachañas utj-jjaniti. Kuna jan walinakantï jaqenakajj jichhürunakan uñjasipki ukanakwa askichani (Lucas 18:7).
2. TAQENIW SUMANKAÑAN JAKASIPJJANI. Janiw guerranaka nuwasiñanaka utjatapat khitis tʼaqesiyata uñjasjjaniti (Salmo 46:9). Aka oraqenjja sumankañ muniri jaqenakakiw jakasjjapjjani (Salmo 72:7).
3. WIÑAYATAKIW SUM JAKASJJAPJJANI. Taqeniw maynit maynikama munasiñampi uñjasipjjani (Mateo 22:39). Janiw khitis llakisjjaniti ni kuna jan walinakatï nayrajj paskäna ukanak amtasisas llakisjjaniti (Isaías 65:17). Uka tiemponjja jaqenakajj ‘jan tukuskir sumankañampiw wal kusisipjjani’ janiw uñisisiñajj utj-jjaniti (Salmo 37:11).
¿Ukan jakasiñ munasmati? Jichha tiemponsa walja jaqenakaw jan uñisirëjjañataki Biblian wiñay yatichäwinakaparjam sarnaqañataki chʼamachasisipki (Salmo 37:8). Jehová Diosan walja millón Testigonakapaw uk lurañataki aka oraqpachan chʼamachasisipki. Jupanakajj kunayman costumbrenakani, kunayman markanakatäpkchisa, munasirïpjjewa mä familjamaw mayachtʼat jakasipjjaraki (Isaías 2:2-4).
Jan cheqapar uñjatäkasasa, yaqhachatäkasasa kunas aguantañatak yanaptʼiristam uk Jehová Diosan Testigonakapaw yatichapjjeristam. Kuntï yateqkäta ukanakajja, uñisisiñat sipansa munasiñatakiw yanaptʼätam. Jan yuspärasirinakaru, uñisirinakaru, taqe jaqenakar munasiñamp uñjañwa yateqäta. Ukham luräta ukhajja jukʼamp kusisitäyätawa, mayninakampis jukʼamp sumwa apasirakïta. Ukhamarusa Diosan Reinopajj wiñayatak uñisisiñ chhaqtaykani ukan jakasiñwa yateqarakïta (Salmo 37:29).