Suma amtanakaruw puriñasa Bibliajj confiykañ yanaptʼanakaniwa

Kunatï cheqapäki uk jiwasan concienciasarjamak amtsna, jan ukajj mayninakan amuyuparjamak amtsna ukhajja, jan walinakanwa uñjassna. Kunatsa ukham sistan uk Bibliaw qhanañchistu, kunjamatsa cheqpachapun kusisitäsna uksa sarakistuwa. Cheqansa Biblianakwa confiykañ yanaptʼanak jikjjatsna.

DIOSAMPIW YANAPTʼAYASIÑASA

Bibliajja kunatsa jaqenakajj Jehováa Diosan yanaptʼap munapjje ukwa qhanañchi; cheqansa jaqenakajj janiw jiwas pachpa apnaqasiñatak luratäktanti (Jeremías 10:23). Ukatwa suma amtanakar puriñasatakejja, Jehová Diosajj walja suma ewjjtʼanak Bibliar qellqayawayi. Jupajj walpun munasistu, jan walinakata tʼaqesiñanakat jarkʼaqañwa munarakistu (Deuteronomio 5:29; 1 Juan 4:8). Maysa toqetjja Diosajj Luririsjamajj wali yatiñaniwa, kunjam luratätansa uksa yatirakiwa, ukatwa suma ewjjtʼanak churistu (Salmo 100:3; 104:24). Ukampis leyinakaparjam sarnaqañasatakejj janiw khitirus obligkiti.

Cheqpachapun kusisitäpjjañapatakejja, Jehová Diosajj Adanampir Evampirojj taqe kunwa churäna (Génesis 1:28, 29; 2:8, 15). Ukatjja fácil istʼkañ instruccionanakwa churäna, ukarjam sarnaqapjjañapwa suyarakïna. Ukampis jupanakaw Diosar istʼañsa jan istʼañsa amtapjjañapäna (Génesis 2:9, 16, 17). Ukhamäkchïnsa, Jehová Diosan leyinakapar istʼañat sipansa jupanakan amtanakaparuk sarnaqañwa amtapjjäna (Génesis 3:6). Ukham lurapjjatapatjja, taqeniw jan walinakan uñjasisajj tʼaqestanjja, janirakiw kusisitäktanti. Adanampin Evampin Diosan leyinakapar jan istʼapjjatapatjja, janiw sumankañajj utjawaykiti, ni cheqpach kusisit jakasiñas utjawaykiti (Eclesiastés 8:9).

Ukampis suma amtanakar puriñatakejja, Biblianwa suma ewjjtʼanak jikjjatsna (2 Timoteo 3:16, 17; “Taqenitak mä librow utji” sat recuadro liytʼam). Jichhajj uka toqetwa yatjjataskañäni.

Bibliajj “Diosan arupawa” sasin kunatsa sistan uk yatjjatam (1 Tesalonicenses 2:13). Ukat Internetan jw.org cheqar mantasajja, ¿Bibliajj khitin amuytʼayatasa? sat video uñtam.

YAQHEPANAKAJJ JANIW BIBLIAR CONFIYAPKITI

Yaqhepanakajja ‘sum sarnaqañatak ewjjtʼanakajj janiw Biblian utjkaspati’ sasaw sapjje. Jupanakajj Bibliat kamsapjjesa ukanakat mä qhawqha jichhajj uñjañäni:

Yaqhepajj akham siwa: “Bibliajj janiw cheq parlkiti” sasa.

¿Ukajj cheqäpachati? Nayrïr kut Biblia liytʼasajj ukham amuyañjamäspawa. Ukampis jiwasatï mä sarnaqäwejj kuna toqetsa parli, kuna tiemponsa jakapjjäna, kunjam costumbrenakanïpjjänsa, mä sarnaqäwi qellqerejj kunsa amuyäna, ukat yaqha ukham toqenakat sum yatjjatañäni ukhajja, Bibliajj cheq parlatapwa amuyañäni.

Uka toqet jukʼamp yatiñatakejja, Internetan jw.org cheqar mantasajj “¿Se contradice la Biblia?” sat yatichäwi liytʼam.

Yaqhepajj akham siwa: “Biblia liyirinakajj jan wal sarnaqapjje. Ukhamajj janiw Biblian yanaptʼkir ewjjtʼanakajj utjkpachati” sasa.

¿Ukajj cheqäpachati? Khitinakatï Biblian ewjjtʼanakaparjam jan sarnaqapki ukanakajja, jupanak pachpaw ukham sarnaqañ ajllipjje. Cheqas walja jaqenakasa religión pʼeqtʼirinakasa, janiw yateqaskay sarnaqapkaniti sasaw Bibliajj qhanañchjjäna. Ukat Biblian yatichäwinakaparjam jan sarnaqapjjatapatjja, ‘jan walinakaw’ parlasini sasin qellqatäjjarakïnwa (2 Pedro 2:1, 2).

Kunjamsa religión pʼeqtʼirinakajj Biblian yatichäwinakapat jayarstʼawayapjje uk yatiñatakejja, Internetan jw.org cheqar mantasajj “La religión, ¿un gran negocio?” sat yatichäwi liytʼam.

Yaqhepajj akham siwa: “Bibliajj janiw respetasiñ yatichkiti” sasa.

¿Ukajj cheqäpachati? Bibliajj taqenir respetomp uñjañwa yatichistu. Bibliarjamajj akanak lurañaw jan walïkiti:

Mayninakat sipan jilanksnas ukham amuyasiña (Filipenses 2:3).
Jan jiwasjamäpki ukanakar jan respetaña (1 Pedro 2:17).
Mayninakar jiwasjam amuyapjjañapatak obligaña (Mateo 10:14).

Bibliarjamajja Jehová Diosajj taqeniruw munasiñampi cheqaparjam uñji, ukatwa jiwasajj mayninakarojj munasiñampi cheqaparjam uñjañasaraki (Romanos 9:14).

Jukʼamp yatiñatakejja, Internetan jw.org cheqar mantasajj “¿Nos ayuda la Biblia a ser tolerantes?” sat yatichäwi liytʼam.

DIOSAJJ BIBLIA TOQEW YANAPTʼISTU

Nayrat jichhakamajja, Diosajj kunjamsa jaqenakampejj apasiwayi uka toqetwa Bibliajj parli. Ukatjja kunas Diosatakejj walikïski jan walïkaraki, kunanakas jiwasar kusisiyistaspa jan ukajj llakisiyistaspa ukanakatsa parlarakiwa (Salmo 19:7, 11). Jiwasatï Biblia liyiñäni ukhajja, yanaptʼkiri suma ewjjtʼanakwa jikjjatañäni, sapürunjamarakiw ukanakajj sum jakasiñatak yanaptʼistani.

Proverbios 13:20 texton utjki uka ewjjtʼat amuytʼañäni, uka texton akham siwa: “Khititï yatiñan jaqenakamp sarnaqki ukajja yatiñan jaqeruw tukuni, ukampis khititï jan amuytʼasir jaqenakamp chikachaski ukajja jan waliruw purtʼasini” sasa. Uka arunakajja, waljaniruw nayrat jichhakamajj yanaptʼawayi, ukampis uka textojj Biblian utjki uka wakiskir ewjjtʼanakat maynïrikiwa (“Bibliankir suma ewjjtʼanakajj yanaptʼasipuniwa” sat recuadro liytʼam).

Inas akham sasin jisktʼassta: “¿Kunjamatsa Biblian ewjjtʼanakapajj yanaptʼasirïtap yatirista?” sasa. Jutïr yatichäwinjja kunjamsa Bibliajj walja jaqenakar yanaptʼawayi ukanakat mä qhawqhanakwa yatjjataskañäni.

a Diosan sutipajj Jehová satawa (Salmo 83:18).

BIBLIANKIR SUMA EWJJTʼANAKAJJ YANAPTʼASIPUNIWA

Bibliajj niya 2.000 maranak nayraw qellqasiwayi, ukampis ewjjtʼanakapajj jichhürunakan yanaptʼaskakistuwa. Jaqenakajj nayrat jichhakamajj pachpa amtanikïsktanwa, taqeniw wali suma kusisit jakasiñ muntanjja (Eclesiastés 1:9). Ukatakejj Bibliankir aka suma ewjjtʼanakaw yanaptʼistaspa.

Taqe kunan honradöña

“Taqe kunansa honrado chuymampiw sarnaqañ” muntanjja (Hebreos 13:18).
“Khititejj lunthataski ukajja, jan jukʼampejj lunthataspanti, antisas pachpa amparapampi sum lurasa wal trabajpan” (Efesios 4:28).

Mayninakamp sum apasiña

“Jan khitis jupan askipak thaqpanti, jan ukasti mayninakan askip thaqpan” (1 Corintios 10:24).
“Maynit maynikam aguantasisipkakim, jumanakkamajj taqe chuyma perdonasisipkakim” (Colosenses 3:13).

Suma amtanakar puriña

“Jan experienciani jaqejja taqe kuntï jupar sapki ukjja creyikiwa, ukampis amuytʼasir jaqejja kunsa lurani uk sum amuytʼasi” (Proverbios 14:15).
“Amuytʼasir jaqejja mä jan waltʼäwi uñjasajj imantasjjewa, ukampis jan experienciani jaqenakajja jan waltʼäwirojj mantasipkakiwa ukatsti jan walinakan uñjasisajj tʼaqesipjjewa” (Proverbios 22:3).