“Nayamp chikaw jumajj Paraisonkäta”

1. Jesusajj janïr jiwkäna ukhajja, ¿ladopankkäna uka jan walinak lurir jaqerojj kamsänsa? (Lucas 23:39-43).

JESUSASA ladopankkäna uka jan walinak lurir pä jaqenakasa tʼaqesisaw jukʼat jukʼat jiwasipkäna (Luc. 23:32, 33). Jan walinak lurir uka pä jaqenakajj Jesusat burlasipjjänwa, ukaw Jesusan jan discipulonakapäpjjatap uñachtʼayistu (Mat. 27:44; Mar. 15:32). Ukampis jupanakat maynïrejj arrepentisïnwa. Jupajj akham sänwa: “Jesús, Reinomar mantjjäta ukhajj nayat amttʼasitätawa” sasa. Jesusasti sarakïnwa: “Cheqpachapuniw nayajj jichhürun sissma: nayamp chikaw jumajj Paraisonkäta” sasa (Lucas 23:39-43 liytʼäta). Uka jan walinak lurir jaqejja, Jesusajj ‘alajjpachankir Reinot’ yatiykäna ukar creyïnwa sasajj janiw kunas qhanañchkiti. Jesusasti uka jan walinak lurir jaqejj alajjpachankir Reinor mantaniwa sasajj janirakiw siskänti (Mat. 4:17). Jesusajj aka oraqen utjañapäkäna uka jutïr Paraisotwa parlaskäna. ¿Kunjamatsa uk yattanjja?

2. ¿Kunatsa arrepentiskäna uka jan walinak lurir jaqejj judiöpachänwa sistanjja?

² Arrepentiskäna uka jan walinak lurir jaqejj inas judiöchïna. Uka jaqejj mayni jan walinak lurir chacharojj akham sasaw jisktʼäna: “Jupjam juchañchatäkasas ¿janipunit Diosar mä akchʼas ajjsarkta?” sasa (Luc. 23:40). Judionakajj mä sapa Diosarukiw adorapjjäna, ukampis yaqha markankir jaqenakajj walja diosanakaruw creyipjjäna (Éx. 20:2, 3; 1 Cor. 8:5, 6). Uka jan walinak lurir jaqenakatï jan judiöpkaspänjja, jupanakat maynejj akham sasaw jisktʼaspäna: “¿Janipunit diosanakar mä akchʼas ajjsarkta?” sasa. Ukhamarus Jesusajj janiw yaqha markankir jaqenakan ukar jutkänti, jan ukasti jilapartejj “Israel markan chhaqat ovejanakar uñtasitäpki” ukanakar predicañatakiw jutäna (Mat. 15:24). Jesusajj jiwatanakar jaktayaniwa sasaw Diosajj israelitanakar qhanañchatayna. Arrepentisit uka jan walinak lurir jaqejj uk yatpachänwa, uka jan walinak lurir jaqejj arskäna ukarjamajja, Jehová Diosajj Reinopan apnaqañapatak Jesusar jaktayañapäkäna uk sum yatpachäna. Amuyatajja, Diosajj jiwatat jaktayarakitaniwa sasaw uka jaqejj confiypachäna.

3. Jesusajj Paraisot parlkäna ukhajj ¿kunsa arrepentiskäna uka jan walinak lurir jaqejj amuypachäna? (Génesis 2:15).

³ Arrepentiskäna uka jan walinak lurir jaqetï judiöchïnjja, Jehová Diosajj Adanampir Evampir uchkäna uka Paraisot jupajj yatpachänwa. Ukhamajj kunapachatï Jesusajj mä Paraisot parlkäna ukhajja, uka jan walinak lurir jaqejj aka oraqen mä suma jardín utjañapätapwa amuypachäna (Génesis 2:15 liytʼäta).

4. Jesusajj kuntï jan walinak lurir jaqer siskäna ukajja, ¿kun amuytʼañatakis jiwasar yanaptʼañapa?

⁴ Kuntï Jesusajj jan walinak lurir jaqer siskäna ukajja, Paraison jakañajj kunjamänisa uk amuytʼañasatakiw yanaptʼañapa. Paraison jakañajj kunjamänisa uk amuytʼañatakejja, Salomón reyejj apnaqkäna uka tiempon kunjamsa sumankañajj utjäna uk amtañaw yanaptʼistani. Biblianjja, Jesusajj ‘Salomonat sipans jukʼamp jilïrit’ uñtʼatawa. Ukhamajj Jesusasa jupamp chik apnaqapkani ukanakasa, mä suma Paraisoruw aka oraq tukuyapjjani, janiw ukat payachasktanti (Mat. 12:42). ‘Yaqha ovejanakat’ uñtʼatäpki ukanakajja, Paraison wiñayatak jakañatakejj kunsa lurapjjañapa ukwa yateqapjjañapa (Juan 10:16).

¿PARAISON JAKAÑAJJ KUNJAMÄNISA?

5. ¿Paraison jakañajj kunjamäniw sasmasa?

⁵ ¿Jumatakejj Paraison jakañajj kunjamänisa? Inas kunjamäkäntï Edén jardinajj ukham wali suma jardinat amuysta (Gén. 2:7-9). Jan ukajj inas Miqueas profetan profeciapat amtsta, Diosan servirinakapat “sapa mayniw uvas alipan chʼiwipar qontʼasipjjani ukhamarak higos qoqapan chʼiwipar qontʼasipjjani” sasaw jupajj säna (Miq. 4:3, 4). Biblian manqʼañanakajj waljapuniw utjani siski uka textonakat amtarakpachätawa (Sal. 72:16; Is. 65:21, 22). Ukhamajj inas mä suma jardinankkasmas ukham amuysta, juma nayraqatan mä mesaw utji, walja suma manqʼañanakaw ukan utjaraki. ¿Plantanakana panqaranakana suma oloranakap muktʼkasmas ukham amuytati? ¿Kunjamsa amigonakamasa familiaranakamas juntuk qamartʼasipki lartʼasisipkaraki uk istʼasmati? Inas jupanakat yaqhepajj jiwatat jaktayatäpjjchi. Ukanakajj cheqawa, janiw mä samkakïkiti. Taqe ukanakaw oraqen uñjasini. Ukampis Paraison walja suma lurañanakaw utjarakini.

6. ¿Kuna lurañanakas Paraison utjani? (Dibujo uñjjattʼäta).

⁶ Jehová Diosajj trabajosamp wali kusisitäñasatakiw lurawayistu (Ecl. 2:24). Jesusajj Waranqa Maranak Apnaqkani uka tiemponjja, walja trabajow utjani. Jachʼa tʼaqesiñ tiempo pasirinakasa millón millón jiwatat jaktanirinakasa, isi, manqʼa, uta munapjjani. Taqe ukanak utjañapatakejja, wal trabajiñaw wakisini, ukampis uk lurañajj kusiskañäniwa. Kunjamtï Adanampi Evampejj Edén jardín sum uñjapjjañapäkänjja, jiwasajj ukhamarakiw aka oraq mä Paraisor tukuyañäni. Jehová Diosata amtanakapata mä jukʼa yatipkäna uka millón millón jiwatat jaktanirinakar yatichañajj wali kusiskañäniwa, ¿uk amuyasmati? Jesusajj janïr aka oraqer jutkäna uka tiemponjja, Diosat jan jitheqtas servirinakapat waljaniw jiwapjjäna, jupanakarojj jiwapkäna ukat aksarojj kunas pasäna uk yatichañas wakisirakiniwa.

7. ¿Kuna toqetsa jan payachasiñasäki, ukat kunatsa?

⁷ Paraisonjja, sumankañaw utjani, janiw kunas faltkistaniti, taqe kunas suma organiztʼatarakïniwa, janiw ukat payachasktanti. ¿Kunatsa ukham sistanjja? Yoqapajj aka oraqe apnaqkani ukhajj kunjam jakasiñas utjani uk amuytʼañatakejja, Salomón reyejj apnaqkäna uka urunakan jakañajj kunjamänsa ukampiw Jehová Diosajj yanaptʼistu.

SALOMÓN REYIN APNAQÄWIPAJJ PARAISON JAKAÑAJJ KUNJAMÄNISA UKWA UÑACHTʼAYI

8. ¿Kunjamsa Salmo 37:10, 11, 29 qellqatajj nayra tiempon phoqasïna? (“Aka revista liytʼirinakan jisktʼäwinakapa” siski uka cheqwa aka revistan liytʼäta).

⁸ Wali yatiñani ukhamarak Diosat jan jitheqtiri mä reyejj apnaqkani uka tiempon jakañajj kunjamänisa uk qellqañapatakejja, Jehová Diosajj David reyiruw amuytʼayäna (Salmo 37:10, 11, 29 liytʼäta). Paraisot yaqha jaqenakamp parlktan ukhajja, jilapartejj Salmo 37:11 qellqatwa liytʼaraptanjja. Uk lurañajj walikïskiwa, Jesús pachpaw Qollun Yatichkäna ukhajj uka textot aytarakïna. Ukhamatwa kunjamsa uka arunakajj jutïrin phoqasini uk uñachtʼayarakïna (Mat. 5:5). Ukampis kuntï David reyejj qellqkäna ukajja, Salomón reyin urunakapan jakañajj kunjamäñapänsa ukwa qhanañcharakïna. Uka tiemponjja, Israel markajj ‘lechempi miskʼimpi’ wal utjir oraqenwa jakäna, sumankañaw ukan utjäna, taqe kunanïpjjänwa. Diosajj akham sänwa: “Jumanakatejj leyinakajarjam sarnaqasipkakïta […] ukhajja, […] nayasti sumankañwa markan utjayäjja, jumanakasti jan khitin ajjsarayataw iktʼasipjjäta” sasa (Lev. 20:24; 26:3, 6). Salomón reyejj Israel markan apnaqkäna ukhaw Diosan uka promesanakapajj phoqasïna (1 Crón. 22:9; 29:26-28). Jehová Diosasti, “jan wali jaqenakajj janiw utj-jjaniti” sasaw jupanakar mä promesa arsurakïna (Sal. 37:10). Ukhamajj Salmo 37:10, 11, 29 qellqatankir arunakajja, nayra tiempon phoqasïnwa, jutïrins phoqasirakiniwa.

9. ¿Saba markankir reinajj Salomón reyin apnaqäwipat kamsänsa?

⁹ Salomón reyejj apnaqkäna ukhajja, Saba markankir reinajj Israel markan sumankaña utjatapa ukhamarak taqe kunanïpjjatapwa yatïna. Ukatwa jupajj wali jaya markatpach Jerusalenar viajïna, ukhamat pachpa nayranakapampi taqe ukanak uñjañataki (1 Rey. 10:1). Kunjamsa Salomón reyejj apnaqäna uk jupa pachpa uñjasajja, akham sasaw reyir säna: “¡Cheqpachans janiw nayarojj ni chikats yatiyapkitütuti! […] ¡Kusisiñanïpjjew juman yatiñam sapür istʼapki uka jaqenakamasa servirinakamasa!” sasa (1 Rey. 10:6-8). Salomón reyejj apnaqkäna uka urunakan jakañajj kunjamänsa ukajja, kunsa Jehová Diosajj Jesús Yoqapajj aka oraq apnaqkani ukhajj jaqenakatak lurani, ukwa mä qhawqha uñachtʼayistu.

10. ¿Kunatsa Jesusajj Salomonat sipans jilankiwa sistanjja?

¹⁰ Jesusajja, Salomón reyit sipans taqe kunanwa jilanki. Salomón reyejj pantjasir jaqënwa, jan wali amtanakar puritapatjja, tiempompejj jan walinakanwa Diosan markapajj uñjasïna. Ukampis Jesusajj perfecto apnaqeriwa, janipuniw kunans pantjaskaspati (Luc. 1:32; Heb. 4:14, 15). Supayan jan wali yantʼanakaparus atipjawayarakiwa. Cristojj janipuniw juchachaskaniti, Reinon apnaqatäpkani uka jan jitheqtir servirinakaparus janipuniw jan waltʼaykaniti, ukwa jupajj uñachtʼayistu. ¿Cristomp apnaqatäñajj mä suma bendicionajjaya?

11. ¿Khitinakas Jesusar yanaptʼapjjani?

¹¹ Jesusarojj 144.000 reyinakaw yanaptʼapjjani, jupanakajj juntukiw jaqenakar sum uñjapjjani, Jehová Diosan aka oraqetak amtapsa phoqasiyapjjarakiniwa (Apoc. 14:1-3). Diosan Reinopan apnaqerinakajja, aka oraqen chachanakjam warminakjam jakkasajj kunayman jan walinakanwa uñjasiwayapjje. Ukatwa jupanakajj jiwasat khuyaptʼayasipjjestani. Ukampis ¿kuna lurañas jupanakar waktʼani?

¿KUNSA AJLLITANAKAJJ LURAPJJANI?

12. ¿Kuna lurañsa Jehová Diosajj 144.000 ajllitanakarojj churani?

¹² Salomón reyit sipansa, Jesusampi 144.000 ajllitanakampejj jukʼamp lurañanakanïpjjewa. Salomón reyejj mä markanakwa mä qhawqha millón jaqenakar apnaqäna. Ukampis Diosan Reinopan apnaqerinakajja, walja millón millón jaqenakaruw oraqpachan apnaqapjjani. Cheqas kuntï Jehová Diosajj 144.000 ajllitanakar churkani ukajja, ¡mä jachʼa bendicionapuniwa!

13. ¿Jesusamp chik apnaqerinakajj kuna suma wakiskir luräwinïpjjanisa?

¹³ Jesusjamarakiw 144.000 ajllitanakajj reyinakata sacerdotenakat apnaqanipjjani (Apoc. 5:10). Moisesan Leyiparjamajja, sacerdotenakaw israelitanakarojj kʼumaräpjjañapatakisa, Jehová Diosan jakʼapankapjjañapatakis yanaptʼapjjañapäna. Niyakejjay Leyejj “kuna suma bendicionanakatejj jutkani ukan” chʼiwipächïnjja, Jesusamp chik apnaqapkani ukanakajj mä suma wakiskir luräwi phoqapjjani: jupanakaw Diosan markapankirinakarojj kʼumara jakasipjjañapatakisa, Jehová Diosan jakʼapankapjjañapatakis yanaptʼapjjani (Heb. 10:1). Kunjamsa uka reyinakasa sacerdotenakas aka oraqen Diosan Reinopamp apnaqatäpkani ukanakampejj parlapjjani uk janïraw yatktanti. Kunjamjjay Jehová Diosajj taqe kuns organizchini, ukampis Paraison jakirinakajj kun lurañatakis jan ukajj kun amtañatakis yanaptʼatäpjjaniwa (Apoc. 21:3, 4).

¿PARAISON JAKAÑATAKEJJ KUNSA ‘YAQHA OVEJANAKAJJ’ LURAPJJAÑAPA?

14. ¿Kunjamsa ‘yaqha ovejanakampi’ ‘jiskʼa tamankirinakampejj’ mayachtʼatäpjje?

¹⁴ Jesusajj jupamp chik apnaqapkani uka gruporojja, “jiskʼa tama” sasaw säna (Luc. 12:32). Jupajj payïr grupotwa parlarakïna, jupanakarojj ‘yaqha ovejanaka’ sasaw säna. Uka pä grupojj mä sapa tamakïpjjewa (Juan 10:16). Jupanakajj mayachtʼataw trabajisipki, aka oraqejj mä Paraisöjjani ukhas mayachtʼataw trabajisipkakini. Uka tiemponjja, ‘jiskʼa tamankirinakajj’ alajjpachankjjapjjaniwa, ‘yaqha ovejanakasti’ aka oraqen wiñay jakañatak suytʼäwinïpjjarakiniwa. Ukampis ‘yaqha ovejanakajja’, Paraison jakañatakejj jichha tiempon mä qhawqhanak lurapjjañapaw wakisi.

15. 1) ¿Kunjamsa ‘yaqha ovejanakajj’ Criston jilanakapar yanaptʼtanjja? 2) ¿Foton uñjaski uka jilatat kunsa yateqasma?

¹⁵ Arrepentiskäna uka jan walinak lurir jaqejja, kuntï Jesusajj jupa layku lurkäna ukat yuspärañatakejj janiw oportunidadanïkänti. Ukampis ‘yaqha ovejanak’ taypinkirinakajja, yuspäratas uñachtʼayañatakejj walja oportunidadanïtanwa. Ajllit jilanakapar yanaptʼasajja, Jesusar munasitaswa uñachtʼaytanjja. Jesusan arunakaparjamajj kunjamtï jilanakapar yanaptʼapkani ukarjamaw ovejanakar uñtʼasini (Mat. 25:31-40). Mä toqetjja, taqe chuyma predicasa, jaqenakar discipulor tukuyasaw Criston jilanakapar yanaptʼtanjja (Mat. 28:18-20). Ukatwa jupanakajj churapkistu uka Bibliat yatichañatak herramientanak apnaqañ muntanjja, ukanakat mayajj ¡Wiñayatakiw kusisit jakasisma! sat librowa. Jumatï maynirus Bibliat jan yatichkstajja, khitinakarutï yatichañ puedkasma ukanakar Bibliat yatichañatak chʼamachasim.

16. ¿Diosan Reinopan jakañatakejj kunsa jichhatpach lurañasa?

¹⁶ Jehová Diosajj kunjam jaqëñastï munki ukham jaqëñasatakejja, janiw Paraíso puriniñap suyañajj wakiskapuniti. Jichhatpachaw arsutasampisa luratasampis honradöñatak chʼamachasiñasa, jakäwisan jan kunamp jiljañatakis chʼamachasiñasarakiwa. Jehová Diosarusa, espososarusa jan ukajj esposasarusa, jilat kullakanakarusa jan jaytjañatakiw chʼamachasiñasa. Jichhatï aka jan wali pachan Jehová Diosan leyinakapar istʼañatak wal chʼamachasiñäni ukhajja, Paraison uk lurañajj facilakïniwa. Yaqha lurañanak yateqasa, suma chuymanïñatak chʼamachasisaw Paraison jakañatak wakichasitas uñachtʼaysna. “¿Jumajj ‘oraq katoqañatak’ wakichtʼatäjjtati?” siski uka yatichäwi aka revistan liytʼäta.

17. ¿Kunatsa nayrajj juchanak lurkayätan ukanakamp juchañchasisajj jan aynachtʼañasäki?

¹⁷ Nayrajj jachʼa juchanak lurkayätan ukanakat jan jukʼamp juchañchasjjañasatakiw chʼamachasiñasaraki. Jesucristow juchampit jiwañampit kutsuyistu sasajj janiw ‘amanut juchan sarnaqañasäkiti’ (Heb. 10:26-31). Jiwasatï jachʼa jucha luratasat cheqapun arrepentistan, Jehová Diosana ancianonakan yanaptʼap thaqstan, uka jan wali lurañs apanukjjarakstan ukhajja, Jehová Diosajj taqe chuymaw perdonistu, janiw ukat payachasiñasäkiti (Is. 55:7; Hech. 3:19). Kuntï Jesusajj fariseonakar siskäna uk amtañäni, jupajj akham sänwa: “Nayajj janiw cheqapar sarnaqer jaqenakar jawsir jutkti, jan ukasti jucharar jaqenakar jawsiriw jutta” sasa (Mat. 9:13). Jesusan juchampit jiwañampit kutsuyatapatwa taqe juchanakasajj perdonatäjje.

JUMAJJ WIÑAYATAKIW PARAISON JAKASMA

18. ¿Jesusan ladopan jiwkäna uka jan walinak lurir jaqerojj kunsa jisktʼañ munasma?

¹⁸ Jesusamp parlkäna uka jan walinak lurir jaqempis Paraison parlkasma ukham amuytʼam. Jesucriston sacrificiot loqtasitapat kunja yuspäratäpjjtasa ukwa parltʼasisipktajja. Inas jupar akham jisktʼarakchïta: “¿Jesusajj aka oraqen jiwañapäkäna uka qhep qhepa horanakajj kunjamas Jesusajj jikjjatasïna? ¿Jesusajj jisktʼamar jaysatapat kunjamas jikjjatasiyäta?” sasa. Maysa toqetjja, “¿Supayan apnaqat qhepa urunakan jakañajj kunjamänsa?” sasin inas jupajj jisktʼarakchïtam. ¡Ukham jaqenakar Diosan Arupat yatichañajj mä jachʼa bendiciönäniwa! (Efes. 4:22-24).

19. ¿Kunatsa Paraison aburrisiñajj jan utjkani? (Nayrïr paginankir dibujo uñjjattʼäta).

¹⁹ Paraison janiw kunat aburrisiñas utjkaniti. Paraisonjja mä kunat parltʼañatak maynir uñtʼañajj utjapuniniwa, trabajosampis kusisitarakïñäniwa. Taqe kunat sipansa, akanakaw jukʼamp sumäni: alajjpachankir Awkisarojj sapüruw jukʼamp uñtʼañäni, bendicionanakapats disfrutarakiñäniwa. Diosampita luratanakapampit yateqañajj janiw tukuskaniti. Sapürutjamaw Diosarojj jukʼamp munasiñäni. ¡Jehová Diosasa Jesusas Paraison wiñay jakañasatak mä promesa arsupjjatapat walpun yuspärtanjja!