Фәсил 76

Бир фәрисејин евиндә

ИСА МӘСИҺ лал адамы сағалтдығы ҝүҹүн мәнбәјини әлејһдарларына изаһ етдикдән сонра бир фәрисеј ону евинә наһара дәвәт едир. Фәрисејләр ајин үзрә наһардан габаг әлләрини дирсәјә гәдәр јујурлар. Еләҹә дә наһардан сонра, һәтта наһар заманы мүхтәлиф хөрәкләр арасы да бу ајинә риајәт едирләр. Дүздүр, бу ајин Аллаһын јазылы ганунуну позмур, лакин Аллаһын тәмизликлә бағлы тәләбләриндән әлавә шејләр тәләб едир.

Иса бу ајини иҹра етмәдикдә ев саһиби бәрк тәәҹҹүбләнир. Тәәҹҹүбүнү үзә вурмаса да, Иса буну һисс едир вә дејир: «Сиз фәрисејләр, ҹамы вә нимчәни үздән тәмизләјирсиниз, амма дахилиниз сојғунчулуг вә писликлә долудур. Ағылсызлар! Мәҝәр үз тәрәфи јарадан, дахили дә јаратмајыб?»

Иса әлләрини ајин үзрә јујан, амма үрәкдән шәр ишләри тәмизләмәјән фәрисејләрин ријакарлығыны ифша едир. О мәсләһәт ҝөрүр: «Сиз дахилдән ҝәлән сәдәгәләр верин, онда сизин үчүн һәр шеј тәмиз олаҹаг». Бәли, онлары сәдәгә вермәјә мәһәббәт долу үрәк тәшвиг етмәлидир, өзләринин салеһлијини нүмајиш етдирмәк истәји јох.

Иса сонра дејир: «Вај һалыныза, фәрисејләр! Чүнки сиз нанә, сәдәфоту вә диҝәр ҝөјәртиләрин онда бирини верирсиниз, амма әдаләтә вә Аллаһа гаршы мәһәббәтә бармагарасы бахырсыныз. Ондабири вермәк борҹунуздур, амма ҝәрәк галан шејләрә дә етинасыз јанашмајајдыныз». Аллаһын Исраил халгына вердији Ганун тарладан јығылмыш мәһсулун онда бирини вермәји тәләб едирди. Нанә вә сәдәфоту хөрәјә дад вермәк үчүн ишләдилән хырда биткиләрдир вә фәрисејләр һәтта бу ҹүр хырда биткиләрдән дә ондабир верҝисини өдәмәјә ҹидди јанашырлар. Лакин мәһәббәт ҝөстәрмәк, хејирхаһ вә тәвазөкар олмаг кими даһа өнәмли тәләбләри кәнара гојурлар. Буна ҝөрә дә Иса онлары иттиһам едир.

Иса давам едир: «Вај һалыныза, фәрисејләр! Чүнки сиз синагогларда јухары башда отурмағы вә базар мејданларында ҹамаатдан салам алмағы севирсиниз. Вај һалыныза, чүнки сиз адамларын билмәдән үстүндә ҝәздикләри ҝөзә чарпмајан гәбирләр кимисиниз». Фәрисејләрин натәмизлији илк бахышдан ҝөрүнмүр. Онларын диндарлығы ријакарлыг үстүндә гурулуб, јалныз заһири ҝөрүнүшү вар, дахилдән исә һеч нәјә дәјмәз.

Аллаһын Ганунуну јахшы билән бир гануншүнас бу иттиһамлары ешидәндә етиразыны билдирир: «Мүәллим, бу сөзләрлә сән бизи дә тәһгир едирсән».

Иса гануншүнаслары да тәгсирли чыхарыб дејир: «Еј гануншүнаслар, вај сизин дә һалыныза! Чүнки сиз ҹамаатын бојнуна ағыр јүк гојурсунуз, өзүнүз исә бармағынызы да о јүкә вурмаг истәмирсиниз. Вај һалыныза, чүнки сиз пејғәмбәрләр үчүн мәгбәрәләр уҹалдырсыныз, һалбуки онлары өлдүрән елә сизин аталарыныз олуб».

Исанын дедији јүк — шифаһи әнәнәләрдир. Лакин бу гануншүнаслар онлардан кичиҹијини белә дәјишмәзләр ки, адамларын јүкү бир гәдәр јүнҝүлләшсин. Бундан әлавә, Иса ҝөстәрир ки, гануншүнаслар пејғәмбәрләри өлдүрмәјә разылыг верирләр вә онлары хәбәрдар едир: «“Бәшәр нәсли дүнјаја ҝәләндән бәри бүтүн пејғәмбәрләрин ахыдылмыш ганы бу нәсилдән тәләб едиләҹәк; Һабилдән тутмуш, гурбанҝаһла Аллаһын еви арасында өлдүрүлмүш Зәкәријјәнин ганына ҝөрә” бах бу нәсил ҹавабдеһдир».

Фидјәјә еһтијаҹ дујан бәшәр нәсли Адәмлә Һәвванын ушаглары доғуланда мејдана ҝәлмәјә башлады. Беләҹә, Һабил бәшәр нәслинин башланғыҹында јашајыб. Пејғәмбәр олмуш Зәкәријјәнин гәддарҹасына гәтлиндән сонра Сурија ордусу Јәһудејаны виран гојду. Лакин Иса пејғәмбәрлик едир ки, онунла бир дөврдә јашајан нәсли даһа мүдһиш виранәлик ҝөзләјир. Бу виранәлик тәхминән 38 ил сонра, ерамызын 70-ҹи илиндә баш верир.

Иса иттиһамына давам едир: «Вај һалыныза, еј гануншүнаслар! Чүнки сиз билик гапысыны ачан ачары ҝөтүрмүсүнүз. Нә өзүнүз ичәри ҝирдиниз, нә дә ҝирмәк истәјәнләри гојдунуз». Бәли, гануншүнаслар Аллаһын Кәламыны халга изаһ етмәли, мәнасыны ачыгламалыдырлар. Онлар исә нәинки буну етмирләр, үстәлик, Аллаһын Кәламыны баша дүшмәк үчүн халгы һәр ҹүр имкандан мәһрум едирләр.

Фәрисејләр вә гануншүнаслар бу рүсвајчылыгдан сонра Исанын әлиндән зәнҹир чејнәјирләр. Иса орадан чыханда онлар ону дөврәјә алырлар вә сыхышдырараг үстүнә суаллар јағдырырлар. Онлар Исаны һәбс етмәјә бәһанә тапмаг үчүн ону сөздә тутмаг истәјирләр. Лука 11:37—54; Ганунун тәкрары 14:22; Микеја 6:8; 2 Салнамәләр 24:20—25.

▪ Иса фәрисејләрлә гануншүнаслары нә үчүн иттиһам едир?

▪ Гануншүнаслар инсанларын бојнуна һансы јүкләри гојурлар?

▪ «Бәшәр нәсли» нә вахт мејдана ҝәлди?