Јеһованын Шаһидләринин тәһсилә мүнасибәти
Бүтүн валидејнләр кими, Јеһованын Шаһидләрини дә ушагларынын ҝәләҹәји марагландырыр. Бу сәбәбдән онлар тәһсилә бөјүк әһәмијјәт верирләр. «Тәһсил инсана ҹәмијјәтин јарарлы үзвү олмаға көмәк едир. Савадлы инсан өз мәдәни ирсини гијмәтләндирмәји вә даһа долғун һәјат сүрмәји өјрәнир».
БИР енсиклопедијадан ҝөтүрүлмүш бу ситат ҝөстәрир ки, мәктәбдә верилән тәлимин ән үмдә мәгсәдләриндән бири ушаглары ҝүндәлик һәјата, о ҹүмләдән ҝәләҹәк аиләсинин гајғысына галмаға һазырламагдыр («The World Book Encyclopedia»). Јеһованын Шаһидләри үчүн аиләнин гејдинә галмаг мүгәддәс вәзифәдир. Мүгәддәс Китабда дејилир: «Әҝәр кимсә өз јахынларынын, әләлхүсус да аиләсинин гејдинә галмырса, о, иманы инкар едиб вә имансыздан да бетәрдир» (1 Тимутијә 5:8). Мәктәб илләриндә ушаг һәјатда ону ҝөзләјән вәзифәләрә һазырлашыр. Буна ҝөрә дә Јеһованын Шаһидләри һесаб едирләр ки, тәһсилә чох ҹидди јанашмаг лазымдыр.
«Тәһсил инсана ҹәмијјәтин јарарлы үзвү олмаға көмәк едир. Савадлы инсан өз мәдәни ирсини гијмәтләндирмәји вә даһа долғун һәјат сүрмәји өјрәнир» («The World Book Encyclopedia»)
Јеһованын Шаһидләри Мүгәддәс Китабын: «Һәр нә едирсинизсә, ҹанла-башла един, санки инсанлар үчүн јох, Јеһова үчүн едирсиниз» — ҝөстәришинә мүвафиг јашамаға чалышырлар (Колослулара 3:23). Бу принсип мәктәб дә дахил олмагла, һәјатын бүтүн саһәләринә аиддир. Буна ҝөрә дә Јеһованын Шаһидләри өз ушагларыны чалышган олмаға вә дәрсләринә ҹидди јанашмаға тәшвиг едирләр.
«Һәр нә едирсинизсә, ҹанла-башла един, санки инсанлар үчүн јох, Јеһова үчүн едирсиниз» (Колослулара 3:23)
Мүгәддәс Китаб һәмчинин јашадығымыз өлкәнин ганунларына табе олмағы өјрәдир. Әҝәр орта тәһсил алмаг мүәјјән јаш һәддинә гәдәр иҹбаридирсә, Јеһованын Шаһидләри бу гануна риајәт едирләр (Ромалылара 13:1—7).
Фајдалы истираһәт, мусиги, һобби, бәдән тәрбијәси, китабханаларда гираәт, музејләрә сәјаһәт вә саирә дүзҝүн тәлимдә бөјүк рол ојнајыр
Ушағы һәјата һазырламағын зәрурилијини вурғуламагла јанашы, Мүгәддәс Китаб ҝөстәрир ки, тәһсилин јеҝанә вә башлыҹа мәгсәди бундан ибарәт дејил. Јахшы тәһсил сајәсиндә ушагда һәјата никбин бахыш инкишаф едәҹәк вә о, ҹәмијјәтин јарарлы үзвү олаҹаг. Буна ҝөрә дә Јеһованын Шаһидләри синифдәнхариҹ тәдбирләрин сечиминә чох ҹидди јанашырлар. Онлар әминдирләр ки, фајдалы истираһәт, мусиги, һобби, бәдән тәрбијәси, китабханаларда гираәт, музејләрә сәјаһәт вә саирә дүзҝүн тәлимдә бөјүк рол ојнајыр. Бундан әлавә, Јеһованын Шаһидләри ушаға јашлылара еһтирам вә көмәк ҝөстәрмәк кими ҝөзәл кејфијјәтләр ашылајырлар.
Әлавә тәһсил һаггында нә демәк олар?
Јени технолоҝијаларын тәтбиги сајәсиндә әмәк биржасы даима јениләшир. Бу, о демәкдир ки, бир чох ҝәнҹ хүсуси һазырлығы олмадығы истеһсалат саһәсиндә чалышмалы олаҹаг. Бу заман онлара әмәксевәрлик, тәҹрүбә, хүсусилә дә јени мүһитә ујғунлашмаг баҹарығы ҝәрәкли олаҹаг. Буна ҝөрә дә шаҝирдләрә, Интибаһ дөврүнүн јазычысы Монтен демишкән, «чох билән јох, јахшы дүшүнән баш» лазымдыр.
Ишсизлик, истәр варлы, истәр касыб өлкәләрдә, әксәр һалларда ихтисасы олмајан ҝәнҹләрә тәсир едир. Бу сәбәбдән, иш тапмаг үчүн мәктәб тәһсилиндән савајы, әлавә тәһсил тәләб олунарса, валидејнләр бу тәһсилин мүсбәт вә мәнфи ҹәһәтләрини ҝөтүр-гој едәрәк, әлавә тәһсилин лазым олуб-олмадығыны ушаглары илә бирликдә гәрарлашдыраҹаглар.
Јәгин разылашарсыныз ки, һәјатын мәгсәди вар-дөвләт топламагдан ибарәт дејил. Бәзән һәјатларыны јалныз карјера гурмаға һәср етмиш адамлар ишләрини итирәндә, һәјатларынын мәнасыны да итирирләр. Бәзи валидејнләрин башы ишә елә гарышыр ки, онлар өвладларынын неҹә бөјүдүјүнү ҝөрә билмир, өз аиләләринә вә ушагларынын тәрбијәсинә ајыра биләҹәкләри вахты ишә гурбан верирләр.
Әлавә вә ја али тәһсил һаггында дүшүнәркән нәзәрә алмаг лазымдыр ки, инсанын хошбәхтлији јалныз мадди сәрвәтдән асылы дејил. Иса Мәсиһ демишди: «Јазылыб: “Инсан јалныз чөрәклә јашамамалыдыр, Јеһованын ағзындан чыхан һәр бир кәлмә илә јашамалыдыр”» (Мәтта 4:4). Буна ҝөрә дә Јеһованын Шаһидләри мадди тәләбатларынын гејдинә галмагдан савајы, өзләриндә әхлаги вә мәнәви кејфијјәтләр јетишдирмәјин дә ваҹиблијини дәрк едирләр.