¿Kunjamatsa predicacionan jukʼamp kusisitäsna?

1. ¿Kunjamsa yaqhepanakajj predicacionar mistusajj jikjjatasipjje? (Foto uñjjattʼarakïta).

JEHOVÁ DIOSAN servirinakapajja, alajjpachankir Awkisar munasitasata, jaqenakajj jupar uñtʼapjjañapatak yanaptʼañ munatasatwa predictanjja. Walja jilat kullakanakarojj predicañajj wal gusti, ukampis yaqhepatakejj kusisit predicañajj chʼamakiwa, kuna laykutejj yaqhepajj wali ajjsarirïpjjewa, janiw jupanak pachparus confiyasipkiti, yaqhepanakajj jan invitatäsin jaqenakan ukar sarasajj mayjtʼasipjjewa. Yaqhepajj “janiw jaqenakajj istʼapkitaniti” sasaw ajjsarayasipjje. Yaqheparojj jiskʼatpachaw mayninakamp jan chʼajjwapjjañapatak yatichapjje. Taqe jupanakajj wal Jehová Diosar munasipjje, ukampis jan uñtʼatanakar suma yatiyäwinak predicañajj jupanakatak wali chʼamawa. Ukhamäkchisa predicañajj kunja wakiskirisa uk sum amuyapjje, ukatwa sapa kut predicapjje. ¡Jehová Diosajj wal jupanakat kusispacha!

2. Predicacionan jan kusisitäksta ukhajj ¿kunatsa jan desanimasiñamäki?

² ¿Jumatakejj predicacionan kusisitäñajj chʼamakiti? Chʼamächi ukhajj jan desanimasimti. Ukham jikjjatasitamajj humilde chuymanïtama, mayninakamp sum uñjayasiñ jan munatama, mayninakamp jan jiskhisiñ munatamwa uñachtʼayaspa. Ukhamarus janiw khitirus rechazatäñajj gustkiti, yamas mayninakar yanaptʼañ munktan ukhajj janiw rechazatäñajj gustkistuti. Kuna jan walinakansa uñjastan uk alajjpachankir Awkimajj sum yati, yanaptʼañwa munaraktamjja (Is. 41:13). Aka yatichäwinjja, ukham jan jikjjatasiñatakisa, predicacionan jukʼamp kusisitäñatakis kunanaksa lursna uk phesqa toqetwa yatjjataskañäni.

DIOSAN ARUPAMP CHʼAMAÑCHTʼAYASIM

3. ¿Kunas Jeremiasarojj predicañatak chʼam churäna?

³ Diosan yatiyäwipajja, nayra maranakatpachaw servirinakaparojj mä chʼama luräwimp phoqapjjañapatakejj yanaptʼawayi. Jeremías profetat amuytʼañäni. Jehová Diosajj predicañapatak khitkäna ukhajj ajjsarayasïnwa, akham sarakïnwa: “Nayajj wawäsktwa, janiw parlañ yatkti” sasa (Jer. 1:6). ¿Kunas jan ajjsarañatak yanaptʼäna? Diosan Arupatwa chʼam katoqäna. Jupajj akham sarakïnwa: “Arunakapajj chʼakhaj manqhankir mä nakhir ninjamänwa. Nayajj amukïñat qaritäjjayätwa” sasa (Jer. 20:8, 9). Jeremiasan territoriopan predicañajj janiw faciläkänti, ukampis yatiyañapäkäna uka yatiyäwiw lurañapamp phoqañapatakejj chʼam churäna.

4. ¿Kunjamsa Diosan Arupat liytʼañasa kuntï liytʼktan ukat lupʼiñas yanaptʼistu? (Colosenses 1:9, 10).

⁴ Diosan Arupan yatiyäwipajj ukhamarakiw cristianonakarojj chʼam churistu. Apóstol Pablojj Colosankir cristianonakar qellqkäna ukhajja, Jehová Diosat jukʼamp yatjjatañaw ‘Diosatakjam sarnaqapjjañamatakisa’ ‘suma luräwinak lurapjjañamatakis’ yanaptʼapjjätam sasaw säna (Colosenses 1:9, 10 liytʼäta). Uka suma luräwinakat mayajja, suma yatiyäwinak predicañawa. Ukhamajj Diosan Arupat liytʼktan, kuntï liytʼktan ukat lupʼiraktan ukhajj jukʼampiw Jehová Diosar confiytanjja, kunatsa Diosan Reinopat yatiyañajj wali wakiskiri uks wali sum amuyaraktanjja.

5. ¿Kunas Bibliat sum beneficiasiñatakejj yanaptʼistani?

⁵ Diosan Arupat sum beneficiasiñatakejj janiw apur apurakejj liyiñasäkiti, janirakiw apur apurajj yatjjatañasäkiti ni lupʼiñasäkisa. Mä texto jan sum entiendkäta ukhajj ¿kunsa lurasma? Aleq ukhamak pasawayañat sipansa, Índice de las publicaciones Watch Tower jan ukajj Jehová Diosan Testigonakapan Bibliat yatjjatapjjañapataki sat qellqatanakanwa uka texton qhanañchäwip thaqtasma. Jumatï yatjjatañatak tiempo apstʼasïta ukhajja, jukʼampiw Diosan Arupar confiyäta (1 Tes. 5:21). Bibliar jukʼamp confiyjjäta ukhajja, kuntï yateqkta uk mayninakamp parlkasajj jukʼamp kusisitäyätawa.

PREDICAÑATAK SUM WAKICHTʼASIM

6. ¿Kunatsa predicañatak sum wakichtʼasiñasa?

⁶ Jumatï predicañatak sum wakichtʼasïta ukhajja, jukʼamp kusisitaw jaqenakamp parltʼarakïta. Janïr predikir khitkasajja, Jesusajj discipulonakapar wakichtʼänwa (Luc. 10:1-11). Niyakejjay jupanakajj Jesusan yatichäwinakaparjam lurapjjchïnjja, walja suma luräwinakwa lurapjjäna, ukatwa wali kusisitäpjjäna (Luc. 10:17).

7. ¿Kunjamsa predicañatak wakichtʼassna? (Foto uñjjattʼarakïta).

⁷ Predicañatak wakichtʼatäñatakejja, kunjamsa cheqa yatichäwinak pachpa arunakasamp yatichsna ukwa amuytʼañasa. Territoriosankir jaqenakajj kamsapjjestaspasa uka toqet paya jan ukajj kimsa amuytʼañasawa, ukat ukjjarojj kamsaraksnasa ukwa amuytʼañasaraki. Ukhamatwa jaqenakamp parlkañäni ukhajj tranquilokïñäni, kusisitäñäni, munasiñamp parltʼarakiñäni.

8. ¿Kunansa cristianonakajj ñeqʼet lurat vasor uñtasitäpjje?

⁸ Predicacionan kuna luräwinïtansa uk akham sasaw apóstol Pablojj qhanañchäna: “Ñeqʼet lurata vasor uñtasitäpkstsa, nanakanjja kunatï wali valoranïki ukaw utjapjjetu” sasa (2 Cor. 4:7). Ukampis ¿wali valoranïki ukajj kunasa? Diosan Reinopat yatiyktan ukawa, uka yatiyäwiw jaqenakan vidap salvi (2 Cor. 4:1). ¿Khitinakas ñeqʼet lurat vasor uñtasitäpjje? Diosan servirinakapätanwa, jiwasaw suma yatiyäwinak predictanjja. Apóstol Pablojj jakkäna uka urunakanjja, comerciantenakajj kunatï wali valoranïki ukanak sañunakaruw apapjjerïna, manqʼañanaka, vino jan ukajj qollqe apapjjerïna. Jichhürunakan ukhamarakiw Jehová Diosajj kunatï wali valoranïki uk confiyistu, mä arunjja suma yatiyäwinak yatiyañwa confiyistu. Jupan yanaptʼapampejj taqe chuymaw predicaskakiñäni.

JAN AJJSARAÑATAK DIOSAR YANAPTʼA MAYISIM

9. Jaqenakar jan ajjsarañatakisa, “mayninakajj janiw istʼañ munapkitaniti” sasin jan ajjsarayasiñatakis ¿kunas yanaptʼistani? (Foto uñjjattʼarakïta).

⁹ Inas awisajj jaqer ajjsarstan jan ukajj “janiw istʼañ munkitaniti” sasin ajjsarayasstan. ¿Kunsa jan ajjsarañatakejj lursna? Jan predikjjapjjañapatak ordenapkäna ukhajj kunsa apostolonakajj oracionan mayisipjjäna uk amuytʼañäni. Ajjsarañamp apayasiñat sipansa Diosan Arupat ‘jan ajjsaras parlaskakiñatakiw’ Jehová Diosar yanaptʼa mayisipjjäna. Jehová Diosasti jupanakarojj jankʼakiw jaysäna (Hech. 4:18, 29, 31). Jaqenakar ajjsarañäni ukhajja, Jehová Diosar yanaptʼa mayirakiñäni. Ukhamajj jaqe masisar munasiñataki, jupanakar jan ajjsaras predicañatak yanaptʼa mayisiñäni.

10. ¿Kunjamanakatsa Jehová Diosajj predicaskakiñatak yanaptʼistu? (Isaías 43:10-12).

¹⁰ Jehová Diosaw Testigopäñasatak ajllisistu (Isaías 43:10-12 liytʼäta). Jupajj jan ajjsarañasatak yanaptʼañwa arsuwayarakistu. Kunjamanakatsa jan ajjsarañatak yanaptʼistu uk pusi toqet uñjañäni. Maya, suma yatiyäwinak yatiyasktan ukhajj Jesusaw jiwasampïski (Mat. 28:18-20). Paya, Jehová Diosajj angelanakaruw jiwasar yanaptʼapjjañapatak encargawayi (Apoc. 14:6). Kimsa, Jehová Diosaw espíritu santop churistu, ukaw kuntï yateqktan uk amtañatak yanaptʼistu (Juan 14:25, 26). Pusi, Jehová Diosajj jiwasar compañapjjañapatakejj jilat kullakanakwa churistu. Jupan yanaptʼapampisa munasir jilat kullakanakasan yanaptʼapampis jan ajjsartʼasaw predicaskakiñäni.

TAQENIR PREDICAPJJAÑÄNI, KUSISIT CHUYMANÏPJJARAKIÑÄNI

11. ¿Kunsa jukʼamp jaqenakar jikjjatañatakejj lurasma? (Foto uñjjattʼarakïta).

¹¹ ¿Predickasajj jukʼaniruk utanakapan jikjjatasajj desanimastati? Ukhamächi ukhajj akham jisktʼasim: “¿Kunatsa añchhitajj jaqenakajj jan utapankapkpacha? ¿Trabajisipkpachati jan ukajj alasirich sarapjjpacha?” sasa (Hech. 16:13). Ukhamächi ukhajj ¿janit callenakan predicañatak chʼamachaskasma? Joshua sat mä jilatajj akham siwa: “Mercadonakana, tiendanakana, paradanakan sarnaqkasaw jaqenakar predicañatak chʼamachasta” sasa. Bridget esposapampejja, jaypʼu toqenakar predicasa domingo jaypʼunak predicasaw jukʼamp jaqenakar utanakapan jikjjatapjje (Efes. 5:15, 16).

12. ¿Kunjamatsa kunarus jaqenakajj creyipjje kunanakatsa yatiñ munapjjaspa uk yatsna?

¹² Jaqenakatï suma yatiyäwinakat jan añch yatiñ munapkchi ukhajja, kunarus creyipjje kunas llakisiyi uk amuytʼañasawa. Joshua jilatampi Bridget esposapampejj tratadonakan uñstki uka jisktʼanakampiw jaqenakar parlañ qalltapjje. “¿Kunsa jumajj Bibliat amuyta?” sat tratadomp predicapjje ukhajj akham sasaw jisktʼapjje: “Yaqhepajj Diosatwa Bibliajj juti sasaw amuyapjje, yaqhepajj janiw ukham amuyapkarakiti, ¿jumajj kunjamsa amuyta?” sasa. Ukham lurasajj waljanimpiw parlañ qalltapjje.

13. Janis jaqenakajj istʼapkchistojj ¿kunatsa “predicacionampejj phoqasktanwa” sasin sissna? (Proverbios 27:11).

¹³ Janis jaqenakajj istʼapkchistojja, predicacionampejj phoqasktanwa. ¿Kunatsa ukham sistanjja? Jehová Diosampi Yoqapampejj predicañaswa mayistu, ukaw jukʼamp importantejja (Hech. 10:42). Inas predicacionan jan khitimpis parlkstanti, jaqenakajj suma yatiyäwinak inas rechazapjjarakchi, ukampis janiw ukat sint llakisiñasäkiti. Alajjpachankir Awkisatï jiwasamp kusisitächi ukhajj kusisitarakïsnawa (Proverbios 27:11 liytʼäta).

14. Maynejj Diosat yatiñ munir mä jaqer jikjjatki ukhajj ¿kunjamsa jikjjatastanjja, ukat kunatsa?

¹⁴ Mayni publicadoranakajja, Diosat yatiñ munir mä jaqer jikjjatasajj wal kusisipjje, jiwasajj jupanakamp chikaw kusisiraktanjja. Yatiyañataki revistajja, predicañajj mä chhaqat wawar thaqañamp sasiwa sasaw qhanañchäna. Uka chhaqat wawarojj waljaniw thaqapjje, walja lugaranakanwa thaqapjjaraki. Uka wawar katjjapjje ukhajja, janiw katki ukakejj kusiskiti jan ukasti taqeniw kusisipjje. Jiwasampejj ukhamarakiwa, machaq discipulonakarojj taqeniw congregacionan yanaptʼsna. Territorio predicasiñapatakis taqeniw yanaptʼaraksna, kunapachatï maynejj tantachäwinakar jutjje ukhajj taqeniw kusisiraktanjja.

JEHOVÁ DIOSARUS JAQE MASISARUS MUNASIPJJAÑÄNI

15. ¿Kunas jukʼamp kusisit predicañatakejj yanaptʼistani? (Mateo 22:37-39; foto uñjjattʼarakïta).

¹⁵ Jiwasatï Jehová Diosampir jaqe masisampir munasiñäni ukhajja, jukʼamp kusisitaw predicañäni (Mateo 22:37-39 liytʼäta). Jehová Diosajj jiwasar predikir uñjasajj wali kusisitäpachawa, jaqenakajj Bibliat yateqañ qalltasajj wal kusisipjjarakini. Ak jan armasimti, khitinakatï suma yatiyäwinak katoqasipki Diosar serviñ amtapkaraki ukanakajj salvasipjjaniwa (Juan 6:40; 1 Tim. 4:16).

16. Janis utat mistuñ puedkstanjja, ¿kunjamsa predicasajj kusisitäsna? Mä experienciamp uk qhanañchtʼam.

¹⁶ Jumatï utat jan mistuñ puedkstajja, taqe kunanaktï Jehová Diosampir jaqe masimampir munasitamat lurkasma ukar chuym ucham. COVID-19 pandemianjja, Samuel jilatampi Dania kullakampejj janiw utat mistupjjañapäkänti. Uka tiempon teléfono toqew predicapjjäna, cartanak qellqapjjäna, Zoom toqew jaqenakarojj Bibliat yatichapjjarakïna. Samuel jilatajj cáncer usutak tratamiento katoqaskäna ukhajja, clinican predicakipunirïnwa. Jilatajj akham siwa: “Jan walinakan uñjasisajj qaritaw jikjjatassna, llakisiraksnawa, Diosar serviñans aynachtʼjjaraksnawa. Ukatwa Jehová Diosar servisajj wal kusisktan ukham kusisitäñ muntanjja” sasa. Uka jan walinak pasasipkäna ukhajja, Dania kullakajj tinkusaw usuchjasïna, ukatwa kimsa phajjsinakajj ikiñankañapäna. Ukatjja sojjta phajjsinakaw silla de ruedan sarnaqañaparakïna. Kullakajj akham siwa: “Taqe kunanaktï lurañ puedkayäta ukanak lurañatakiw chʼamachasiyäta. Visitkitäna uka enfermeraruw predicayäta, alatanak utajar apanirapipkitäna ukanakarus Diosat parlarakiyätwa. Doctoranakar materialanak aljki uka empresan trabajir mä warmimpis wali sum teléfono toqejj parlapjjarakiyäta” sasa. Samuel jilatampi Dania kullakampejj janis nayrjam lurañ puedjjapjjchïnjja, kuntï lurirjamäpkäna uk lurasajj wali kusisitäpjjänwa.

17. ¿Aka yatichäwin yateqawayktan uka ewjjtʼanakajj kuna pachakis wali sum yanaptʼistani?

¹⁷ Aka yatichäwin yateqawayktan taqe ukanakarjam lurañatak chʼamachasiñäni ukhajja, wali sum yanaptʼistani. Sapa ewjjtʼajj kunanakatï manqʼa phayañatakejj wakiski ukanakamp sasiwa. Taqe ukanakajj phukur wakisitarjam sum uchaski ukhajja, manqʼajj wali sumawa. Taqe uka ewjjtʼanakarjam lurañäni ukhajja, janiw kunas aynachtʼaykistaniti, jukʼamp kusisitaw predicarakiñäni.