‘Parlatanakamax jayumpi muxsañchtʼatapunïpanʼ
1. ¿Kunjamatsa ‘parlatanakasar jayump muxsañchtʼsna’?
1 “Jumanakan parlañamax muxsapunïpan, jayumpi muxsañchtʼata; kunjamtix sapa mayniru arsupxañamäki uk yatipxañamataki” (Col. 4:6, Machaka Testamento). Suma arunak ajlltʼañäni ukat chuymar purtʼkiri istʼkañ arunakampi arstʼañäni ukhawa parlatanakasax jayumpi muxsañchtʼatäkaspas ukhamänixa. Yatiyir sarañatakixa ukax wali wakiskiriwa.
2. ¿Samaritana warmiru yatiyañatakixa Jesusax kamachänsa?
2 Jesusat yatiqasiñäni. Mä phuju jakʼan Jesusax samartʼaskäna, ukatxa, uma waytasir mistunir samaritana warmimpiwa parlapxäna. Walja kutiwa uka warmixa judionakampi samaritanonakampi jan sum apasitapatxa arsusïna. Ukatxa, samaritanonakax yaqha markanakat jutirinakawa sasas judionakax samaritanonakar uñtʼasipkchïnxa, uka warmixa, Jacoban wawanakapäpxtwa sasaw säna. Ukampis Jesusax uka tuqit parlañat sipansa, kunatix askïki ukanakak parläna, ukhamatwa Diosan arunakapxa uka warmirusa ukat uka markankirinakarusa sum yatiyäna (Juan 4:7-15, 39).
3. Yatiyir sarkasaxa, ¿kunjamsa Jesusat yatiqassna?
3 Kunapachatï yatiyir sartan ukhaxa, kunatsa yatiytan ukxa amtapxapuniñasawa: ‘Suma aski arunak yatiyiriw’ sartanxa (Rom. 10:15). Yatiqaskañ suma yatiyäwinakwa jaqinakar yatiyañ muntanxa, janiw yatiqatanakap contra parliris sarksna ukham amuyapxañapäkiti. Mä jaqix kʼari yatichäwinakat arsuni ukhaxa, janiw uka contra parlañamax wakiskapuniti. ¿Janipunit mä arsutanakapasa chiqapäki, janit uka arsutanakapatxa askpun sasktax sañjamäki? Inas akham sasinxa Bibliat yatichañ qalltsna: “¿Aka tuqit jumax amuytʼasirïtati?” sasa.
4. ¿Mä jaqix tuqjistaspa ukhax kamachsnasa?
4 Ukat mä jaqix jan wali arunakampi tuqjistaspa jan ukax jiskhisiñaki munaskaspa ukhaxa, ¿kamachsnasa? Munasiñampipuniw parlañasa ukat llampʼu chuymampipuniw kunsa lurañasa (2 Tim. 2:24, 25). Diosan Apnaqäwipat suma yatiyäwinak jan istʼañ munkchi ukhaxa, jan chuym ustʼayasa wali amuytʼampiw jaytawayxañama (Mat. 7:6; 10:11-14).
5. Llampʼu chuymampi arsusaxa, ¿kunjamsa mä kullakax yanaptʼatayna?
5 Kuns jikxatsna. Mä kullakaxa uta jakʼapankir warmiruw Diosat parlxayatayna, ukampis uka warmix walpun colertʼasitayna ukatxa jan arskañ ñanqha arunakampiwa kullakarux tuqjatayna. Ukat kullakax suma arunakampiw akham säna: “Janiw colerayañ munkayäsmati. Sumak jichhür qamaräta” sasa. Pä semana pasatatxa, uka warmi kikpawa pampachayasiñatakix uka kullakan utapar liqtʼatayna, ukat kun yatichäma saskayätasa uk istʼañ munta sasaw satayna. Ukhamasti, llampʼu chuymampi kuns arsuñäni ukhaxa, yaqhananakarus yanaptʼaraksnawa (Pro. 15:1; 25:15).
6. ¿Kunatsa yatiyir sarasax parlatanakasar jayumpi muxsañchtʼañasax wali wakisirixa?
6 Ukhamasti, suma yatiyäwinak yatiyir sarasaxa arunakasar jayump muxsañchtʼapxapuniñäni. Yatiyasktan uka jaqix janis istʼkchistanixa, ukampis yaqha urun jilat kullakanakasax utapar liqtʼkani ukhaxa istʼxaspawa.