Jehová Diosajj ‘jakkir Diosawa’

1. Walja jan walinakan uñjaskasas ¿kunas Jehová Diosar serviskakiñatakejj yanaptʼistaspa?

“CHʼAMA tukuña jan wali tiemponakaw utjani” sasaw Bibliajj jichha tiempot qhanañchi (2 Tim. 3:1). Aka jan wali mundon taqeniw problemanakanïtanjja, yamas Jehová Diosan servirinakapajj jarkʼata arknaqata ukhamaw uñjastanjja. ¿Kunas ukhamanakan uñjaskasas Jehová Diosar adoraskakiñatakejj yanaptʼistaspa? Mayajj akawa: Jehová Diosan ‘jakkir Diosätap’ amtaña (Jer. 10:10; 2 Tim. 1:12).

2. ¿Kunsa Jehová Diosajj sum uñjaski, ukat kunjamsa ukajj chʼamañchtʼistu?

² Kuna jan walinakansa uñjastan uk Jehová Diosajj sum uñjaski, ukatwa kunjamats yanaptʼañ munapunistu (2 Crón. 16:9; Sal. 23:4). Kunjamsa Jehová Diosajj cuidistu, yanaptʼapunistu uk amtañajja, kunayman jan walinakan aguantañatakiw chʼam churistu. Kunjamsa ukajj David reyir yanaptʼäna uk jichhajj uñjañäni.

3. “¡Jehová Diosajj jakaskiwa!” sasajj ¿kamsañsa Davidajj munaskäna?

³ Davidajj Jehová Diosar uñtʼänwa, confiyarakïnwa. Kunapachatï Saúl reyisa yaqhanakas jupar arknaqapkäna ukhajja, Diosaruw yanaptʼa mayïna (Sal. 18:6). Kunjamsa Jehová Diosajj oracionapar istʼäna, yanaptʼarakïna uk uñjasajja, Davidajj akham sänwa: “¡Jehová Diosajj jakaskiwa!” sasa (Sal. 18:46). Ukham sasinjja, janiw Davidajj Diosan utjatapatak parlkänti. Mä qellqatajja, ‘Davidajj markapar kutin kutin yanaptʼir jakkir Diosaruw confiyäna’ sasaw qhanañchi. Davidajj kunjamsa Diosajj jakäwipan yanaptʼäna ukwa uñjäna, ukaw Jehová Diosan jakkir Diosätapat jan payachasiñatakejj yanaptʼäna, Diosar serviskakiñatakisa, jachʼañchaskakiñatakis chʼam churarakïna (Sal. 18:28, 29, 49).

4. Jehová Diosan jakkir Diosätapat jan payachasiñajj ¿kunjamanakatsa yanaptʼistu?

⁴ Jehová Diosan jakkir Diosätapat jan payachasiñajja, jupar taqe chuym serviñatakiw yanaptʼistani. Kunayman jan walinakan aguantañatakisa, jupatak wal trabajiñatakis chʼamañchtʼistaniwa. Ukhamarus jupa jakʼankaskakiñatakiw yanaptʼarakistani.

JAKKIR DIOSAW CHʼAM CHURÄTAM

5. ¿Jan walinakar confianzamp saykatañatakejj kun amtañas yanaptʼistu? (Filipenses 4:13).

⁵ Jiwasatï jakkir Diosätapatsa, jiwasar yanaptʼapunirïtapats amtañäni ukhajja, jan walinakajj jachʼäpans jiskʼäpans aguantañatakiw yanaptʼistani. Ukhamarus jupatakejj janiw kuna jan waltʼäwis jachʼäkiti, jupajj Taqe Chʼamani Diosawa, kunayman jan walinakan aguantañatakiw chʼam churistaspa (Filipenses 4:13 liytʼäta). Ukaw jan walinakar confianzamp saykatañatakejj yanaptʼistu. Kunjamsa Jehová Diosajj mä jiskʼa jan waltʼäwin yanaptʼistu uk uñjañajja, jachʼa jan waltʼäwinakan aguantañatakejj yanaptʼarakitaniwa sasin confiyañatakiw yanaptʼistu.

6. ¿Kunanakas Jehová Diosar jukʼamp confiyañatakejj David waynitur yanaptʼäna?

⁶ Kunanakas Davidar pasäna ukat kunjamsa ukajj Jehová Diosar jukʼamp confiyañatak yanaptʼäna uk uñjañäni. Waynitüskäna ukhajja, tatapan ovejanakap awatiskäna ukhaw mä leonajj jutasin mä oveja apasïna, yaqha horasan mä osow jutarakïna, ukhamarakiw mä ovej apasïna, ukampis Davidajj leonarus osorus jan ajjsartʼas arktasaw ovej aparasinïna. Ukham lurañatakejj Jehová Diosaw chʼam churäna, ukatwa Davidajj jupa pachpajj jan jachʼañchaskänti (1 Sam. 17:34-37). Davidajj janipuniw ukanak armkänti. Uka toqenakat lupʼiñajja, jakkir Diosaw jutïrin yanaptʼitani sasin jukʼamp confiyañatakiw jupar yanaptʼäna.

7. ¿Kunarus Davidajj chuym uchäna, ukat kunjamsa ukajj Goliat contra nuwasiñatakejj yanaptʼäna?

⁷ Kunapachatï Davidajj qʼajjo waynitüskäna ukhajja, Israelan campamentopankir ejercitoruw visitir saräna, ukanjja kunjamsa soldadonakajj wal ajjsarayasipjjäna ukwa uñjäna, kuna laykutejj Goliat sat filisteo jachʼa jaqew jupanakar akham säna: “Nayajj cheqapuniw jichhürojj Israelan ejercitop contrajj saytʼaskta” sasa (1 Sam. 17:10, 11). Goliat chachajj kunja jachʼänsa, kunsa jupanakar sarakïna ukar chuym uchasakiw soldadonakajj wal ajjsarayasipjjäna (1 Sam. 17:24, 25). Ukampis Davidajj janiw ukham amuykänti. Kuntï Goliatajj siskäna ukajj ‘jakkir Diosan ejercitoparus jiskʼachkaspa’ ukhamwa amuyäna, janiw Israelan ejercitop contrakis parlkaspa ukhamäkänti (1 Sam. 17:26). Davidatakejj Jehová Diosaw nayrankäna. Kunjamtï Jehová Diosajj ovejanak aparasiniñatak yanaptʼkitänjja, ukhamarakiw jichhajj yanaptʼitani sasaw jupajj confiyäna. Jehová Diosan yanaptʼapampejja, Davidajj Goliat chachamp nuwasiriw saräna, ukatsti ¡juparojj atipjänwa! (1 Sam. 17:45-51).

8. ¿Kunas jan walinakan uñjaskañäni ukhajj Jehová Diosar jukʼamp confiyaskakiñatakejj yanaptʼistani? (Foto uñjjattʼarakïta).

⁸ Jiwasajj Davidjamarakiw yantʼanakar atipjsna, ukatakejj jakkir Diosan jiwasar yanaptʼañatak jankʼakïtapwa amtañasa (Sal. 118:6). Kunanaktï Diosajj nayra tiempon lurkäna ukanak amtañajja, Jehová Diosajj yanaptʼapunitaniwa sasin jukʼamp confiyañatakiw yanaptʼistani. Ukatakejja, kunjamsa Jehová Diosajj nayra servirinakapar yanaptʼäna uk amtañatakiw Biblia liytʼañama (Is. 37:17, 33-37). Kunjamsa Jehová Diosajj jichha tiempon jilat kullakanakar yanaptʼaski uk yatiñatakejja, jw.org cheqanwa yatjjatasma. Kunjamsa Jehová Diosajj jakäwiman yanaptʼawaytam ukanakwa amtarakisma. Inas kunjamsa Jehová Diosajj mä osompit mä leonampit Davidar salväna ukham mä musparkañ experienciajj jan utjkstamti. Ukhamäkchisa, Jehová Diosajj kunaymaninakwa juma laykojj lurawayi. Jupajj amigopäñamatakiw invittanjja (Juan 6:44). Jupan yanaptʼapampiw jupar serviskaraktajja. Ukhamajj kunjamsa Diosajj oracionanakam jaysäna, kuntï necesitkayäta uk horasaparupun churayätam jan ukajj kunjamsa jan waltʼäwinakan cuidayätam ukanak amtañatak jupar yanaptʼa mayim. Kunanaksa Jehová Diosajj juma layku lurawayi ukanakat lupʼiñajja, jutïrin yanaptʼaskakitaniwa sasin jukʼamp confiyañatakiw yanaptʼätam.

9. ¿Jan waltʼäwinakan uñjasisajj kunsa amtañasa? (Proverbios 27:11).

⁹ Yantʼanakan uñjaskañäni ukhajja, kunatï wali importantëki ukaruw chuym uchañasa, jan waltʼäwinakan uñjasisajj Jehová Diosar apanukjjaksnasa ukhamwa Diablojj parli (Job 1:10, 11; Proverbios 27:11 liytʼäta). Ukampis Jehová Diosat jan jitheqtasajj jupar munasitaswa uñachtʼaytanjja, Supayan kʼarïtapwa uñachtʼayaraktanjja. Inas jakaskta uka lugarankir gobiernojj Jehová Diosan markap contra saytʼchi, inas qollqet pistʼat uñjasiraksta, jan ukajj inas jaqenakajj suma yatiyäwinak predicatajj jan istʼañ munapkchiti, jan ukajj inas yaqha jan walinakan uñjasiraksta. Ukhamächi ukhajj ak amtañamawa, kuna jan walitï pasasktam ukajja, Jehová Diosar kusisiyañatak mä oportunidadawa. Janirak ak armamti, jupajj janiw jan aguantirjamäkta ukat jukʼamp yantʼatäñam munkaniti (1 Cor. 10:13). Aguantañatakiw chʼam churätam.

JAKKIR DIOSAW PAGO CHURÄTAM

10. ¿Kunsa Diosajj jupar adoririnakar churani?

¹⁰ Jehová Diosajja, jupar adoririnakarojj pago churapuniwa (Heb. 11:6). Jichha tiemponjja, sumankaña kusisiñwa churistu, jutïrinjja wiñay jakañwa churarakistani. Jehová Diosajj pago churistaniwa, uk churañatakejj chʼamanirakiwa sasaw taqe chuym confiytanjja. Ukatwa jupa laykojj wal trabajtanjja, kunjamtï nayra tiempon Diosat jan jitheqtir servirinakajj lurapkäna ukhama. Ukwa Timoteojj lurarakïna (Heb. 6:10-12).

11. ¿Kunas Timoteorojj congregacionan wal trabajiñatak yanaptʼäna? (1 Timoteo 4:10).

¹¹ (1 Timoteo 4:10 liytʼäta). Timoteojj jakkir Diosaruw suytʼäna. Diosajj pago churitaniwa sasaw taqe chuym confiyarakïna. Ukatwa Jehová Dios laykusa mayninak laykus wal trabajirakïna. ¿Kunsa jupajj luräna? Apóstol Pablojj suma yatichirïñapataki, suma arstʼirïñapataki, waynanakatakis jilïrinakatakis yateqaskayäñapatakiw jupar chʼamañchtʼäna. Chʼama asignacionanakaw jupar churasirakïna, khitinakarutï ewjjtʼañajj wakiskäna ukanakaruw munasiñamp qhan ewjjtʼañapäna (1 Tim. 4:11-16; 2 Tim. 4:1-5). Awisajja kuntï Timoteojj lurkäna uk janiw khitis uñjkänti jan ukajj janiw khitis ukat yuspärkänti, ukampis Jehová Diosaw pago churaskitani sasaw jupajj confiyäna (Rom. 2:6, 7).

12. ¿Kunas ancianonakarojj wal trabajiñatak yanaptʼaspa? (Foto uñjjattʼarakïta).

¹² Ancianonakajj Timoteo waynjamarakiw aka toqet jan payachasipkiti, Jehová Diosajj taqe chuym trabajipjjatap uñjaskiwa, valoranitwa uñjaraki. Ancianonakajj congregacionankirinakarojj sumwa uñjapjje, yatichapjjewa, predikiris sarapjjarakiwa. Janiw ukakïkiti, construccionansa, labores de socorro ukans walja ancianonakaw yanaptʼapjjaraki. Yaqhepanakajja Grupos de Visita a Pacientes jan ukajj Comités de Enlace con los Hospitales ukanakanwa yanaptʼapjjaraki. Congregacionajj Jehová Diosankiwa, janiw khiti jaqenkkisa, uk ancianonakajj sum yatipjje. Ukatwa lurañanakapamp taqe chuym phoqapjje, Jehová Diosaw pago churistani sasajj janiw akchʼas payachasipkarakiti (Col. 3:23, 24).

13. Jehová Diosajj jupar serviñatak wal chʼamachasitas uñjasajj ¿kunjamas jikjjatasi?

¹³ Janiw taqenis ancianöñ puedktanti, ukampis taqeniw Jehová Diosar mä kuns chursna. Qhawqsa jupar serviñatak chʼamachastan uk Diosajj wali valoranitwa uñji. Obra mundialatak churktan uka contribucionajj jukʼäkchis waljäkchisa, wali valoranitwa uk uñji. Ajjsarirïkasas tantachäwinakan comentañatak ampar aytatamatsa chuym ustʼayapktam ukanakar perdonatamats wal kusisiraki. Kuntï Jehová Dios layku lurkta ukajj jumatak jukʼakïkchisa, qhawqtï lurirjamäkta uk luratam wali valoranitwa jupajj uñji. Niyakejjay jupajj wal munasstamjja, jumarojj chʼamachasitamat pago churätamwa (Luc. 21:1-4).

JAKKIR DIOSAN JAKʼAPANKAPJJAÑÄNI

14. ¿Kunjamsa Jehová Diosan jakʼapankañajj jupat jan jitheqtañatak yanaptʼistu? (Foto uñjjattʼarakïta).

¹⁴ Jiwasatï Jehová Diosar mä suma amigosarjam uñjañäni ukhajja, jupat jan jitheqtañajj janiw kuna chʼamäkanisa. Joseampejj ukaw pasäna, jupajj janipuniw qʼañu jucha lurañ munkänti. Mä suma amigoparjamaw Diosar uñjäna, janirakiw chuym ustʼayañ munkänti (Gén. 39:9). Jehová Diosar mä suma amigosarjam uñjañatakejja, jupar orañatakisa, Arupat yatjjatañatakis tiemp apstʼasiñasapuniwa. Ukhamatwa jupampejj urut urutjam jukʼamp sum apasiñäni. Jiwasatï José waynjam Jehová Diosamp wali sum apasiñäni ukhajja, janipuniw kunatï jupar chuym ustʼaykaspa uk lurkañäniti (Sant. 4:8).

15. ¿Kuna jan waltï israelitanakajj wasaran lurapkäna ukanakat kunsa yateqsna? (Hebreos 3:12).

¹⁵ Jehová Diosan jakkir Diosätapat armasipki ukanakajja, facilakwa jupat jitheqtapjjaspa. Israelitanakajj wasarankapkäna ukhajj kunas pasäna uk amuytʼañäni. Jehová Diosan utjatap yatipkchïnsa, kuntï necesitktan uk churpachïstaniti janicha sasaw payachasipjjäna. Akham sas kunaw jisktʼasipjjarakïna: “¿Jehová Diosajj jiwas taypinkiti, jan ukajj janicha?” sasa (Éx. 17:2, 7). Qhepatsti jupanakajj Dios contraw saytʼasipjjäna. Jiwasajj janiw jupanakat yateqasiñ munktanti (Hebreos 3:12 liytʼäta).

16. ¿Kunanak uñjasas Diosar confiyatasajj yantʼat uñjasispa?

¹⁶ Aka jan wali pachan Jehová Diosan jakʼapankañajj chʼamakiwa, Diosajj janiw utjkiti sasaw walja jaqenakajj sapjje. Amuyatajj Diosan munañap jan lurapki ukanakatakejj taqe kunas sumaruw sari. Ukanak uñjasajj Diosar confiyatasajj yantʼataw uñjasispa. Diosan utjatapat janiw payachasktanti, ukampis inas yanaptʼpachïtaniti janicha sasin payachasjjsna. Ukaw salmo 73 qellqerirojj pasarakïna. Kunjamsa Diosan leyinakap jan istʼirinakajj janis kunas paskaspa ukham disfrutasipkäna ukwa uñjäna, ukatwa Jehová Diosar serviñajj wakisipuniti janicha sasin jisktʼasjjäna (Sal. 73:11-13).

17. ¿Kunas Jehová Diosat jan jitheqtañatak yanaptʼistani?

¹⁷ ¿Kunas salmistarojj jan ukham amuyjjañatakejj yanaptʼäna? Jehová Diosar jan confiyjjapjje ukanakarojj kunas pasaspa uk lupʼiñaw yanaptʼäna (Sal. 73:18, 19, 27). Diosar serviñan kuna bendicionanakas utji ukwa amuytʼarakïna (Sal. 73:24). Jiwasajj ukhamarakiw Jehová Diosat katoqktan uka walja bendicionanakat lupʼiñasa, jupar jan servisajj kunjamas jakasisäna uks amuytʼañasarakiwa. Uk lurañaw Jehová Diosat jan jitheqtañatakejj yanaptʼistani, salmo qellqerjamaw akham sarakiñäni: “Nayatakejj Diosar jakʼachasiñajj wali sumawa” sasa (Sal. 73:28).

18. ¿Kunatsa jiwasajj kunatï jutïrin paskani ukar jan ajjsarañasäki?

¹⁸ Aka qhepa urunakan jan walinakar saykatsnawa, kuna laykutejj ‘jakkiri cheqpach Diosan esclavopäpjjtanwa’ (1 Tes. 1:9). Jehová Diosajj sum cuidistu, yanaptʼapunistuwa. Nayra tiempon servirinakaparojj yanaptʼänwa, jichha tiempons yanaptʼarakistaniwa. Niyaw jachʼa tʼaqesiñajj qalltani, ukampis janiw sapäktanti (Is. 41:10). “Ukhamajj jan ajjsarapjjañäniti, jan ukasti akham sapjjañäni: ‘Jehová Diosaw yanapirijajja, janiw ajjsarkäti’” sasa (Heb. 13:5, 6).