1 | Orasiña “Taqe llakinakam jupan amparapar” katuyam
BIBLIAJJ AKHAM SIWA: “Ukañkamajj taqe llakinakam jupan amparapar katuyapjjam, jupajj jumanakat wal llakisi” (1 PEDRO 5:7).
¿Kamsañsa muni?
Kunanakas llakisiyistu, kuna jan walinakansa uñjastan taqe ukanak jupar yatiyañasatakiw Jehová Diosajj invittʼistu (Salmo 55:22). Problemanakasajj jiskʼäskpasa jan ukajj jachʼäskpasa, Diosajj istʼapunistaniwa. Jiwasarutï ukanakajj llakisiychistojja, Diosar llakisiyarakiwa. Amuyusan sumak jikjjatasiñatakejja, nayraqatajj orasiñaw yanaptʼistani (Filipenses 4:6, 7).
¿Kunjamsa yanaptʼistu?
Llaki usunïtan ukhajja, sapakïksnas ukhamaw jikjjatassna. Cheqas kunjamas jikjjatastan uk janiw mayninakajj sum amuyapkapunistaspati (Proverbios 14:10). Ukampis kunjamas jikjjatastan uk Diosajj sumwa amuyistu, istʼarakistuwa. Ukhamajj jan ajjsartʼasaw llakinakas yatiysna. Jehová Diosajja, qhawqsa tʼaqesisktan uk yatiwa, ukar atipjañatakejj qhawqsa chʼamachasisktan uks yatirakiwa, ukatwa taqe kunanakatï llakisiykistu ukanak oración toqe jupar yatiyañas muni (2 Crónicas 6:29, 30).
Jehová Diosar orastan ukhajja, jupajj cuidapunitaniwa sasajj jukʼampiw confiytanjja. Salmonak qellqeri mä chachajj kuntï siskäna ukhamwa saraksna, jupajj Diosar akham sänwa: “Jumaw nayan tʼaqesitaj uñjtajja, wal tʼaqesitajsa jumaw uñjtajja” sasa (Salmo 31:7). Kunanakatï pasaskistu ukanak Jehová Diosajj sum yati, uk yatiñajja jan aynachtʼañatakiw chʼam churistaspa. Diosajj tʼaqesitanakas janiw aleq ukhamak uñchʼukkiti. Jan ukasti Biblia toqew chuymachtʼistu chʼamañchtʼarakistu.