‘Oraqpachan Juezaparus’ khuyaptʼayasitaparus confiyapjjañäni

1. ¿Kunsa Jehová Diosajj Abrahanar yatichäna?

ABRAHANATAKEJJ mä angelamp parlatapajj jan armkañapunïpachänwa. Jehová Diosajj mä ángel toqew Abrahanarojj Sodoma ukat Gomorra markanakar tukjañ amtatap yatiyäna. Abrahanajj taqe chuymas Jehová Diosar confiykchïnjja, kunatsa uk lurañ amtäna uk amuyañajj jupatak chʼamakïnwa. Ukatwa akham sasin jisktʼäna: “Cheqapar sarnaqer jaqenakarojj ¿cheqapunit jan wali jaqenakamp chik tʼunjäta? […] ¿Janit oraqpachan Juezapajj kunatï cheqapäki uk lurkani?” sasa. Jehová Diosajj wali pacienciampiw munat amigopar ak yatichäna: jupajj janipuniw cheqapar sarnaqer jaqenakarojj tukjkaniti. ¡Uk yatiñajj walpun chuymachtʼistu! (Gén. 18:23-33).

2. ¿Kunatsa Jehová Diosajj cheqaparjamaw khuyaptʼayasis juzgui sasin sissna?

² Jehová Diosajj cheqaparjamaw khuyaptʼayasis juzgui sasajj ¿kunatsa sissna? Kuna laykutejj kunatï jaqen ‘chuymapan utjki’ ukwa Jehová Diosajj uñji (1 Sam. 16:7). Cheqas jupaw ‘sapa mayni jaqen chuymap yati’ (1 Rey. 8:39; 1 Crón. 28:9). ¡Ukajj wali musparkañapuniwa! Niyakejjay Jehová Diosajj wali yatiñanïchejja, kunjamsa jupajj juzgui uk janiw awisajj taqpach amuyksnati. Ukatwa apóstol Pablojj akham säna: “Amtatanakapas jan yatjjatkayawa” sasa (Rom. 11:33).

3, 4. ¿Kunanaksa jisktʼassna, ukat kunsa aka yatichäwin yatjjataskañäni? (Juan 5:28, 29).

³ Awisajj Abrahanjamaw akham sasin jisktʼassna: “¿Jehová Diosajj Sodoma ukat Gomorra markanakankir jaqenakar tukjkäna ukanakat yaqhepajj jaktanipjjpachäniti? ‘Jan cheqapar sarnaqer jaqenakajj’ jaktanipkani ukhajj ¿jupanakajj jaktanipjjarakpachäniti?” sasa (Hech. 24:15).

⁴ Kunsa jaktaniñ toqet jichhajj amuyjjtan ukwa amuykiptʼaskañäni. Khitinakatï ‘jakañatak jaktanipkani’ khitinakatï ‘juzgatäñatak jaktanipkani’ uka toqetjja, jichhanakakiw machaq qhanañchäwinak katoqawaytanjja (Juan 5:28, 29 liytʼäta).a Ukanakajj yaqha cambionak lurañatakiw yanaptʼawayistu, uka toqetwa aka yatichäwinsa jutïr yatichäwins yatjjataskañäni. Nayraqatajj Jehová Diosan juzgatapat kunsa jan yatktan ukwa yatjjataskañäni, ukjjarusti Jehová Diosan juzgatapat kunsa yattan ukwa yatjjataskarakiñäni.

¿KUNSA JAN YATKTANJJA?

5. Sodoma ukat Gomorra markanakan jiwarapkäna uka jaqenakat ¿kamsayätans nayrajja?

⁵ Jehová Diosajj jan cheqaparjam sarnaqer jaqenakarojj Sodoma ukat Gomorra markanakarjamaw tukjäna. ¿Kunas jupanakampejj pasani? Nayrajja, uka jaqenakajj janiw jaktanipkaniti sasaw sayätanjja, ukampis jukʼamp yatjjatasasa oracisasa, suma phoqeri amuyasir esclavojj janiw ukhamapunïniwa sasin sisksnati sasaw qhanañchistu. Kunatsa ukham sistan uk jichhajj uñjañäni.

6. ¿Kuna horasanakas Jehová Diosajj jan cheqapar sarnaqerinakat uñjkäna ukanakar tukjäna, ukat kunsa jan yatktanjja?

⁶ Jehová Diosajj jan cheqapar sarnaqerinakat yaqheparojj tukjänwa sasaw Bibliajj qhanañchi. Uma Juicionjja oraqenkir taqe jaqenakaw jiwarapjjäna, Noé chachampi familiapampikiw salvasipjjäna. Qhepatjja, Suma Oraqenkapkäna uka paqallqo markankirinakar jiwarayapjjam sasaw Jehová Diosajj israelitanakar mä orden churäna. Yaqha horasanjja, Jehová Diosajj mä ángel toqew 185.000 asirio soldadonakar mä arumanak jiwarayäna (Gén. 7:23; Deut. 7:1-3; Is. 37:36, 37). Uka jaqenakarojj wiñayatakiw Jehová Diosajj tukjäna, janiw jaktanipkaniti sañatakejj janiw Bibliajj taqpachpun qhanañchkiti. Uk jichhajj jukʼamp sum yatjjatañäni.

7. Uma Juiciona jan ukajj Canaán markan jiwarapkäna uka jaqenakat ¿kunsa jan yatktanjja? (Dibujo uñjjattʼäta).

⁷ Kunjamsa Jehová Diosajj uka jaqenakat sapa maynir uñjäna uk janiw yatktanti, janïr jiwkasajj Jehová Diosar uñtʼañatakisa arrepentisiñatakis oportunidadanïpjjänti janicha uk janirakiw yatktanti. Uma Juicio tiempot parlkasinjja, Noé chachajj ‘kunatï cheqapäki uk yatiyirïnwa’ sasaw Bibliajj qhanañchi (2 Ped. 2:5). Ukampis mä jachʼa arca lurkasajj oraqpachankir taqe jaqenakar predicañatakiw chʼamachasïna sasajj janiw siskiti. Canaán markankir jan wali jaqenakajj taqenit Jehová Diosar uñtʼapjjäna janicha, jan wali luräwinaks jaytapjjänti janicha uk janiw yatktanti.

8. ¿Kunsa Sodoma ukat Gomorra markanakankir jaqenakat jan yatktanjja?

⁸ ¿Sodoma ukat Gomorra markanakankir jaqenakat kamsaraksnasa? Cheqapar sarnaqer Lot chachajj Sodoma markanwa jakäna, ukampis uka markankir taqe jaqenakarut predicäna janicha uk janiw yatktanti. Cheqas jupanakajj jan wali jaqenakäpjjänwa, ukampis ¿kunatï walïki jan walïkaraki uk amuyapjjänti? Amuyatajj janiw uk amuyapkänti, kuna laykutejj Sodoma markankir chachanakajja, “waynitut jilïrkamaw” Lot chachan invitadonakapampejj ikintasiñ munapjjäna sasaw Bibliajj qhanañchi (Gén. 19:4; 2 Ped. 2:7). ¿Wali khuyapayasir Jehová Diosajj uka jaqenakat janiw maynirus jaktaykaniti sissnati? Cheqas janiw uka markan ni tunka cheqap sarnaqer jaqenakas utjkiti sasaw Jehová Diosajj Abrahanar säna (Gén. 18:32). Ukhamajj uka jaqenakajj jan cheqapar sarnaqer jaqenakäpjjänwa, Jehová Diosajj jupanakar tukjasajj cheqapar uñjir Diosätapwa uñachtʼayäna. Ukhamajj ¿jan cheqapar sarnaqer jaqenakajj jaktanipkani ukhajj janiw uka jaqenakat ni maynis jaktankaniti sasin sissnati? Janiw ukhamapunïniwa sasin sisksnati.

9. ¿Kunsa Salomonat jan yatktanjja?

⁹ Biblianjja, yaqhep cheqapar sarnaqer jaqenakajj jan cheqapar sarnaqer jaqenakaruw tukjjapjjäna sasaw qhanañchi. Ukanakat maynïrejj Salomón reyïnwa, jupajj sum Jehová Diosar uñtʼäna, kunjam adorañs yatirakïnwa. Walja bendicionanakwa Diosat katoqarakïna. Ukampis tiempompejj falso diosanakaruw adorañ qalltjjäna. Uk luratapat Jehová Diosajj wal colerasïna, Salomonan juchanakap kawsajj markpachaw walja maranak tʼaqesirakïna. Bibliarjamajja, Salomonajj jiwjjäna ukhajj “nayra awkinakapampiw samartʼjjäna”, jupanakat maynïrejj Diosat jan jitheqtir David reyïnwa (1 Rey. 11:5-9, 43; 2 Rey. 23:13). Ukampis ¿nayra awkinakapamp imtʼatätap laykojj Salomonajj jaktanpachäniti? Bibliajj janiw uka toqet kamskisa. Yaqhepanakajj inas jaktaniniwa sasin sapjjchispa. Kuna laykutejj Romanos 6:7 textojj akham siwa: “Maynejj jiwjje ukhajja, juchanakapat perdonatäjjewa” sasa. Uka textojj janiw taqpach jiwatanakas jaktanipjjañapäkaspa ukham sañ munkiti, janirakiw maynejj jiwatap laykus jaktaniñatak derechonïkaspa ukham sañ munkiti. Jiwatat jaktaniñajj Jehová Diosan mä regalopawa, munasiñatwa jaqenakar jaktayarakini, ukhamatwa wiñayatak jupar servipjjañapatak mä oportunidad churi (Job 14:13, 14; Juan 6:44). ¿Salomonajj uka jaqenakat maynïrïpachäniti? Jehová Diosakiw uk yati, janiw jiwasajj yatktanti. Akakwa yattanjja: Jehová Diosajj cheqaparupuniw kuns lurani.

¿KUNSA YATTANJJA?

10. ¿Kunjamas Jehová Diosajj jan wali jaqenakar tukjasajj jikjjatasi? (Ezequiel 33:11; dibujo uñjjattʼarakïta).

¹⁰ (Ezequiel 33:11 liytʼäta). Jehová Diosajj kunjamas maynir juchañchasajj jikjjatasi ukwa qhanañchistu. Pedrojj Diosan amuytʼayataw kuntï Ezequiel profetajj qellqkäna uka pachp qellqarakïna. Jupajj akham sänwa: “Jehová Diosajj […] janiw khitin jiwañapsa […] munkiti” sasa (2 Ped. 3:9). Uka arunakajj wal chuymachtʼistu. Jehová Diosajj janiw jan razonanejj khitirus wiñayatak tukjkiti, janiw ukat payachasktanti. Jupajj wali khuyapayasiriwa, wakiski ukhajj khuyaptʼayarakiwa.

11. ¿Khitinakas jan jaktanipkani, ukat kunjamatsa uk yattanjja?

¹¹ ¿Khitinakan jan jaktanipjjañapsa yattanjja? Bibliajj mä qhawqhanitakwa parli.b Jesusajj janiw Judas Iscariotejj jaktankaniti sasaw qhanañchäna (Mar. 14:21; Juan 17:12 liytʼasajj español arut utjki uka Biblia de estudion notap liytʼarakïta). Kuntï lurkäna ukajj Jehová Dios conträtapa Yoqap conträtap Judasajj yatïnwa, ukampis yatkasaw jupajj uk luräna (Marcos 3:29 liytʼasajj español arut utjki uka Biblia de estudion notanakap liytʼarakïta). Religión pʼeqtʼirinakat khitinakatï Jesús contra saytʼapkäna ukanakajj janiw jaktanipkaniti sasaw Jesusajj qhanañcharakïna (Mat. 23:33; Juan 19:11 liytʼasajj español arut utjki uka Biblia de estudion notapan “del hombre” siski ukwa liytʼarakïta). Apóstol Pablojja, jan arrepentisipki uka apostatanakajj janiw jaktanipkaniti sasaw sarakïna (Heb. 6:4-8; 10:29).

12. ¿Kunsa Jehová Diosan khuyapayasirïtapat yattanjja? Mä sarnaqäwimp uk qhanañchtʼam.

¹² Kunjamtï yatjjatawayktanjja, Jehová Diosajj wali khuyapayasiriwa, “janiw khitin jiwañapsa jupajj munkiti”. ¿Kunjamsa Jehová Diosajj jachʼa juchar purtʼasipkäna ukanakat khuyaptʼayasïna? David reyejj adulterio jucharuw purtʼasïna, jaqe masiparuw jiwayarakïna, ukanakajj wali jachʼa juchanakänwa, ukampis arrepentisitapat Jehová Diosajj khuyaptʼayasïnwa, perdonarakïnwa (2 Sam. 12:1-13). Manasés reyejj sinti jan walinakpunwa jakäwipan luräna. Uka reyejj sinti jan walinaksa lurkchïnjja, taqe chuyma arrepentisitapat Jehová Diosajj jupat khuyaptʼayasïnwa, perdonarakïnwa (2 Crón. 33:9-16). Khuyaptʼayasiñatak razonajj utjki ukhajja, Jehová Diosajj khuyaptʼayasipuniwa, ukwa uka pä sarnaqäwinakajj amtayistu. Jupajj Davidampir Manasesampir jaktayaniwa, kuna laykutejj jachʼa juchanak lurapjjatap amuyasipjjänwa, arrepentisipjjarakïnwa.

13. 1) ¿Kunatsa Jehová Diosajj Nínive markankirinakat khuyaptʼayasïna? 2) ¿Nínive markankirinakat Jesusajj kamsarakïnsa?

¹³ Kunjamsa Jehová Diosajj Nínive markankirinakat khuyaptʼayasïna uk yatiraktanwa. Diosajj akham sasaw Jonasar säna: “Uka markan jan wali luratanakapatwa nayajj istʼta” sasa. Ukampis juchanakapat arrepentisipjjäna ukhajja, Jehová Diosajj jupanakat khuyaptʼayasïnwa, perdonarakïnwa. Jonasat sipansa, jukʼamp khuyaptʼayasirïtapwa Diosajj uñachtʼayäna. Coleraskäna ukhajja, Jehová Diosajj akham sasaw jupar amtayäna: “Jupanakajj janiw kunatï walïki jan walïki ukjja yatipkiti” sasa (Jon. 1:1, 2; 3:10; 4:9-11). Tiempompejj Jehová Diosan cheqapar uñjirïtapa khuyapayasirïtap qhanstayañatakejja, Jesusajj Nínive markankir jaqenakan arrepentisipjjatapatwa parläna, jupanakajj “juicio urun sartanipjjani” sasaw säna (Mat. 12:41).

14. ‘Juzgatäñatak jaktañajj’ utjkani ukhajj ¿kuna oportunidadas ninivitanakar churasini?

¹⁴ ¿Kawkïr juicionsa Nínive markankirinakajj jaktanipjjpachäni? Jesusajj jutïrin ‘juzgatäñatak’ juiciojj utjkani uka toqetwa parläna (Juan 5:29). Mä arunjja, Waranqa Maranak Apnaqkani uka tiempotwa Jesusajj parlaskäna, uka tiemponwa “cheqapar sarnaqer jaqenakasa jan cheqapar sarnaqer jaqenakas” jaktanipjjani (Hech. 24:15). Jan cheqapar sarnaqer jaqenakajj “juzgatäñatakiw jaktanipjjani”, kuna laykutejj yateqapkani uk istʼapjjeti janicha, ukarjamat sarnaqapjje janicha ukwa Jehová Diosampi Jesusampejj uñjapjjani. Mä ninivitatï jaktanini, ukampis Jehová Diosar jan adorañ munkani ukhajja, jiwayataw uñjasini (Is. 65:20). Ukampis Jehová Diosat jan jitheqtañ amtani ukhajj wiñayatakiw jakani (Dan. 12:2).

15. 1) Sodoma ukat Gomorra markankirinakat janiw khitis jaktankaniti sasin ¿kunatsa jan sisksna? 2) ¿Judas 7 textonkir arunakajj kamsañsa muni? (“¿Kamsañs Judasajj munaskäna?” sat recuadro liytʼäta).

¹⁵ Jesusajja, khitinakatï juparusa yatichäwinakaparus rechazapki ukanakajj ‘Juicio Urun Sodoma, Gomorra markanakat sipansa jukʼamp jan walin uñjasipjjani’ sasaw säna (Mat. 10:14, 15; 11:23, 24; Luc. 10:12). ¿Uka tiempon jakir jaqenakajj Sodoma ukat Gomorra markanakankir jaqenakat sipans jukʼamp jan walïpkaspas uk uñachtʼayañatakit Jesusajj ukham säna? Amuyatajj janiw ukhamäkiti. Ninivitanakajj Juicio Urun sartanipjjani sasin Jesusajj siskäna ukhajja, cheqpach jaktañatwa parlaskäna. Ninivitanakasa Sodoma ukat Gomorra markanakankirinakas jan walinakwa lurapjjäna. Ukampis ninivitanakajj arrepentisipjjänwa. Ak amtañäni, “khitinakatï jan walinak lurapki” ukanakatakejja, ‘juzgatäñatak jaktañaw’ utjani sasaw Jesusajj säna (Juan 5:29). Amuyatajj inas Sodoma ukat Gomorra markankirinakatak mä suytʼäwejj utjchini. Inas jupanakat mä qhawqhanejj jaktanipjjchini, inas Jehová Diosampir Jesusampir uñtʼapjjañapatak yanaptʼarakchiñäni.

16. ¿Kunjamsa Jehová Diosajj maynir jaktayañatakejj amti? (Jeremías 17:10).

¹⁶ (Jeremías 17:10 liytʼäta). Uka textojja, kuntï yatktan uk wali sum qhanañchistu: Jehová Diosajj ‘jaqen chuymapsa’ ‘jaqen amuyunakapsa’ uñakipapuniwa. Jehová Diosajj khitinakarus jaktayani uk amtkani ukhajja, ‘sapa mayniruw sarnaqataparjam’ pago churani. Wakisini ukhajja, Jehová Diosajj kuntï siski uk phoqasiyaniwa, ukampis wakiskani ukhajja, khuyaptʼayasirakiniwa. Ukhamajj mä jaqejj janiw jaktankaniti sasajj janiw sisksnati, Bibliatï maynin jaktaniñapat qhanañchchi ukhakiw jan payachasis uk sissna.

“ORAQPACHAN JUEZAPAJJ KUNATÏ CHEQAPÄKI” UKPUN LURANI

17. ¿Jiwatäjjapjje uka jaqenakampejj kunas pasani?

¹⁷ Adanampi Evampejj Supayamp mayachtʼasis Jehová Dios contra saytʼasipkäna ukhatpachaw millón millón jaqenakajj jiwarapjje, ‘enemigosana’, mä arunjja jiwañan utjatapatwa walja jaqenakajj jiwarapjje (1 Cor. 15:26). ¿Jiwapkäna taqe uka jaqenakampejj kunas pasani? Diosat jan jitheqtiri uka 144.000 ajllit cristianonakajja, alajjpachan jakañatakiw jaktapjjani ukat jan jiwiri cuerponïpjjarakiniwa (Apoc. 14:1). ‘Cheqapar sarnaqer jaqenakajj’ jaktanipkani ukhajja, Jehová Diosar munasipkäna uka chachanakat warminakat waljaniw jaktanipjjani, jupanakatï Cristojj Waranqa Maranak Apnaqkani uka tiemponsa qhep qhepa yantʼans Diosat jan jitheqtapkani ukhajja, wiñayatakiw aka oraqen jakapjjani (Dan. 12:13; Heb. 12:1). Uka tiemponjja, “jan cheqapar sarnaqer” jaqenakajj jan wali luratanakap cambiapjjañapataki, Jehová Diosar adorapjjañapatakiw oportunidadajj churasini, jupanakat yaqhepajj janipuniw Jehová Diosar serviwayapkänti, “jan walinakwa lurapjjarakïna” (Luc. 23:42, 43). Ukampis yaqhepajj sinti jan wali jaqenakäpjjänwa, Dios contra saytʼasiñpunwa munapjjäna, ukatwa Jehová Diosajj jupanakar jan jaktaykaniti (Luc. 12:4, 5).

18, 19. 1) Kunanaktï Jehová Diosajj jiwatanakar jaktayañ toqet amtkani ukarojj ¿kunatsa confiysna? (Isaías 55:8, 9). 2) ¿Kunanakatsa jutïr yatichäwin yatjjataskañäni?

¹⁸ Jehová Diosajj jaqenakar juzgki ukhajja, cheqaparupuniw amti, janiw ukat payachasktanti. Jiwasajj Abrahanjamarakiw “oraqpachan Juezapajj” perfectötapa, khuyaptʼayasirïtapa, wali yatiñanïtap yattanjja. Jehová Diosaw Yoqaparojj juzgañapatak encargawayi, kunjamsa juzgañapa uks yatichawayaraki (Juan 5:22). Jehová Diosampi Yoqapampejj kunas jaqen chuymapan utji uk yatipjjaspawa (Mat. 9:4). Ukhamajj taqe kunanwa “kunatï cheqapäki” uk lurapjjani.

¹⁹ Jehová Diosarus amtanakaparus confiyapjjapuniñäni. Jiwasat sipansa Jehová Diosakiw jaqenakar juzgaspa (Isaías 55:8, 9 liytʼäta). Jehová Diosampi Jesusampiw taqe kuns juzgapjjani sasaw confiytanjja. Jiwasajj ak yattanwa, Reyisäki uka Jesusajj Awkipjam cheqapar uñjiri khuyaptʼayasirirakiwa (Is. 11:3, 4). Ak yatiraktanwa, jachʼa tʼaqesiñ tiempon kunjamsa Jehová Diosampi Jesusampejj jaqenakar juzgapjjani uka toqet kunsa jan yatktan kunsa yatiraktan ukwa jutïr yatichäwin yatjjataskañäni.