Diosar uñtʼañajj jupar jakʼachasiñatakiw yanaptʼistu
Diosajj janiw taqe chʼamani Diosakïkiti, jan ukasti jupajj cualidadanakanirakiwa. Jupar uñtʼsna, amigopäsna ukwa munaraki. Ukatwa jupajj kunjam Diosasa uk qhanañchistu (Juan 17:3; Santiago 4:8).
Diosajj mä sutiniwa
‘Jaqenakajj ak yatipjjpan, juman sutimajj Jehová satawa, juma sapakiw taqe oraqpach apnaqer Jachʼa Diosätajja’ (SALMO 83:18).
Jehová Diosakiw cheqpach Diosajja sasaw Bibliajj yatichi, jupaw aka oraqsa alajjpachanaksa lurawayi, juparakiw jaqenakarusa animalanakarus lurawayi. Ukatwa juparuki adorañasa (Apocalipsis 4:11).
Jehová Diosajj munasiriwa
“Diosajj munasiñawa” (1 JUAN 4:8).
Jehová Diosajja, Biblia toqe ukhamarak luratanakap toqew kunjam Diosasa uk yatichistu. Cualidadanakapatjja munasiñapaw jukʼamp qhansti, kuna laykutejj taqe kunsa munasiñatwa luri. Jehová Diosar jukʼamp uñtʼktan ukhajja, jukʼampiw jupar munastanjja.
Jehová Diosajj perdonasiriwa
‘Jumajj jankʼaki perdonasiri Diosätawa’ (NEHEMÍAS 9:17).
Jehová Diosajja, pantjasir jaqëtas yatiwa, ukatwa perdonañatakejj jankʼakejja. Jiwasatï perdón mayisiñäni, kunatï jupar jan gustki uk jaytañatak chʼamachasirakiñäni ukhajja, jupajj perdonistaniwa, janirakiw pantjasitanakasat castigkistaniti (Salmo 103:12, 13).
Jehová Diosajj jupar orassna ukwa muni
‘Jehová Diosajj taqe khitinakatï jupar artʼasipki ukanakan jakʼapankiwa. Yanap mayiñatak artʼasitanakaparojj Diosajj istʼiwa’ (SALMO 145:18, 19).
Jehová Diosajj janiw idolonak toqe adorayasiñ munkiti. Kunjamtï mä munasiri awkejj wawapar sum istʼkejja, ukhamwa Diosajj oracionanakas istʼaraki.