Diosaruw taqe llakinakap katuyäna

1, 2. 1) Anajj Diosar yupaychir sarañatak wakichasiskäna ukhajja, ¿kunatsa wal llaktʼaspachäna? 2) ¿Kunjamsa Anan sarnaqäwipajj yanaptʼistaspa?

ANAJJ Siló qollur sarañatakiw wal wakichasiskäna, janiw llakinakapat sint amtasiñ munkänti. Sapa marapuniw Elcana chachapajj Siló sat qollun jikjjataski uka tabernaculor Diosar yupaychapjjañapatak familiapar irpäna. Uka urunakajj wali kusiskañ urunakäñapänwa, ukwa Jehová Diosajj munäna (Deuteronomio 16:15 liytʼasiñapawa). Cheqas Anajj wawatpachwa Diosar ukham yupaychir sarasajj kusisit jikjjatasirïpachäna, ukampis uka qhepa maranakanjja llaktʼatakëjjänwa.

² Chachapajj wal jupar munasïna, ukaw jupatak wali askïna. Ukampis chachapajj yaqha warminirakïnwa, jupajj Penina satänwa. Uka warmiw jan walinak lurasajj Anarojj sapür chuym ustʼayäna. Yämas sapa mara Siló qollur kusisit sarapjjañapäkäna ukhaw jupar jukʼamp aynachtʼayäna. ¿Kun lurasas aynachtʼaypachäna? Ukat ¿kunjamsa Anan iyawsäwipajj ukanakar saykatañ yanaptʼpachäna? Jumatï llakinakampi qʼala aynachtʼat jikjjatasta ukhajja, Anan sarnaqäwipaw yanaptʼätamjja.

“¿Kunatsa ukataq llakitäta?”

3, 4. ¿Kuna pä jan waltʼäwinakansa Ana warmejj uñjasïna, ukat kunatsa uka jan waltʼäwinakajj qʼal aynachtʼaypachäna?

³ Ananjja, pä llakipaw utjäna sasaw Bibliajj qhanañchi. Maynïrejj akänwa, Elcanajj pä warminïnwa, ukhamajj mayni warmin uñisitaw Anajj uñjasïna, ukampis janiw ukajj añch llakisiykänti. Jupajj janiw wawanïñ puedkänti, ukaw jukʼamp llakisiyäna. Khitinakatï wawanïñ munapki uka warminakatakejj ukajj wali llakkañapuniwa. Ukampis Anan tiempopanjja jan wawanïñajj jukʼamp llakkañänwa, taqe familianakaw sutip jan chhaqtañapatakejj wawanïpjjäna. Ukatwa jan wawanïñajj jan walit uñjatäna ukat mä phenqʼarakïna.

⁴ Janitï Penina sat warmïkasapänjja, Anajj uka jan waltʼäwirojj sumakwa saykatasapäna. Cheqas walja warminïñajj janipuniw walïkiti. Sapa kutiw warmi pura uñchʼukisiñasa, nuwasiñanakasa ukat jan waltʼäwinakas utji. Ukatwa Diosajj Edén jardinan familia uttʼaykän ukhajja, Adán chachan walja warminakanïñap jan amtkänti (Gén. 2:24). Anan sarnaqäwipat yatjjatasaw kunatsa Bibliarjamajj walja warminïñajj jan walïki uk amuysna.

5. ¿Kunatsa Peninajj Anar wal tʼaqhesiyäna, ukat kunjamsa uk luräna?

⁵ Elcanajj Ana warmiparuw jukʼamp munasïna. Judionakan sarnaqäwiparjamajja, Elcanajj Anamp mä qawqha maranak jaqechatäjjäna ukhaw Peninamp jaqechasjjarakpachäna. Janiw uk sum yatktanti, ukampis kunjamsa Peninajj Anar kunayman toqet llakisiyäna ukajj qhanänwa. Wawanakanïtap laykuw Peninajj jachʼa jachʼa tuküna, ukat mayampi mayamp wawanïsajj jukʼampiw jachʼañchasïna. Ukampis Anar jan wawanïtap layku chuymachtʼañat sipansa, jukʼampikiw jiskʼachjjäna. Wal jiskʼachañ laykukiw ukham luräna sasaw Bibliajj qhanañchi (1 Sam. 1:6). Jïsa, Peninajj Anar chuym ustʼayañatakipuniw kuns luräna.

6, 7. 1) Elcanajj walsa chuymachtʼañ munkchïnjja, ¿kunatsa Anajj jan taq yatiykpachäna? 2) ¿Jan wawanïtapajj Diosan castigopäpachänti? (Qhanañchäwip uñjjattʼäta.)

⁶ Amuyatatjja, Siló sat qollun tabernaculojj utjkäna ukar sapa mara sarasaw Peninajj Anar chuym ustʼayäna. ¿Kunjamatsa? Peninan sapa mayni “yoqall, imill wawanakaparu[w]” Elcanajj kunatï Jehová Diosar loqtatäkäna, uka sacrificiot mä jiskʼakam churäna. Ukampis Anarojj jupa sapatakikiw churäna. Uk uñjasaw Peninajj jan wawanïtap jukʼamp amtayäna, ukatwa Anajj walpun jachaqtʼasïna janirakiw manqʼañs munjjänti. Elcanajj munat warmipar jan manqʼeri, wali llakit uñjasaw akham chuymachtʼäna: “Ana, ¿kunatsa jachta? ¿Kunatsa ukataq llakitäta, janiraki manqʼañsa munktati? ¿Janit nayasti jumatakisti tunka wawanakat sipansa askïktsti?” sasa (1 Sam. 1:4-8).

⁷ Kunatsa Anajj wali llaktʼatäna uk Elcanajj amuyasïnwa, ukaw wali askïna. Ukat wali munasiñampi arjjaytʼatapajj Anatakejj wali askïpachänwa.a Ukampis Elcanajj kuna jan walinaktï Peninajj lurkäna ukjja janiw arskänti, ukat Bibliarjamajja, Anajj janjamakiw chachapar uk awiskänti. Uka toqet parlasapäna ukhajja, inas jukʼamp jan walinakan jikjjataschispäna, ukwa Anajj amuytʼaspachäna. Ukat Elcanatï uka toqet yatisapäna ukhajja, ¿uka jan waltʼäw askichasapänti? ¿Janit Peninasa, wawanakapasa ukat servirinakapas Anar jukʼamp jiskʼachapjjasapäna? Inas Anajj sapürutjam jukʼamp jiskʼachat uñjaschisapäna, pachpa utapansa yaqhachata ukhama.

8. Jan wal lurapjjestu ukhajj “Jehová Diosaw cheqapar uñjaskani” sasin amtañajja, ¿kunatsa chuymachtʼistu?

⁸ Kuntï chuym ustʼayir Peninajj lurkäna ukjj janis Elcanajj yatkchïnjja, Diosaw ukanak sum uñjaskäna. Uñisiñata ukat envidiasiñat yaqhanakaru chuyma ustʼayapki ukat janis kunäkaspa ukham tukupki ukanakarojja, Jehová Diosaw taripaskani sasaw Bibliajj qhanañchi. Maysa toqetjja, cheqapar uñjir Diosaw tiempoparu ukat kunjamtï Jupajj munki ukarjam jan walinak askichaskani. Uk yatiñaw khitinakatï Ana warmjam suma jaqëpki ukat altʼat chuymanïpki ukanakarojj chuymachtʼi (Deuteronomio 32:4 liytʼasiñapawa). Anajj uk yatisarakiw Jehová Diosarojj atinispachäna ukat yanaptʼapsa mayisirakpachäna.

“Janirakiw mayamps llakiskjjänti”

9. Anajj jan waltʼäwinakan uñjasiñap yatkasasa janiw utapan qheparkänti, ¿kunsa ukajj yatichistu?

⁹ Sarapjjañapäkän uka alwajja, familpachaw wal wakichasisipkäna, wawanakas ukhamaraki. Efrainan utjkäna uka qollunakanjam sarasajj Siló qollur puriñkamajja, 30 kilometronak jilwa sarapjjañapäna.b Mä uru jan ukajj pä uru sarañankänwa. Kunsa Peninajj lurani ukjja Anajj yatjjänwa, ukampis janiw utar qheparkänti. Ukajj wali yateqaskañapuniwa. Maynin jan wal luratajj Diosat jitheqtsna ukhajja, janipuniw walïkaspati. Kuna bendicionanaktï aguantaskakiñasatak chʼam churkistaspa ukanaks janiw katoqksnati.

10, 11. 1) ¿Kunatsa Anajj tabernaculor jankʼak saräna? 2) ¿Kunjamsa Anajj alajjpachankir Awkipat maytʼasïna?

¹⁰ Mä uru jornalpach sarasaw Siló sat qollu uñjapjjäna. Uka qollojj yaqha jachʼa qollunakampi muyuntatänwa. Ukar jakʼachaskasajja, kunsa Jehová Diosar mayisini ukwa Anajj lupʼiskpachäna. Ukat niyak purisajja, manqtʼasiñatakiw taqenis qontʼasipjjäna. Ukampis Anajj jankʼakiw Jehová Diosan tabernaculopar saräna. Templo mantañ punkunwa Elí sacerdotejj qontʼataskäna. Ukhamarus Anajj kunsa Diosat mayisini uk lupʼisajj janiw ukankatap amuykpachänti. Tabernaculonjj Diosajj istʼapunitaniwa sasaw lupʼiskpachäna. Kunja llakitas jikjjatasïna uk janis khitis amuykchïnjja, alajjpachankir Awkipaw sum amuyänjja. Ukham llakit jikjjatasitapatwa Anajj wal jachäna.

¹¹ Jehová Diosar mayisiskäna ukhajja, jañchipajj khathatïnwa. Llakinakap Diosar yatiyañatak suma arunak amtasaw lakapas khathatirakïna. Kunjamsa jupajj chuymapan jikjjatasïna ukwa Diosar yatiyäna. Ukampis Anajj janiw wawanïñak maykänti, jupajj janiw katoqañak suykänti, jan ukasti kunsa Diosar churasapäna ukwa amuytʼasirakïna. Ukatwa Diosar akham säna: ‘Mä yoqall wawa apayanitätajja, nayajj uka wawjja jumar serviritakiw uywä’ sasa (1 Sam. 1:9-11).

12. Anan mayisitapajja, ¿kunsa Diosar mayisiñ toqet yatichistu?

¹² Kunjamsa Diosajj jupar mayisiñas muni ukwa Anan mayisïwipat yateqsna. Kunjamtï mä wawajj wali munasir awkipar taqe kuns awistʼaskejja, ukham yatiyapjjeta sasaw Jehová Diosajj wali khuyaptʼayasiñapat markaparojj sistu (Salmo 62:8; 1 Tesalonicenses 5:17 liytʼasiñapawa). Diosar mayisiñ toqet parlkasajj akham sasaw Pedrojj Diosan amuytʼayatäsajj qellqäna: “Taqe llakisiñanakamsti Diosar jaytapjjarakim, jupasti jumanakatjja llakisirakiwa” sasa (1 Ped. 5:7).

13, 14. 1) Anar uñjasajja, ¿kunsa Elí sacerdotejj jankʼak amuyäna, ukat kunatsa? 2) Anajj wali respetompiw Elí sacerdoter jay säna, ¿kunatsa ukajj wali yateqaskañajja?

¹³ Jaqenakajj janiw Jehová Diosjam khuyaptʼayasirïktanti. Anajj wali jachtʼasis Diosar mayisiskäna ukhajja, Elí sat jilïr sacerdotejj uñchʼukiskänwa, ukat akham sasaw säna: “¿Kunapachkamas ukan umatäskäta? ¡Vinjja apanukum!” sasa. Kunjamsa lakapajj khathatïna ukat wali chuyma ustʼatäkäna ukjja uñjänwa. Ukampis kunatsa ukham jachta sasin jisktʼañat sipansa machir warmitakwa uñjäna (1 Sam. 1:12-14).

¹⁴ Ukham wali llakimp aynachtʼata jikjjataskasinjja, jilïr sacerdoten machir warmit uñjatäñajj Anatakejj wali llakkañapunïpachänwa. Ukampis Anajj janiw maynin pantjasitap laykukejj Jehová Diosar serviñat jitheqtkänti, ukwa jiwasajj jupat yateqasiraksna. Kunats ukham jikjjatasïna ukjja, Anajj wali respetompiw Elí sacerdoter qhanañchäna. Uk istʼasajj inas Elí chachajj mä jukʼ phenqʼaschïna, ukatwa suma arunakamp akham säna: “Sumakiy sarjjam, Israelan Diosaparakiy jumarojj kuntejj maykta ukjja churpan” sasa (1 Sam. 1:15-17).

15, 16. 1) Tabernaculon Diosar yupaychasa ukat llakinakap katuyasajja, ¿kunjamsa Anajj jikjjatasïna? 2) Llakimpi aynachtʼat jikjjatasiñäni ukhajja, ¿kunsa Anat yateqassna?

¹⁵ Jehová Diosar llakinakap yatiyasasa ukat tabernaculon yupaychir sarasasa, ¿kunjamakis Anajj jikjjataspachäna? Bibliajj akham siwa: “Ukatsti Anajj kawkhattejj jutkän ukkharuw kuttanjjäna, manqʼasiriw sarjjaraki, janirakiw mayamps llakiskjjänti” sasa (1 Sam. 1:18). Anajj janiw jukʼamp llakisjjänti, alajjpachankir Awkiparuw taqe llakinakap katuyjjäna (Salmo 55:22 liytʼasiñapawa). Jïsa, nayrasa, jichhasa ukat jutïrinsa, ¡Jehová Diosatejj janipuniw kuna jan walinak askichañajj chʼamäkiti!

¹⁶ Llakimp wali aynachtʼat jikjjatasiñäni ukhajja, Anat yateqasisaw ‘mayisitanakar istʼiri’ Jehová Diosar llakinakas taqe chuyma yatiyañasa (Sal. 65:2). Ukhamtï mayisiñänejja, Diosaw jan jukʼamp llakisjjañatak samarañap churistani (Fili. 4:6, 7).

“¡Janiw jumat jukʼampejj khitis utjkiti!”

17, 18. 1) Kuntï Anajj Diosar arsuwaykäna ukajj walikïskatapjja, ¿kunjamsa Elcanajj uñachtʼayäna? 2) ¿Kunsa Peninajj amuyaspachäna?

¹⁷ Anajj tabernaculoruw chachapamp kuttʼäna. Inas kuntï Diosar arsuwaykäna ukjja chachapar yatiychïna, kuna laykutejj Moisesat katoqapkäna uka Leyirjamajja, warmejj chachapar jan yatiyasaki kuns Diosar arsuspäna ukhajja, chachajj warmipan arsutapjja ina chʼusaruw tukuyasapäna (Núm. 30:10-15). Ukampis Diosar taqe chuyma servir Elcanajj janiw warmipan arsutapjja ina chʼusar tukuykänti, jan ukasti janïr utapar kutʼkasajj Anamp chikaw Jehová Diosar yupaychäna.

¹⁸ ¿Kunapachas Peninajj Anar chuym jan ustʼayirjamäjjatap amuyaspachäna? Bibliajj janiw uk qhanañchkiti, ukampis “janirakiw mayamps llakiskjjänti” siski uka arunakajja, ukhat uksarojj kʼuchiki jikjjatasjjatapwa amuytʼayistu. Cheqansa, Anar chuym jan ustʼayirjamäjjatapjja, Peninajj amuyasjjpachänwa. Ukatwa Bibliajj jupat jan parljjeti.

19. ¿Kuna bendicionsa Anajj katoqäna, ukat ukajj Diosat jutatapjja kunjamsa uñachtʼayäna?

¹⁹ Mä qawqha phajjsinak qhepatjja, usur jaqëtap laykuw Anajj jukʼamp kusisïna. Ukampis uka wawajj Diosan mä bendicionapätapjja janiw armaskänti. Wawajj nasjjäna ukhajja, Samuel sasaw sutiyäna, uka sutejj “Diosan Sutipa” sañ muni, ukajj Jehová Diosar taqe chuyma atinisiñ toqer uñtayatawa, kunjämtejj Anajj lurkatayna ukhama. Anajj janiw uka maras ni uka pä qhepa maranakas chachapampi ukat familiapamp Siló sat cheqar sarkänti, jan ukasti utanwa asu wawampi ñuñ tʼaqʼañapkam qheparäna. Ukäñkamasti, wali munat wawapar tabernaculor Diosar serviñapatak jaytanjjañatakiw wakichasiskäna.

20. Kuntï Diosar arsuwayapkäna ukjja, ¿kunjamsa Anampi ukat Elcanampejj phoqhapjjäna?

²⁰ Wawapat jaljtañ horasajj purinjjänwa. ¡Anatakejj wali llakkañapunïpachänwa! Samuelojj tabernaculon irnaqapki uka warminakan wali suma uñjatäñapsa yatkchïnjja, Anajj janiw jiskʼa wawapat jaljtañ munkänti. Cheqansa, ¡janiw khiti taykas wawapat jaljtañ munkaspasti! Ukhamäkipansa, taqe chuymaw chachapampejj Diosar yupaychañapatak wawapar irpapjjäna. Sacrificionakwa Diosan utapan loqtapjjäna ukat Elí sacerdoten ukaruw Samuelur irpapjjarakïna, kuntï Anajj Jehová Diosar mä qawqha maranak nayrajj arsuwaykäna ukwa sacerdoter amtayapjjäna.

21. ¿Kunjamsa Anan mayisitapajj wali iyawsäwinïtap qhan uñachtʼayäna? (“Pä aski mayisïwinaka” sat recuadro uñjjattʼäta.)

²¹ Ukhaw Anajj Diosar mayisïna, uka arunakajj wali askïtapwa Diosajj uñjäna, ukatwa Biblian qellqayäna. 1 Samuel 2:1-10 qellqatanjja, Anajj kunja iyawsäwinïnsa ukaw qhan amuyasi. Jehová Diosajj jachʼa jachʼa tukurinakar jiskʼachañataki, tʼaqhesiyatanakar bendiciñataki ukat jiwayañatakisa, jan ukajj mayniru jiwañat qhespiyañatakisa, chʼamanïtap yatisaw Anajj Diosar jachʼañchäna. Ukatjja, qollanätapata, taqe kuns cheqapar uñjirïtapata ukat atiniskañätapatwa Diosar jachʼañcharakïna. Taqe ukanakatwa akham säna: “¡Janiw jumat jukʼampejj khitis utjkiti!” sasa. Kunapachatï jiskʼachatanakasa ukat tʼaqhesitanakasa Diosar yanaptʼa mayisipjje ukhajja, Jehová Diosajj jupanakatakejj atiniskañawa ukat imantaskañarakiwa.

22, 23. 1) ¿Kunatsa Samuelun awk taykapajj wal jupar munasipjjäna sasajj sissna? 2) ¿Kunjamsa Jehová Diosajj Anar bendiciskakïna?

²² Iyawsäwini taykanïñajj Samuel waynitutakejj wali askipunïnwa. Jupajj janisay Ana taykap jakʼan jilskchïnjja, janipuniw jaytanukutäkaspas ukham amuyaskänti. Tabernaculon serviskakiñapatakejj sapa marapuniw taykapajj mä machaqa isi aparapirïna. Ukhamatwa wawapar wal munasitap uñachtʼayäna (1 Samuel 2:19 liytʼasiñapawa). Uñjkasmas ukham amuytʼam, Anajj wawaparuw machaq isi usktʼasajj askichtʼaski, wawapar wali munasiñampiw uñkattʼasi ukat chʼamañchtʼkir arunakampiw arjjaytʼaskaraki. Ukham taykanïñajj mä bendicionapuniw Samuelotakejja. Ukat jupajj jilsjjani ukhasti awk taykapatakisa Israel markatakis mä bendicionarakïniwa.

²³ Anamp Elcanampejj phesqa wawanëjjapjjarakïnwa, Jehová Diosaw Anarojj ukham bendiciskakïna (1 Sam. 2:21). Ukampis taqe bendicionanakat sipansa, Jehová Dios Awkipampi sum apasiñaw jupatakejj jukʼamp jachʼa bendicionäna. Ukat sapa maratjamaw Diosampejj sum apasjjäna. Jiwasatï Anat yateqasiñäni ukhajja, jukʼampiw Diosarojj jakʼachasirakiñäni.