Фәсил 77
Мирас мәсәләси
ҸАМААТ, ҝөрүнүр, Исанын фәрисејин евиндә наһар етдијиндән хәбәрдардыр вә минләрлә адам бајырда топлашыб ону ҝөзләјир. Исаја гаршы чыхан вә ону сөздә тутмаға чалышан фәрисејләрдән фәргли олараг, ҹамаат Исаны еһтирамла вә һәвәслә динләјир.
Иса әввәлҹә өз шаҝирдләринә мүраҹиәт едир: «Өзүнүзү фәрисејләрин мајасындан, јәни икиүзлүлүкдән ҝөзләјин». О, наһар вахты артыг ҝөстәрди ки, фәрисејләрин дини системи башдан-ајағадәк ријакарлыгла долудур. Һәрчәнд фәрисејләр пис олдугларыны мөминлик пәрдәси архасында ҝизләдә биләрләр, амма онларын ич үзү ҝеҹ-тез ашкара чыхаҹаг. Иса дејир: «Елә ҝизли шеј јохдур ки, бир ҝүн үзә чыхмасын; елә бир сирр јохдур ки, сонрадан үстү ачылмасын».
Сонра Иса 12 һәварисини Галилејаја тәблиғә ҝөндәрдији заман дедији руһландырыҹы сөзләри тәкрар едир: «Бәдәни өлдүрүб ондан сонра һеч нә баҹармајанлардан горхмајын». Иса давамчыларыны әмин едир ки, Аллаһ һеч вахт онлары унутмајаҹаг, ахы О, бапбалаҹа гушлары белә унутмур. О бәјан едир: «Сизи халг мәҹлисләринә, һакимләрин вә дөвләт адамларынын гаршысына чәкиб ҝәтирәндә... мүгәддәс руһ сизә нә демәк лазым олдуғуну һәмин ан өјрәдәҹәк».
Бу вахт ҹамаат арасындан бир адам она мүраҹиәт едир: «Мүәллим, гардашыма де ки, мирасы мәнимлә бөлсүн». Мусанын Ганунуна әсасән, илк доғулан оғула икигат мирас дүшүр, бу һалда мүбаһисәјә јер јохдур. Ҝөрүнүр, бу киши она дүшән пајдан артыг пај истәјирди.
Иса јериндә олараг бу мүбаһисәјә ҝиришмир. О сорушур: «Ај киши, мәни аранызда һакимлик етмәјә вә ја малынызы бөлмәјә ким тәјин едиб?» Сонра бурада топлашанлара ҹидди хәбәрдарлыг едир: «Ҝөзләринизи дөрд ачын вә өзүнүзү һәр ҹүр тамаһкарлыгдан горујун, чүнки инсанын вар-дөвләти башындан ашыб-дашса да, һәјаты бундан асылы дејил». Бәли, инсан нә гәдәр вар-дөвләт топласа да, бир ҝүн өләҹәк, малы исә галаҹаг. Иса һәм бу фикри вурғуламаг, һәм дә Аллаһын гаршысында јахшы ад газанмаг үчүн чалышмајанларын ағылсызлығыны ҝөстәрмәк үчүн бир мәсәл чәкир:
«Бир варлынын торпағы бол мәһсул верди. Бу адам үрәјиндә дүшүнмәјә башлады: “Мән инди неҹә едим? Мәһсулу јығмаға јерим јохдур”. Сонра деди: “Билирәм нә едәҹәјәм! Анбарларымы сөкүб, јеринә даһа бөјүкләрини тикәҹәјәм. Бүтүн тахылымы, сәрвәтими ора јығаҹағам. Сонра өзүмә дејәҹәјәм: «Ҹаным, динҹәл, је, ич, кеф елә, чүнки топладығын бу вар-дөвләт сәнә өмрүнүн ахырына кими бәсдир»”. Анҹаг Аллаһ она деди: “Еј ағылсыз, елә бу ҝеҹә сәнин ҹаныны алаҹаглар. Бәс бу топладығын сәрвәт кимә галаҹаг?”»
Иса бу фикри белә тамамлајыр: «Аллаһын ҝөзүндә варланмаг әвәзинә, өзүнә вар-дөвләт топлајанларын агибәти белә олур». Чох ҝүман ки, Исанын шаҝирдләри ағылсызҹасына вар-дөвләт топламаг тәләсинә дүшмәјәҹәкләр, амма ҝүндәлик гајғылар онларын диггәтини асанлыгла јајындырыб Јеһоваја хидмәтдән узаглашдыра биләрди. Беләҹә, Иса фүрсәтдән истифадә едәрәк тәхминән ил јарым бундан әввәл Дағүстү тәблиғиндә вердији мәсләһәти јенидән тәкрар едир. О, үзүнү шаҝирдләринә тутуб дејир:
«Буна ҝөрә дә сизә дејирәм: “Нә јејәҹәјик?” — дејә ҹаныныздан өтрү вә: “Нә ҝејәҹәјик?” — дејә бәдәниниздән өтрү гајғы чәкмәји гуртарын... Гузғунлара бахын: онлар нә әкир, нә бичир, нә зирзәмиләри вар, нә анбарлары. Буна бахмајараг, Аллаһ онлары једиздирир... Занбагларын неҹә бој атдығына бахын: онлар нә зәһмәт чәкир, нә ип әјирир, амма инанын ки, һәтта Сүлејман, бүтүн ҹаһ-ҹалалында бунлардан бири кими ҝејинмәмишдир».
Иса сөзүнә давам едир: «Буна ҝөрә дә јемәк-ичмәк дәрди чәкмәји вә һәддиндән артыг нараһат олмағы гуртарын, чүнки бүтүн бу шејләрин далынҹа дүнја милләтләри дүшүр. Амма сизин Атаныз бунлара еһтијаҹ дујдуғунузу билир. Онун падшаһлығыны һәјатынызда һәмишә биринҹи јерә гојун, онда бунлар да сизә вериләҹәк».
Хүсусилә мадди чәтинликләр заманы Исанын бу мәсләһәтинә ҹидди јанашмаг лазымдыр. Әҝәр кимсә мадди еһтијаҹындан өтрү чох нараһат олуб, руһани дәјәрләрә лагејдлик ҝөстәрмәјә башлајырса, бу ҝөстәрир ки, белә адам Аллаһын Өз хидмәтчиләринин гајғысына гала биләҹәјинә шүбһә едир. Лука 12:1—31; Ганунун тәкрары 21:17.
▪ Бир адамын мирасла бағлы хаһишинин архасында нә дура биләрди вә Иса һансы мәсләһәти верир?
▪ Иса һансы мәсәли данышыр вә онун мәғзи нәдир?
▪ Иса һансы нәсиһәтини тәкрарлајыр вә нәјә ҝөрә бу лап јеринә дүшүр?