Jesusaw jachʼar tuku, Juanajj jiskʼaruw tukuraki

Kimsa tunka maran Pascua fiesta pasatatjja, Jesusampi discipulonakapampejj Jerusalén markat sarjjapjjänwa. Jupanakajj janiw Galileankir utanakapar kuttʼapkänti, jan ukasti Judearuw sarapjjäna, ukanjja walja jaqenakaruw bautisapjjäna. Bautisir Juanajj uka kikparakiw niya mä mara ukan bautisaskäna, inas Jordán Jawirankchïna, yaqhep discipulonakapas jupamp chikasipkarakïnwa.

Jesusajj janiw jupa pachpajj bautiskänti, jan ukasti discipulonakapampiw bautisayäna. Uka tiempokamajja, Jesusasa Bautisir Juanasa, Jehová Diosan Leyip pʼakintapjjatapat arrepentisipkäna uka judionakaruw yatichasipkäna (Hechos 19:4).

Bautisir Juanan discipulonakapajj kuntï Jesusajj luraskäna uk uñjasajj Juanamp parliriw sarapjjäna, Jesusjjat akham sapjjänwa: “Uñjam, khititï Jordán Jawir khurkatan jumamp chikäskäna, [...] uka jaqew bautisaski, taqeniw jupan ukar sarasipki” sasa (Juan 3:26). Juanasti janiw jupanakjam amuykänti, antisas Jesusan nayrar sartaskatapat kusisïnwa, discipulonakapajj kusisipjjarakispa ukwa munäna. Ukatwa jupanakar akham sasin amtayäna: ‘Jumanak pachpaw “janiw nayajj Cristökti, jan ukasti jupan nayrap khitanitätwa” sasin sapkayäsma uka toqet qhanañchapjjestajja’ sasa. Uk sum amuyapjjañapatakejja, mä uñachtʼäwimpiw akham qhanañchäna: “Khititejj casarasir tawaqompïki ukaw casarasir waynajja. Kunapachatï casarasir waynan amigopajj saytʼasi, casarasir waynan arunakap istʼaraki ukhajja, walpun kusisi. Nayajj ukhamarakiw kusista” sasa (Juan 3:28, 29).

Juanajj casarasir waynan amigopjamajja, arkirinakaparu Jesusar uñtʼaykäna ukhaw wal kusisïna. Uka arkirinakapat yaqhepajj Jesusan discipuloparuw tukjjapjjäna, tiempompisti espíritu santompi ajllitäpjjañapänwa. Juanajj jupamp chikäsipkäna uka arkirinakapajj mayni arkirinakapjamaraki Jesusan discipulopar tukupjjaspa ukwa munäna. Juanajj Jesusatak mä thaki wakichiriw jutäna, ukhamat Jesusajj Diosan arunakap yatiyañapataki, ukatwa akham säna: “Jupan luräwinakapajj jachʼaruw tukuskakiñapa, nayan luräwinakajajj jiskʼaruw tukuskakiñapa” sasa (Juan 3:30).

Juan sat mä chachaw Jesusan discipulopäjjarakïna, jupasti kawkitsa Jesusajj juti, jaqenakar salvañatakejj kuna wakiskir luräwinisa uka toqet akham sasin qhepat qellqäna: “Khititejj alayat jutki ukajj taqenit sipansa jilankiwa [...]. Awkisti Yoqarojj munasiwa, taqe kunwa amparapar katuyaraki. Yoqar confiyki ukajja, wiñay jakañwa katoqani. Yoqar jan istʼki ukajja, janiw wiñay jakañ uñjkaniti, jan ukasti Diosan colerasiñapaw jupjjankani” sasa (Juan 3:31, 35, 36). Jaqenakan uk yatipjjañapajj wali wakiskirïnwa.

“Nayan luräwinakajajj jiskʼaruw tukuskakiñapa” sasin Bautisir Juanajj siskäna uka qhepatjja, Herodes reyiw jupar katuntäna. ¿Kunatsa? Herodes reyejj Filipo jilapan Herodías warmipampiw casarasïna. Juanajj ukham jan wali luratapatjja, Herodes reyirojj juchañchänwa. Ukatwa uka reyejj Juanar carcelar llawintayäna. Jesusajj Juanar katuntapjjatap yatisajj discipulonakapampiw Judeat Galilear sarjjapjjäna (Mateo 4:12; Marcos 1:14).