Jehová Diosamp irpayasipunim

1. Kunatsa Jehová Diosamp irpayasiñasa uk mä uñachtʼäwimp qhanañchtʼam.

MÄ MONTENSA chhaqkasma ukham amuytʼañäni. Ukanjja walja salvaje animalanakampi, venenoni plantanakampi, kunayman kasta laqʼonakampiw utji. Inas mä qalar lanktʼasisajj jaqosirakchisma. Ukampis monten sarnaqañ yatir mä jaqetï irpiristam jan ukajj taqe uka jan walinakan jan uñjasiñamatak yanaptʼiristam ukhajj ¿waljjay yuspärasmajja? Aka mundojj uka monter uñtasitawa. Kunayman jan walinakaw utji, jukʼampis Diosar serviñan aynachtʼaykistaspa ukanakaw utji. Ukampis mä suma irpirinïtanwa, Jehová Diosaw irpirisajja. Jan walinakar jan purtʼasiñatakisa wiñayatak jakasiñäni uka machaq mundor puriñasatakis kawkïr thaknamas sarañasa uk jupaw uñachtʼayistu.

2. ¿Kunjamsa Jehová Diosajj irpistu?

² ¿Kunjamsa Diosajj irpistu? Jilapartejj Arup toqew irpistu, representantepäpki uka jaqenak toqew irparakistu. ‘Suma phoqeri amuyasir esclavo’ toqew manqʼar uñtat yatichäwinak churistu, uka yatichäwinakaw suma amtanakar puriñatak yanaptʼistu (Mat. 24:45). Ukampis Jehová Diosajj janiw jupanak toqekejj irpkistuti. Circuito jilatanakasa ancianonakas jan walinakar saykatañatakejj chʼamañchtʼapjjestuwa, ewjjtʼapjjarakistuwa. Kunjamsa Jehová Diosajj aka jan wali qhepa urunakan wali sum irpistu ukat wal yuspärtanjja. Ukhamatwa jupan amigopäskaksna, wiñay jakañar apki uka thaknamas saraskaksna.

3. ¿Kunanaksa aka yatichäwin yatjjataskañäni?

³ Jehová Diosajj wali sumsa irpkchistojja, awisajj jupamp irpayasiñajj chʼamakïspawa, jukʼampis pantjasir chachanak toqe irpkistu ukhaw jukʼamp chʼamäspa. ¿Kunatsa chʼamäspa? Inas jupanakajj kuntï istʼañ munkayätan uk jan sapkchistuti. “Ewjjtʼanakapajj janiw yanapkituti jan ukajj janiw nayatakjamäkiti, ukhamajj janiw Diosat jutkpachati” sasin inas amuystan. Ukampis uka horasanwa kunjamsa Jehová Diosajj markapar irpaski, kunatsa jupamp irpayasiñajj jukʼamp sumajja ukar jukʼamp confiyañajj wakisini. Jehová Diosar jukʼamp confiyañatakejja, aka kimsa toqetwa aka yatichäwin yatjjataskañäni: 1) Kunjamsa Jehová Diosajj markapar nayra tiempon irpäna, 2) kunjamsa jichhürunakan irpaskistu, 3) jupamp irpayasiñajj yanaptʼistuwa.

¿KUNJAMSA JEHOVÁ DIOSAJJ ISRAEL MARKAR IRPÄNA?

4, 5. ¿Kunjamsa Jehová Diosajj Moisés toqe israelitanakar irpaskatap uñachtʼayäna? (Dibujo uñjjattʼäta).

⁴ Jehová Diosajj Moisesaruw israelitanakar Egiptot irpsuñapatakejj uttʼayäna, Moisés toqe jupanakar irpaskatapjja, pruebanakampiw jupanakar qhan uñachtʼayäna. Ukanakat mayajj akänwa: urojj mä qenay jupanakajj uñjapjjäna, arumasti mä nina uñjapjjarakïna (Éx. 13:21). Moisesajj uka qenayampir ninampiruw arkäna, ukhamatwa jupasa israelitanakas Mar Rojo ukar puripjjäna. Mä toqet Mar Rojomp jarkʼantata, maysa toqet egipcio ejercitomp muyuntat amuyasipjjäna ukhajja, israelitanakajj wal ajjsarayasipjjäna. Jiwasar akar irpanisajj Moisesajj pantjasiwa sasaw amuyapjjarakïna. Ukampis Moisesajj janiw pantjaskänti. Jehová Diosaw Moisés toqejj israelitanakar uka lugarar irpaskäna (Éx. 14:2). Ukat musparkañ mä milagro lurasaw Jehová Diosajj jupanakar salväna (Éx. 14:26-28).

⁵ Diosan markapar wasarnam irpañatakejja, Moisesajj 40 maranakaw uka qenayar arkäna.a Awisanakajja, Jehová Diosajj Moisesan carpap patjjaruw uka qenay saytʼayäna, taqeniw uk uñjapjjarakïna (Éx. 33:7, 9, 10). Uka qenayatpachaw Jehová Diosajj Moisesar parlirïna, Moisesasti markaruw Diosan instruccionanakap yatiyarakirïna (Sal. 99:7). Ukhamajj kunjamsa Jehová Diosajj Moisés toqe jupanakar irpaskäna uk amuyañatakejj israelitanakajj walja pruebanakanïpjjänwa.

6. Jehová Diosan irpatäkasas ¿kunsa israelitanakajj lurapjjäna? (Números 14:2, 10, 11).

⁶ Jehová Diosaw Moisesarojj representantepat ajllïna, ukajj qhanäkchïnsa jilaparte israelitanakajj rechazapjjänwa (Números 14:2, 10, 11 liytʼäta). Moisesajj kuna luräwinïnsa uk janiw reconosiñ munapkänti, ukatwa Jehová Diosajj jupanakar Suma Oraqer jan mantaykänti (Núm. 14:30).

7. ¿Khitinakas Jehová Diosamp irpayasipjjäna? (Números 14:24; dibujo uñjjattʼarakïta).

⁷ Yaqhep israelitanakajj Jehová Diosampiw irpayasipjjäna. Jehová Diosajj akham sasaw säna: “Caleb servirijajj [...] taqe chuymaw nayar arkaskakitu” sasa (Números 14:24 liytʼäta). Diosajj jupar bendisïnwa, kawkjansa Canaán markan jakañ munäna uksa ajllisiyänwa (Jos. 14:12-14). Israelitanakat jutirinakajja, Caleb chachjamarakiw Jehová Diosamp irpayasipjjäna. Jupanakajj “Josué chacharojj taqe jakäwipan wal respetapjjäna”. Cheqas Jehová Diosaw Josué chacharojj Moisés lanti markar pʼeqtʼañapatakejj ajllïna (Jos. 4:14). Ukham lurapjjatapatjja, Jehová Diosajj jupanakar bendisïnwa, Suma Oraqerus mantayarakïnwa (Jos. 21:43, 44).

8. Reyinakan tiempopan ¿kunjamsa Jehová Diosajj markapar irpäna? (Dibujo uñjjattʼarakïta).

⁸ Walja maranak qhepatjja, Jehová Diosajj juezanakaruw markap irpapjjañapatakejj uttʼayäna. Uka qhepatjja, mä arunjja reyinakan tiempopanjja, profetanakaruw uk lurapjjañapatakejj uttʼayäna. Diosat jan jitheqtir reyinakajj profetanakan ewjjanakaparojj istʼapjjänwa. David reyejj humilde chuymampiw Natán profetan cheqañchatajj katoqasïna (2 Sam. 12:7, 13; 1 Crón. 17:3, 4). Jehosafat reyejj kuntï Jahaziel profetajj siskäna ukarojj istʼänwa, Judá markan jakirinakarus Diosan profetanakapar confiyapjjañapatakiw chʼamañchäna (2 Crón. 20:14, 15, 20). Ezequías reyejja, llakin uñjasisajj Isaías profetaruw yanap mayïna (Is. 37:1-6). Reyinakajj Jehová Diosamp sapa kut irpayasipjjäna ukhajja, jupanakajj bendisitäpjjänwa, markapas jarkʼaqatarakïnwa (2 Crón. 20:29, 30; 32:22). Kunjamsa Jehová Diosajj profetanak toqe markapar irpaskäna ukajj wali qhanänwa. Ukampis jilaparte reyinakas israelitanakas jupanakar rechazapjjänwa (Jer. 35:12-15).

¿KUNJAMSA JEHOVÁ DIOSAJJ NAYRÏR CRISTIANONAKAR IRPÄNA?

9. ¿Kunjamsa Jehová Diosajj nayrïr patak maranakan jakir cristianonakar irpäna? (Dibujo uñjjattʼarakïta).

⁹ Jehová Diosajj nayrïr patak maranakanwa cristiano congregación uttʼayäna. ¿Kunjamsa uka tiempon markapar irpäna? Jesusaruw congregacionar pʼeqtʼañapatakejj uttʼayäna (Efes. 5:23). Ukampis Jesusajj janiw kunsa mä cristianojj lurañapa uk sañatakejj sapa mayni cristianompejj parlkänti, jan ukasti Jerusalenankir apostolonak toqe ancianonak toqew jupanakar irpaskäna (Hech. 15:1, 2). Ukhamarus sapa congregacionanjja, jilat kullakanakar irpañatakejj ancianonakaruw uttʼayasïna (1 Tes. 5:12; Tito 1:5).

10. 1) ¿Kunjamsa nayrïr cristianonakajj instruccionanak katoqasipjjäna? (Hechos 15:30, 31). 2) ¿Kunatsa yaqhepajj Jehová Diosan representantenakapar jan istʼapkäna? (“¿Kunatsa yaqhepajj Jehová Diosajj jaqenak toqe markapar irpaskatap rechazapjje?” sat recuadro liytʼäta).

¹⁰ Nayrïr patak maranakan jakir cristianonakajj ¿kunjamsa instruccionanak katoqasipjjäna? Jupanakat jilapartejj taqe chuymaw katoqasipjjäna. “Chʼamañchtʼkir arunak katoqasajj wal kusisipjjäna” (Hechos 15:30, 31 liytʼäta). Ukampis ¿kunjamsa Jehová Diosajj jichha tiempon markapar irpaski?

¿KUNJAMSA JEHOVÁ DIOSAJJ JICHHA TIEMPON IRPASKISTU?

11. Kunjamsa Jehová Diosajj jichha tiempon representantenakap toqejj irpaski uk qhanañchtʼam.

¹¹ Jichha tiemponjja, Jehová Diosajj Biblia toqe ukhamarak congregación pʼeqtʼaski uka Yoqap toqew markapar irpaski. ¿Jaqenak toqe markapar irpaskakitap uñachtʼayañatakejj pruebanakajj utjiti? Jïsa utjiwa. Kunas 1870 mara qhepat pasäna uk amuytʼañäni. Charles Russell jilatampi yanapirinakapampejja, 1914 marajj Diosan Reinopatakejj wali importantewa sasaw amuyapjjäna (Dan. 4:25, 26). Biblian profecianakap yatjjatasaw ukham amuyapjjäna. Cheqas Jehová Diosaw ukham yatjjatapjjañapatakejj irpaskäna. Kunatï 1914 maran paskäna ukajja, Diosan Reinopajj apnaqañ qalltjjatapwa uñachtʼayäna, uka maraw Primera Guerra Mundialajj qalltäna, jan wali usunakasa, terremotonakasa, manqʼat pistʼañanakas utjarakïnwa (Luc. 21:10, 11). Kunjamsa Jehová Diosajj uka suma chuyman chachanak toqejj markapar yanaptʼaskäna ukajj qhanaw amuyasïna.

12, 13. Jukʼamp predicasiñapatakisa yatichasiñapatakis ¿kunas Segunda Guerra Mundialan lurasïna?

¹² Kunas Segunda Guerra Mundialan pasäna uk amuytʼarakiñäni. Central mundial ukan pʼeqtʼir jilatanakajj Apocalipsis 17:8 texto yatjjatapjjäna. Uka textot yatjjatasajj janiw Segunda Guerra Mundial pasatat Armagedonajj purinkaniti, jan ukasti jukʼamp jaqenakar predicañatakejj sumankañ mä tiempow utjani sasaw amuyapjjäna. Kunatï uka tiempotakejj jan waljamäkäna uka amtaruw Jehová Diosan markapajj purïna: Colegio Superior Bíblico de la Watchtower de Galaadb ukaw qalltäna. Uka escuelajj misioneronakar wakichtʼañatakiw uttʼayasïna, ukhamat oraqpachan yaqha lugaranakan predicapjjañapataki ukhamarak yatichapjjañapataki. Guerra tiemponjja kunayman markanakaruw misioneronakarojj khitasïna. Suma phoqeri esclavojj Curso en el Ministerio Teocráticoc ukwa uttʼayapjjarakïna, ukajj taqe publicadoranakar jukʼamp suma yatichirïpjjañapatak yanaptʼañatakïnwa. Taqe ukanakajj luräwinakapamp phoqapjjañapatakiw Jehová Diosan servirinakapar wakichtʼäna.

¹³ Kunjamsa Jehová Diosajj uka jan wali tiempon markapar irpäna ukajj qhanaw amuyasi. Segunda Guerra Mundialajj tukuyjjäna ukhat jichhakamajja, Jehová Diosan servirinakapajj librekiw walja lugaranakan predicasipki. Walja jaqenakaw Jehová Diosar uñtʼasipki, oraqpachanwa Diosan servirinakapajj predicasipkaraki.

14. Diosajj markap toqe ancianonak toqe irpkistu ukar ¿kunatsa confiyañasa? (Apocalipsis 2:1; foto uñjjattʼarakïta).

¹⁴ Jichha tiempon ukhamarakiw Cuerpo Gobernantejj Cristomp irpayasi. Churapki uka instruccionanakajj kunjamtï Jehová Diosas Jesusas amuyapki ukarjamäñapatakiw chʼamachasipjje. Uka instruccionanakjja, circuito jilatanak toqe ancianonak toqew congregacionanakar puriyapjje.d Uka ajllit ancianonakasa congregacionankir ancianonakas Criston ‘kupi amparapankapjjewa’ (Apocalipsis 2:1 liytʼäta). Niyakejjay jupanakajj pantjasirïpjjchejja, kunjamtï Moisesasa, Josué chachasa, apostolonakas pantjasipkäna ukhamarakiw awisajj pantjasipjje (Núm. 20:12; Jos. 9:14, 15; Rom. 3:23). Ukampis kunjamsa Jesusajj suma phoqeri esclavorusa ancianonakarus wali sum irpaski uk yattanwa, jupanakarojj ‘sapürupuniw akapachajj tukuskani ukapachkamajj’ irpaskakini (Mat. 28:20). Ukhamasti, kunjamsa Jesusajj uka jilatanak toqe irpistu ukar confiyañatakejj walja razonanakaw utjistu.

¿KUNJAMSA JEHOVÁ DIOSAMP IRPAYASIÑAJJ YANAPTʼISTU?

15, 16. ¿Kunsa Jehová Diosamp irpayasir jilat kullakanakat yateqta?

¹⁵ Jehová Diosamp irpayasiñajj jichha tiempons wal yanaptʼistu. Andy jilatampit Robyn esposapampit parltʼañäni, jupanakajj kunanakatï utjapktam ukanakampejj kusisitakïpjjam siski uka ewjjtʼaruw istʼapjjäna (Heb. 13:5). Ukham lurañaw Jehová Diosan markapan construccionan serviñatak yanaptʼäna. Kullakajj akham siwa: “Wali jiskʼa utanakanwa jakapjjayäta, janiw phayasiñatakejj mä lugaras utjirïkiti. Fotonak apsuñajj wal gustitu, ukampis jilaparte camaranakajsa accesorionakapsa alj-jjayätwa. Ukanak aljatajat jachaqtʼaskchiyätsa, Abrahanan Sara esposapat yateqasiñwa munayäta, qhepar uñtañat sipans nayraruw uñtayäta” sasa (Heb. 11:15). ¿Ukham lurapjjatapat kusisitäpjjpachati? Kullakajj akham saskakiwa: “Taqe kunanakatï utjapkitu ukanak Jehová Diosar churasajj wali kusisitäpjjtwa. Jehová Diosatak sapa kut trabajisajja, machaq mundon jakañajj kunjamänisa uk wali sum amuyapjjta” sasa. Andy jilatajj akham sarakiwa: “Diosan Reinopatak wal trabajisajj wali kusisitäpjjtwa” sasa.

¹⁶ ¿Kunjamsa Jehová Diosamp irpayasiñajj yanaptʼarakistu? Marcia kullakat parltʼañäni. Colegio tukuyjjäna ukhajja, precursorat serviñwa qalltäna (Mat. 6:33; Rom. 12:11). Jupajj akham siwa: “Mä universidadanjja, pusi maratakiw beca churañ munapjjetäna. Ukampis Jehová Diosaruw jukʼamp serviñ munayäta, ukatwa mantinisiñatakisa precursorat serviñatakis mä oficio estudiañ amtayäta. Ukham amtatajajj jakäwijan wali sumapunïnwa. Jichhajj precursora regularäjjtwa, trabajojan horariopajj Betelan voluntaria externa ukham serviñataki, yaqha ukhamanak lurañatakiw yanaptʼitu” sasa.

17. ¿Kunjamanakatsa Jehová Diosamp irpayasiñajj yanaptʼistu? (Isaías 48:17, 18).

¹⁷ Jehová Diosan markapajja, jan qollqe chuymäñasataki, kunanakatï Diosan leyinakap pʼakintaykistaspa ukanakat amuyasiñasatakiw ewjjtʼanak churistu. Ukanakan Jehová Diosamp irpayastan ukhajj yanaptʼistuwa, kuna laykutejj qʼoma conciencianïtanwa, janirakiw kuna jan walinakarus purtʼasktanti (1 Tim. 6:9, 10). Ukhamatwa Jehová Diosar jukʼamp sirvsna. Ukakipuniw kusisiñsa sumankañsa churistaspa (Isaías 48:17, 18 liytʼäta).

18. ¿Kunatsa Jehová Diosamp irpayasiñ munta?

¹⁸ Jachʼa tʼaqesiñ tiemponsa Waranqa Maranak Jesusajj Reyit apnaqkani ukhasa, Jehová Diosajj jaqenak toqe markapar irpaskakiniwa (Sal. 45:16). Kunanakatï lurañ gustkistu ukanak wal lurañ munkchiñäni ukhas ¿uka tiempon Diosamp irpayasiskakiñäniti? Jichhatï istʼasirïñänejja, jutïrin istʼasirïñajj jukʼamp facilakïniwa. Ukhamajj Jehová Diosamp irpayasisipkakiñäni, jiwasar cuidañatak uttʼayatäpki uka chachanakampis irpayasisipkakiñäni (Is. 32:1, 2; Heb. 13:17). Irpirisäki uka Jehová Diosar confiyañatakejj walja razonanakaw utjistu, kuna laykutejj kunanakatï jupamp sum apasitas aptʼasiykistaspa ukanakatwa jarkʼaqestu, wiñayatak jakaskañäni uka machaq mundor puriñatakis yanaptʼarakistuwa.