¿Kunatï kʼarïki kunatï cheqäki uk amuyasmati?

1. ¿Cheqa yatichäwirojj kunjamsa jumajj uñjta?

DIOSAN Arupankir cheqa yatichäwinakjja, Jehová Diosan servirinakapajj wal munastanjja, ukarjamaw Diosar confiyaraktanjja (Rom. 10:17). Jehová Diosaw ‘kunatï cheqäki ukan columnapäki katjjäsiripäkaraki’ uka cristiano congregación uttʼayirejja (1 Tim. 3:15). Irpapkistu ukanakarojj taqe chuymaw istʼtanjja, kuna laykutejj Biblian cheqa yatichäwinakap sum qhanañchtʼapjjestu, Diosan munañap lurañatak yanaptʼkistu uka instruccionanakwa churapjjarakistu (Heb. 13:17).

2. Santiago 5:19 textorjamajj ¿kuna jan walinsa Jehová Diosan servirinakapajj uñjassna?

² Cheqa yatichäwinak yateqkasasa, Diosan markapar istʼañapunïtas yatkasas kunatï cheqäki ukat jitheqtsnawa, ukajj janipuniw walïkaspati (Santiago 5:19 liytʼäta). Supayajja, Bibliar jan confiyjjsna jan ukajj Jehová Diosan organizacionapan instruccionanakapar jan istʼjjsna ukwa muni (Efes. 4:14).

3. ¿Kunatsa kunatï cheqäki ukat janipun saraqañasäki? (Efesios 6:13, 14).

³ (Efesios 6:13, 14 liytʼäta). Markanakan Jehová Dios contra saytʼapjjañapatakejja, niyaw Diablojj kunayman kʼarinak uñstayani (Apoc. 16:13, 14). Ukhamarus Supayajja, urut urutjamaw Jehová Diosan servirinakapar jukʼamp engañjañatak chʼamachasini (Apoc. 12:9). Ukatwa kunatï kʼarïki kunatï cheqäki uk amuyañ yateqañasajj wali wakiskirejja (Rom. 6:17; 1 Ped. 1:22). Jachʼa tʼaqesiñat salvasiñatakejj ukwa yateqañasa.

4. ¿Kunanakatsa aka yatichäwin yatjjataskañäni?

⁴ Aka yatichäwinjja, kawkïris Biblian cheqa yatichäwinakapajj uk amuyañatakisa, Jehová Diosan markapan ewjjtʼanakap istʼañatakis kunjam chuymanïñas yanaptʼistaspa ukwa pä toqet yatjjataskañäni. Kunatï cheqäki ukat janipun saranukuñatakejj kunanaksa lurañasa ukwa kimsa toqet yatjjataskarakiñäni.

KUNATÏ CHEQÄKI UK AMUYAÑATAKEJJ ¿KUNJAM CHUYMANÏÑAS WAKISI?

5. ¿Jehová Diosar ajjsarañampi kunatï cheqäki uk amuyañampejj kunansa niya pachpakïpjje?

⁵ Jehová Diosaruw ajjsarañasa. Jehová Diosar ajjsartan ukhajja, jupar wal munasitas laykojj janipuniw kunatï jupar chuym ustʼaykaspa uk lurktanti. Kunatï walïki kunatï jan walïkaraki uk yateqañwa muntanjja, kunatï cheqäki kunatï kʼarïkaraki uk yateqañs munaraktanwa, ukhamat Jehová Diosamp suma uñjatäñataki (Prov. 2:3-6; Heb. 5:14). Janipuniw jaqer ajjsaratasajj Jehová Diosar wal munasktan ukat sipans jukʼamp jachʼäñapäkiti, kuna laykutejj kunatï jaqenakar gustki ukajja, Jehová Diosarojj janiw gustkaspati.

6. ¿Jaqenakar ajjsarañajj kunarus tunka uñaqer chachanakarojj purtʼasiyäna?

⁶ Diosar ajjsarañat sipans jaqeruk wal ajjsarsna ukhajja, kunatï Jehová Diosan cheqa yatichäwinakap conträki ukanakarukiw creyjjsna. Jehová Diosajj israelitanakar churañatak arskäna uka oraq uñaqer sarapkäna uka 12 chachanakat amuytʼañäni. Jupanakat tunkanejj Jehová Diosar wal munasipkäna ukat sipans cananeonakaruw wal ajjsarapjjäna, ukatwa akham sapjjäna: “Janiw jiwasajj uka jaqenak contra nuwasirejj makatksnati, uka jaqenakajj jiwasat sipansa jukʼamp chʼamanïpjjewa” sasa (Núm. 13:27-31). Jaqenakan amuyuparjamajja, israelitanakat sipans cananeonakajj jukʼamp chʼamanïpjjänwa, cheqas ukhamapunïskänwa. Ukampis janiw enemigonakasar katuntañ puedkañäniti sasin amuyasajja, Jehová Diosatwa armasisipkäna. Kuntï Jehová Diosajj israelitanakan lurapjjañap munkäna ukaruw chuym uchapjjañapäna. Mä jukʼa nayrajj kunsa Jehová Diosajj jupanak laykojj luräna ukats amtasipjjañaparakïnwa. Uktï lurapjjaspänjja, cananeonakajj janiw taqe chʼamani Diosarojj atipjañ puedipkaniti sasaw amuyapjjaspäna. Ukampis Josué chachampi Caleb chachampejj janiw jupanakjamäpkänti, jupanakajj Jehová Diosaruw confiyapjjäna, jupamp suma uñjatäñwa munapjjarakïna. Ukatwa markankirinakarojj akham sapjjäna: “Jehová Diosatejj sum uñjchistu ukhajja, cheqpachapuniw uka oraqer irpistani, ukatsti churarakistaniwa” sasa (Núm. 14:6-9).

7. Jehová Diosar jukʼamp ajjsarañatakejj ¿kunas yanaptʼistani? (Dibujo uñjjattʼarakïta).

⁷ Jehová Diosar jukʼamp ajjsarañatakejj ¿kunas yanaptʼistani? Janïr mä amtar purkasajj kunas jupar kusisiyi uk amtañaw yanaptʼistani (Sal. 16:8). Mä sarnaqäwi Biblian liytʼasajj akham sasin jisktʼasim: “Nayatï ukankiriskayäta ukhajj ¿kun lurañsa amtiriskayätjja?” sasa. Tunka uñaqer chachanakas yatiyasipkiristam ukhamwa amuytʼasma. ¿Kuntï sapktam ukar creyisajj jaqer ajjsarañampit apayasjjasma? Jan ukajj ¿Jehová Diosar wal munasitamampi, jupamp sum uñjayasiñ munatamampich jilankaspa? Kuntï Josué chachampi Caleb chachampejj sapkäna ukan cheqätap janiw taqpach israelitanakajj amuyapkänti, ukhamïpan ¿kunas pasäna? Janiw suma oraqerojj mantapkänti (Núm. 14:10, 22, 23).

8. ¿Kunjam chuymanïñatakis chʼamachasiñasa, ukat kunatsa?

⁸ Humilde chuymanïñasawa. Jehová Diosajj kunatï cheqäki uk humilde chuymaninakarukiw yatiyi (Mat. 11:25). Biblian cheqa yatichäwinakap yateqkayätan ukhajj humilde chuymaniyätanwa, mayninakampis yanaptʼayasirakiyätanwa (Hech. 8:30, 31). Ukhamäkchisa, jachʼa jachʼa jan tukuñatakiw wal amuyasiñasa. Amuyunakasajj Biblian wiñay yatichäwinakapampi Jehová Diosan markapan instruccionanakapampejj igualakïkaspas ukhamwa jachʼa jachʼa tukuñajj amuyayistaspa.

9. ¿Kunas humilde chuymanïskakiñatakejj yanaptʼistani?

⁹ Humilde chuymanïskakiñatakejj ak amtañaw yanaptʼistani: Jehová Diosat sipans wali jiskʼakïtanwa (Sal. 8:3, 4). Humilde chuymanïñataki, jupamp yatichayasiñatakiw Jehová Diosar orasiraksna. Amuyunakasat sipansa, Arup toqe markap toqe yatichkistu uka amuyunak nayrankañapatakiw Jehová Diosajj yanaptʼistani. Biblia liytʼkasajja, qhawqsa Jehová Diosajj humilde chuymaninakarojj munasi ukwa amuytʼañama. Jachʼa jachʼa tukuñarusa wali wal tukuñarus qhawqsa uñisi uks amuytʼañamarakiwa. Mä jachʼa responsabilidad katoqkäta jan ukajj uk katoqatam mayninakajj amuyapjjani ukhaw humilde chuymanïñamajj jukʼamp wakisini.

KUNATÏ CHEQÄKI UKAT JAN SARAQAÑATAKEJJ ¿KUNSA LURAÑASA?

10. ¿Khitinak toqes Jehová Diosajj markapar irpi, ukat instruccionanaks servirinakapar churaraki?

¹⁰ Kuntï Jehová Diosan markapajj siskistu ukaruw confiyañasa. Nayra Israelanjja, Jehová Diosajj Moisés toqew markapar irpäna, ukatjja Josué chacha toqew instruccionanak markapar churarakïna (Jos. 1:16, 17). Uka chachanakar Jehová Diosan representanteparjam uñjapkäna ukhajja, israelitanakajj sumaw jakasipjjäna. Ukat walja maranak qhepat cristiano congregacionaw uttʼayasïna, uka congregacionarojj 12 apostolonak toqew Jehová Diosajj irparakïna (Hech. 8:14, 15). Qhepatjja, Jerusalenankir yaqha ancianonakaw jupanakampëjjarakïna. Niyakejjay jilat kullakanakajj Diosat jan jitheqtir uka chachanakan instruccionanakapar istʼapjjchïnjja, ‘congregacionanakajj jukʼampiw Diosar confiyapjjäna, urut urutjamaw yapjjattapjjarakïna’ (Hech. 16:4, 5). Jichhürunakanjja, markapar irpapki ukanakar istʼktan ukhajj Jehová Diosajj ukhamarakiw bendisistu. Ukampis jiwasatï predicación pʼeqtʼapjjañapatak ajlliwayki uka jilatanakar jan istʼjjsna ukhajj ¿kunjamas Diosajj jikjjatasispa? Uk yatiñatakejj israelitanakajj Suma Oraqer sarasipkäna ukhajj kunas pasäna uk amuytʼañäni.

11. ¿Markapar irpañapatak Jehová Diosajj ajllkäna uka Moisés contra saytʼasirinakarojj kunas pasäna? (Dibujo uñjjattʼarakïta).

¹¹ Israelitanakajj Suma Oraqer sarasipkäna ukhajja, yaqhep importante chachanakajj Moisés toqew parlapjjäna, kuna autoridadtï Jehová Diosajj jupar churkäna ukjjats parlapjjarakïnwa. Akham sapjjänwa: “Taqpach israelitanakajj santo jaqenakäpjjewa [janiw Moisés sapakejja], Jehová Diosajj jupanak taypinkarakiwa” sasa (Núm. 16:1-3). Jehová Diosatakejj ‘taqpach israelitanakaw’ santöpjjäna, ukampis jupajj Moisesaruw markapar irpañapatakejj ajllïna (Núm. 16:28). Ukhamajj Moisesar jiskʼachasajja, uka kutkatasir chachanakajj Jehová Diosaruw jiskʼachasipkäna. Janiw kuntï Jehová Diosajj munkäna ukar chuym uchapkänti, jan ukasti kuntï munapkäna ukarukiw chuym uchapjjäna, jupanakajj autoridadanïña aytatäñwa munapjjäna. Jehová Diosajj kutkatasiñatak pʼeqtʼapkäna uka chachanakarusa, jupanak toqet saytʼasipkäna uka walja israelitanakarus tukjänwa (Núm. 16:30-35, 41, 49). Jichhürunakan ukhamarakiwa, markapan pʼeqtʼapki ukanakar jan respetirinakarojj Jehová Diosajj janiw katoqkiti.

12. ¿Kuna razonanakatsa Jehová Diosan markapar confiyapuntanjja?

¹² Jehová Diosan markapar confiyaskakiñatakejj walja razonanakaw utjistu. Kunjamsa Biblian mä cheqa yatichäwipajj amuyasi uk mayjtʼayañ wakisitap amuyapjje ukhasa, jan ukajj kunjamsa Jehová Diosar servisiñapa uk mayjtʼayañ wakisitap amuyapjje ukhasa, Diosan markapar sarayirinakajj jankʼakiw cambionak lurapjje (Prov. 4:18). Taqe ukanak Jehová Diosar kusisiyañ laykuw lurapjje, ukhamarus Diosan Aruparjam amtanakar puriñatakiw wal chʼamachasipjje, Jehová Diosan taqe servirinakapajj ukhamwa lurañasaraki.

13. ¿Kunas ‘cheqa yatichäwinakajja’, ukat kunsa ukarjamajj lurañasa?

¹³ “Kuna cheqa yatichäwinaktï nayat katoqkta uka yatichäwinakjja arkaskakim” (2 Tim. 1:13). ¿Kunas ‘cheqa yatichäwinakajja’? Bibliankir cheqa yatichäwinakawa (Juan 17:17). Kunarutï creyktan taqe ukanakajj uka yatichäwinakjjar uttʼayatawa. Diosan markapajj ukarjam lurañatakiw yatichistu. Jiwasatï ukarjam lurañänejja, taqe kunas sumaruw sarani.

14. ¿Kunatsa yaqhep cristianonakajj ‘cheqa yatichäwinakar’ jan arkjjapjjäna?

¹⁴ ‘Cheqa yatichäwinakar’ jan arkjjsna ukhajj ¿kunas pasaspa? Kunas nayrïr patak maranakan pasäna uk amuytʼañäni. Yaqhep cristianonakajja, Jehová Diosan urupajj purinjjewa sasaw arunak apnaqapjjäna. Inas apóstol Pablon qellqatäkaspas ukham uka toqet parlir mä cartajj utjchïna. Uka arunakajj cheqäskapuniti janicha uk janïr yatjjatkasajja, Tesalonicankir yaqhep cristianonakajj creyipjjänwa, uka toqets mayninakar parlapjjarakïnwa. Jupanakatï Pablojj yatichkäna uka arunakapat amtasipjjaspäna ukhajja, janiw ukampejj engañjayasipkaspänti (2 Tes. 2:1-5). Kuntï istʼapkta ukanak janiw taqpach creyipjjañamäkiti sasaw apóstol Pablojj jupanakar ewjjtʼäna. Wasitat jan ukham engañjayasipjjañapatakejja, payïr cartapan aka arunakampiw tuktʼayäna, ukan akham siwa: “Naya Pablojj pachpa amparajamp qellqtʼasaw aruntaj apayanipjjsma. Ukham qellqanisaw taqpach cartanakajanjja nayan qellqanitaj uñachtʼayta. Nayajj ukham qellqerïtwa” sasa (2 Tes. 3:17).

15. ¿Cheqäkaspas ukham kʼari yatichäwinakat kunjamsa jarkʼaqassna? Mä uñachtʼäwimp uk qhanañchtʼam. (Fotonak uñjjattʼarakïta).

¹⁵ ¿Kuntï Pablojj Tesalonicankirinakar qellqkäna ukajj kunsa yatichistu? Jiwasatï kunatï jan Bibliarjamäki uk istʼañäni jan ukajj mä musparkañ yatiyäwi istʼañäni ukhajja, amuytʼasirïñasawa. Nayra Unión Soviética ukanjja, enemigonakasajj central mundialankkaspas ukhamwa mä carta uñstayapjjäna. Uka cartajja, yaqhep jilat kullakanakarojj yaqha organización uttʼayasipjjañapatakiw chʼamañchäna, kuntï uka cartajj siskäna ukajj cheqäpachaw sañjamäkchïnsa, Diosat jan jitheqtir jilat kullakanakajj janiw uka trampar jaltʼapkänti. Kuntï uka cartajj siskäna ukajja, janiw kuntï yateqapkäna ukarjamäkänti, ukwa jupanakajj amuyasipjjäna. Jichhürunakanjja, kunatï cheqäki ukan enemigonakapajj ukhamarakiw awisajj internet toqe, radio toqe ukat yaqha ukhamanak toqe pantjasiyañ munapjjestu, ukhamat tʼaqanoqtañasataki. Ukhamajj ‘jan amuyunakas jankʼaki mayjtʼayañatakejja’, kuntï istʼktan jan ukajj liytʼktan ukajj cheqa yatichäwinak yateqjjtan ukarjamati janicha ukwa sum amuytʼañasa (2 Tes. 2:2; 1 Juan 4:1).

16. Romanos 16:17, 18 textorjamajj ¿cheqa yatichäwinakat maysar saranukupki ukanakampejj kunsa lurañasa?

¹⁶ Jehová Diosat jan jitheqtapki ukanakat jan jitheqtapjjañäniti. Taqe jilat kullakanakajj mayachtʼat jupar sirvsna ukwa Diosajj muni, cheqa yatichäwinakar arkañäni ukhakiw jupar ukham sirvsna. Khitinakatï cheqa yatichäwinakat maysar saranukupki ukanakajja, congregacionarojj tʼaqanoqtayapjjewa. Ukatwa Diosajj jupanakat jitheqtañasatak mayistu, ukhamat cheqa yatichäwinakat jan jiwasar jitheqtayapjjañapataki (Romanos 16:17, 18 liytʼäta).

17. Jiwasatï kunatï cheqäki uk amuyañäni ukat ukar arkaskakiñäni ukhajj ¿kunas pasani?

¹⁷ Jiwasatï kunatï cheqäki uk amuyañäni, ukar arkaskakiñäni ukhajja, Diosar serviñan suma saytʼatäñäniwa, jupa jakʼankarakiñäniwa (Efes. 4:15, 16). Ukatjja janirakiw Supayan kunayman kʼarinakapampis yatichäwinakapampis engañjayaskañäniti, jachʼa tʼaqesiñ tiempons Jehová Diosajj jarkʼaqestaniwa. Cheqa yatichäwir taqe chuym arkaskakim, ukhamtï lurätajja “Diosan sumankañapajj” jumampïniwa (Filip. 4:8, 9).