Aka revista liytʼirinakan jisktʼäwinakapa
Salmo 12:7 texton “jumaw jupanakarojj imäta” siski ukajj ¿‘llakit jaqenakatti’ parli (versículo 5), jan ukajj ‘Diosan arunakapatcha’ parli (versículo 6)?
Kuna toqetsa uka capitulon parli ukaw jaqenakat parlaskatap uñachtʼayistu.
Salmo 12:1-4 textonjja, Davidajj “confiykañ jaqenakas jaqenak taypit tukusjjewa” sasaw säna. Jichhajj Salmo 12:5-7 textot yatjjatarakiñäni, ukan akham siwa:
“Jehová Diosajj akham siwa: ‘Llakitanakan tʼaqesiyatäpjjatapatsa,
pobrenakan llakirtʼasipjjatapatsa,
nayajj sartasïwa.
Nayaw jupanakarojj jiskʼachirinakapat salväjja’ sasa.
Jehová Diosan arunakapajj qʼomawa,
arunakapajj hornor qʼomachat qollqer uñtasitäpjjewa, paqallq kuti qʼomachatäpjjewa.
Jehová Dios Tata, jumaw jupanakarojj imäta,
jupanakat sapa maynirojja aka tiempon jakir jaqenakat qalltasin wiñayatakiw jumajj jarkʼaqäta” sasa.
Versículo 5 ukanjja, Diosajj llakitanakar salvaniwa sasaw qhanañchi.
Versículo 6 ukanjja, “Jehová Diosan arunakapajj qʼomawa, [...] qʼomachat qollqer uñtasitäpjjewa” sasaw qhanañcharaki. Diosat jan jitheqtir cristianonakajj ukan cheqätapwa uñjtanjja (Sal. 18:30; 119:140).
Jichhajj Salmo 12:7 textot amuytʼarakiñäni, ukan akham siwa: “Jehová Dios Tata, jumaw jupanakarojj imäta, jupanakat sapa maynirojja aka tiempon jakir jaqenakat qalltasin wiñayatakiw jumajj jarkʼaqäta” sasa. Jupanakarojj ukat jupanakat sasajj ¿kunatsa parlaski?
Niyakejjay versículo 6 ukan ‘Diosan arunakapat’ parlchejja, versículo 7 ukan Diosan arunakap imañatsa parlkaspa ukhamwa yaqhepajj amuyapjjaspa. Cheqas Diosaw Bibliar imäna jan ukajj jarkʼaqäna, kuna laykutejj walja enemigonakapaw Bibliar jarkʼañsa tukjañsa munapjjäna (Is. 40:8; 1 Ped. 1:25).
Kuntï versículo 5 ukan siski ukajj cheqarakiwa, Jehová Diosajj ‘tʼaqesiyatäpki uka llakitanakarojj’ jutïrin yanaptʼaskakiniwa, salvarakiniwa (Job 36:15; Sal. 6:4; 31:1, 2; 54:7; 145:20).
Jupanakarojj ukat jupanakat sasajj ¿kunatsa versículo 7 ukan parlaski?
Uka versiculot jukʼamp sum amuytʼasajj jaqenakat parlaskatapwa amuytanjja.
Salmo 12:1 textonjja, kunjamsa jan wali jaqenakajj Diosat jan jitheqtir jaqenakar engañjapjjäna uka toqetwa parli. Ukjjarusti lajjrap jan sum apnaqer jaqenak contraw saytʼäjja sasaw Diosajj qhanañchi. Salmo qellqatarjamajja, arunakapan qʼomätap laykojj markap favoraw saytʼani.
Ukhamajj versículo 7 ukan “jumaw jupanakarojj imäta”, ‘sapa mayniruw’ jarkʼaqäta siski ukajja, jan wali jaqenakamp tʼaqesiyatäpki ukanakatwa parlaski.
Jupanakarojj ukat jupanakat siski uka arunakajja, Hebreo Arut Qellqatanakan nayra copianakaparjamajj walikïskiwa. Hebreo arut griego arur traducitäkäna uka nayrïr Qellqatanakanjja, versículo 7 (11:8, Septuaginta) ukan pay kutiw jiwasa arojj uñsti, ukajj Diosat jan jitheqtir llakitanakata, tʼaqesiyatanakatwa parlaski. Ukhamarus Sal. 12:7, 8 textonjja, Jehová Diosajj jupat jan jitheqtirinakat ‘sapa mayniruw’ jan walinak lurañar chʼamañchirinakat jarkʼaqäjja sasaw qhanañchi. Arameo arur traducitäki uka tárgum sat qellqatanakanjja, versículo 7 ukan akham siwa: “TATA, jumaw cheqapar sarnaqer jaqenakarojj jarkʼaqäta, jumaw aka tiempon jakir jan wali jaqenakat qalltasin wiñayatak jarkʼaqäta” sasa. Ukhamajj Salmo 12:7 textojj janiw Diosan arunakapat parlkiti, ukwa taqe ukanakajj uñachtʼayistu.
Ukhamasti uka versiculorjamajj Diosaw jupat jan jitheqtirinakarojj jarkʼaqani, uka suytʼäwinïpjjewa.