Бу брошүрүн мәгсәди
НИДЕРЛАНД философу Спиноза јазмышды: «Һәјатым боју чалышмышам ки, инсанларын һәрәкәтләринә нә ҝүлүм, нә ағлајым, нә дә нифрәт едим, әксинә, онлары баша дүшүм». Әзиз мүәллимләр, сизин гаршынызда шаҝирдин, о ҹүмләдән Јеһованын Шаһидләринин ушағынын дүнја ҝөрүшүнү, бахышларыны вә етигадыны анламаг кими чәтин тапшырыг дурур. Илк бахышдан елә ҝөрүнә биләр ки, ушаг мөвҹуд нормалара гаршы чыхыр. Лакин әҝәр шаҝирд өз дини вә әхлаги бахышларына ҝөрә башгаларындан фәргли давранырса, бу диггәтә лајигдир. Бу нәшр Ҝөзәтчи Гүлләси, Мүгәддәс Китаб вә Трактатлар Ҹәмијјәти (Јеһованын Шаһидләри тәрәфиндән дәрҹ едилиб) вә Јеһованын Шаһиди олан шаҝирдләри даһа јахшы баша дүшмәјиниз үчүн нәзәрдә тутулуб. Үмидварыг ки, бу брошүрү охумаға вахт ајыраҹагсыныз.
Инсанын нәјә инандығыны баша дүшмәк онун әгидәсинә шәрик олмағы билдирмир; ејнилә кимисә өз дини етигадынла таныш етмәк ону бу динә дөндәрмәк демәк дејил. Бу брошүрүн васитәсилә, биз сизә вә ја сизин шаҝирдләринизә Јеһованын Шаһидләринин нөгтеји-нәзәрини гәбул етдирмәјә чалышмырыг. Биз сизи, садәҹә олараг Шаһидләрин өз ушагларына ашыладыглары принсип вә етигадларла таныш етмәк истәјирик ки, бу, һәмин шаҝирдләри баша дүшмәјинизә вә онларла ишләмәјинизә көмәк етсин. Әлбәттә, ушаглара вердијимиз тәрбијә онларын давранышында һәмишә өз әксини тапмыр, белә ки һәр бир ушаг виҹданыны өзү өјрәтмәлидир.
Һәр бир валидејн кими Јеһованын Шаһидләри дә истәјирләр ки, онларын өвладлары мәктәбдә алдыглары тәлимдән чох шеј ҝөтүрсүнләр. Буна ҝөрә дә онлар өз ушагларына мүәллимләрә һөрмәт ҝөстәрмәји вә онларла әмәкдашлыг етмәји өјрәдирләр. Өз нөвбәсиндә, мүәллимләр Јеһованын Шаһидләрини вә онларын ушагларыны баша дүшәндә, онлара һөрмәтлә јанашанда Јеһованын Шаһидләри буну јүксәк гијмәтләндирирләр.
Јеһованын Шаһидләри бүтүн дүнјада мәсиһи кими танынырлар. Бунунла белә, бәзән онлары там баша дүшмүрләр. Биз үмид едирик ки, бу брошүр Јеһованын Шаһидләринин ушагларыны даһа јахшы баша дүшмәкдә мүәллимләрә көмәк едәҹәк. Хүсусилә дә үмид едирик ки, бәзи һалларда бу ушагларын башгаларындан фәргли һәрәкәт етмәк һүгугларыны анламагда бу нәшрин сизә көмәји дәјәҹәк.