Фәсил 1
Бизим зәманәдә ибадәтдә бирлик нә демәкдир?
1, 2. а) Бу ҝүн милјонларла инсанда һансы истәк ојаныр? б) Сафүрәкли инсанларын һансы ҝөзәл үмиди вар?
БУ ҜҮН Аллаһа бирликдә ибадәт етмәк истәјән инсанларын сајы ҝет-ҝедә артыр. Бу истәк мүхтәлиф халглардан, гәбиләләрдән вә дилләрдән олан милјонларла инсаны бирләшдирир. Һәр ил онларын сырасына јениләри гошулур. Мүгәддәс Китабдан бу адамларын Јеһованын ‘шаһидләри’ вә ‘бөјүк издиһам’ олдуғу мәлум олур. Бу шаһидләр «ҝеҹә-ҝүндүз» Аллаһа мүгәддәс хидмәти иҹра едирләр (Јешаја 43:10-12; Вәһј 7:9-15). Нә үчүн? Онлар ваһид һәгиги Аллаһ Јеһова илә таныш олублар. Бу танышлыг онлары Аллаһын салеһлик нормаларына мүвафиг һәјат сүрмәјә тәшвиг едир. Һәмчинин онлар бу пис дүнјанын ‘ахыр ҝүнләриндә’ јашадыгларыны вә Аллаһын ону тезликлә мәһв едиб јени дүнја илә әвәз едәҹәјини өјрәнибләр. Орада инсанлар ҹәннәт шәраитиндә өмүр сүрәҹәкләр (2 Тимотејә 3:1-5, 13; 2 Петер 3:10-13).
2 Аллаһын Кәламында вәд едилир: «Бир аз ҝөзлә вә пис јох олаҹагдыр... Фәгәт һәлимләр дүнјаны мирас алаҹаглар вә сүлһ боллуғунда ләззәт тапаҹаглар» (Мәзмур 37:10, 11, КМ). «Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:29). «Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 21:4).
3. Аллаһын хидмәтчиләри ибадәтдә һәгиги бирлијә неҹә наил олурлар?
3 Јени дүнјанын илк сакинләри бизим ҝүнләрдә һәгиги Аллаһа бирликдә ибадәт едәнләр олаҹаг. Онлар Аллаһын ирадәсини өјрәнир вә вар гүввәләри илә ону иҹра етмәк истәјирләр. Иса бунун ваҹиблијини белә вурғуламышды: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3). Һәвари Јәһја јазмышды: «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:17).
Һәгиги бирлик нә демәкдир?
4. а) Бизим ҝүнләрдә бу гәдәр инсанын ибадәтдә бирләшмәси нәји билдирир? б) Мүгәддәс Китабда инсан јығымы неҹә тәсвир едилир?
4 Бизим ҝүнләрдә бу гәдәр инсанын ибадәтдә бирләшмәси әслиндә нәји билдирир? Бу, јашадығымыз пис дүнјанын тезликлә мәһв олаҹағыны вә бундан дәрһал сонра Аллаһын јени дүнјасынын ҝәләҹәјини сүбут едир. Биз инсан јығымындан бәһс едән Мүгәддәс Китаб пејғәмбәрликләринин јеринә јетдијинин ҹанлы шаһидијик. Белә пејғәмбәрликләрдән бириндә дејилир: «Сон ҝүнләрдә Рәббин еви олан дағ [јүксәлдилмиш һәгиги ибадәт] дағларын зирвәсиндә [диҝәр ибадәт формаларындан јүксәкдә] мөһкәм дураҹаг... Чох милләтләр ҝәлиб дејәҹәк: “Ҝәлин Рәббин дағына, Јагубун Аллаһынын евинә галхаг, гој Рәбб бизә Өз јолуну өјрәтсин, биз Онун јолу илә ҝедәк”» (Микеја 4:1, 2; Мәзмур 37:34).
5, 6. а) Халглар һансы мәнада Јеһованын јанына ахышырлар? б) Өзүмүзә һансы суаллары вермәлијик?
5 Дүздүр, Јеһованын руһани мәбәдиндә бүтөв халглар ибадәт етмир. Лакин бу ибадәти һәр бир халгын нүмајәндәси дахил олмагла милјонларла инсан иҹра едир. Јеһова Аллаһын севҝи долу нијјәти вә Онун ҹәлбедиҹи шәхсијјәти барәсиндә өјрәндикләри онларын үрәкләриндә дәрин из бурахыр. Бу адамлар тәвазөкарлыгла Аллаһын тәләбләрини өјрәнмәјә ҹан атырлар. Онлар мәзмурчунун дуасына шәрикдирләр: «Мәнә Сәнин ирадәнә әмәл етмәји өјрәт, чүнки мәним Аллаһым Сәнсән» (Мәзмур 143:10).
6 Өзүнү бизим ҝүнләрдә Јеһованын һәгиги ибадәтдә бирләшдирдији бөјүк издиһамын арасында ҝөрүрсәнми? Онун Кәламындакы рәһбәрлијә неҹә һај вермәјин, бу рәһбәрлијин Мәнбәјинин Јеһова олдуғуну һәгигәтән баша дүшдүјүнү ҝөстәрирми? Јеһова Аллаһын ‘јолу илә ҝетмәкдә’ нә дәрәҹәдә гәтијјәтлисән?
Ибадәтдә бирлијә неҹә наил олунур?
7. а) Ибадәтдә бирлик ҝәләҹәкдә һансы мигјаса чатаҹаг? б) Јеһоваја ибадәт етмәјә нә үчүн јубанмадан башламаг лазымдыр вә биз башгаларына бу ишдә неҹә көмәк едә биләрик?
7 Јеһова шүурлу варлыгларын һамысыны һәгиги ибадәтдә бирләшдирмәк истәјир. Бүтүн ҹанлыларын ваһид һәгиги Аллаһа ибадәт едәҹәји ҝүнү неҹә дә сәбирсизликлә ҝөзләјирик! (Мәзмур 103:19-22). Лакин бу баш вермәздән әввәл Јеһова Онун салеһ ирадәсини иҹра етмәкдән имтина едәнләри јер үзүндән силәҹәк. Мәрһәмәтдән ирәли ҝәләрәк, О Өз нијјәтләрини әввәлҹәдән билдирир ки, дүнјанын һәр јериндә јашајан инсанлар һәјат тәрзләрини дәјишә билсинләр (Јешаја 55:6, 7). Она ҝөрә дә бизим ҝүнләрдә «һәр милләтә, һәр гәбиләјә, һәр дилә вә һәр халга» тәкидлә чағырыш едилир: «Аллаһдан горхун! Она иззәт верин! Чүнки Онун һөкмүнүн вахты ҝәлди. Ҝөјү, јери, дәнизи вә су булагларыны Јарадана сәҹдә един!» (Вәһј 14:6, 7). Сән бу дәвәтә һај вермисән? Белә олан һалда, сән дә башгаларыны ваһид һәгиги Аллаһы танымаға вә Она ибадәт етмәјә дәвәт едә биләрсән.
8. Мүгәддәс Китабын әсас тәлимләрини өјрәндикдән сонра сәмими гәлбдән нәјә ҹан атмалыјыг?
8 Јеһова инсанларын Она дилдә иман едиб әмәлдә исә өз мәгсәдләрини ҝүдәрәк хидмәт етмәләрини истәмир. О истәјир ки, инсанлар Онун «ирадәсини бүтүнлүклә» гаврасынлар вә бу, онларын һәјатында әкс олунсун (Колослулара 1:9, 10). Буна ҝөрә дә, Мүгәддәс Китабын әсас тәлимләрини өјрәниб, гијмәтләндирән адамлар мәсиһчи јеткинлијинә доғру тәрәгги едирләр. Онлар Јеһованы даһа јахындан танымаға, Аллаһын Кәламыны дәриндән дәрк етмәјә вә һәјатларында там тәтбиг етмәјә ҹан атырлар. Һәмин адамлар сәмави Атамызын хүсусијјәтләрини әкс етдирмәјә вә һәр шејә Онун ҝөзү илә бахмаға чалышырлар. Бу онлары Јеһованын бүтүн јер үзүндә апардығы хиласедиҹи ишдә сәјлә иштирак етмәјә тәшвиг едир. Бәс сәнин белә истәјин вармы? (Марк 13:10; Ибраниләрә 5:12–6:3).
9. Артыг индидән һәгиги бирлијә неҹә наил олмаг мүмкүндүр?
9 Мүгәддәс Китабдан ҝөрүнүр ки, Јеһоваја хидмәт едәнләр бир халг кими бирләшмәлидирләр (Ефеслиләрә 4:1-3). Бу бирлик, парчаланмыш дүнјада јашамағымыза вә гејри-камиллијимизлә мүбаризә апармағымыза бахмајараг, артыг индидән мөвҹуд олмалыдыр. Иса Мәсиһ бүтүн шаҝирдләринин ‘бир олмасы’, јәни һәгиги бирликдә олмалары үчүн үрәкдән дуа едирди. О нәји нәзәрдә тутурду? Илк нөвбәдә онларын Јеһова Аллаһ вә Онун Оғлу илә јахшы мүнасибәтдә олмаларыны. Икинҹиси өз араларында бирлији горумаларыны (Јәһја 17:20, 21). Мәсиһчи јығынҹағы бу ҹүр бирлијә наил олмаға көмәк едир. Јеһова Өз халгына мәһз јығынҹаг васитәсилә тәлим верир.
Бирлијә көмәк едән амилләр
10. а) Бизи нараһат едән суалларын ҹавабыны өзүмүз Мүгәддәс Китабдан ахтаранда һансы хүсусијјәтләри инкишаф етдиририк? б) Бу абзасда ҝәтирилмиш суалларын васитәсилә мәсиһчи бирлијинә көмәк едән амилләрин үзәриндә дүшүнүн.
10 Ашағыда бирлијә көмәк едән једди әсас амил садаланыр. Бурадакы суаллара ҹаваб верәркән һәр бәнддәки фикрин Јеһова вә һәмиманлыларынла мүнасибәтинә неҹә тәсир ҝөстәрдији барәдә дүшүн. Бу бәндләрин вә мөтәризәдәки ајәләрин үзәриндә дүшүнмәк, һамымыза лазым олан илаһи һикмәти, идракы вә дәрракәни инкишаф етдирмәјә көмәк едәҹәк (Сүлејманын мәсәлләри 5:1, 2; Филипилиләрә 1:9-11). Ҝәл бу амилләри бир-бир арашдыраг.
1) Јахшыны вә писи тәјин етмәк һүгугунун Јеһоваја мәхсус олдуғуну дәрк едирик. «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр» (Сүлејманын мәсәлләри 3:5, 6).
Гәрар гәбул едәркән нә үчүн Јеһованын мәсләһәтини вә рәһбәрлијини ахтармаг лазымдыр? (Мәзмур 146:3-5; Јешаја 48:17).
2) Биз Аллаһын Кәламыны әлдә рәһбәр тутуруг. «Сиз Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз; сиз иманлылара тәсир едән дә һәмин кәламдыр» (1 Салониклиләрә 2:13).
Гәрар гәбул едәркән үрәјин сәсинә гулаг асмаг нә үчүн тәһлүкәлидир? (Сүлејманын мәсәлләри 14:12; Јеремја 10:23, 24; 17:9).
Мүгәддәс Китабын бу вә ја диҝәр мәсәләјә даир һансы мәсләһәт вердијини билмәјәндә нә етмәлијик? (Сүлејманын мәсәлләри 2:3-5; 2 Тимотејә 3:16, 17).
3) Һамымыз ејни руһани гида програмы илә гидаланырыг. «Бүтүн өвладларыны Мән Рәбб өјрәдәҹәјәм» (Јешаја 54:13). «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бәзиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн [мәһв ҝүнүнүн] јахынлашдығыны ҝөрдүјүмүз нисбәтдә бир-биримизи даһа чох үрәкләндирәк» (Ибраниләрә 10:24, 25).
Руһани ҹәһәтдән гидаланмағымыз үчүн Јеһованын тәшкил етдији бүтүн тәдбирләрдән там гидалананлар һансы хејир-дуалары алырлар? (Јешаја 65:13, 14).
4) Башчымыз инсан јох, Иса Мәсиһдир. «Өзүнүзә “Рабби” дедиртмәјин; чүнки сизин Мүәллиминиз бирдир, о да Мәсиһдир, вә сиз һамыныз гардашсыныз. Јер үзүндә кимсәјә ата демәјин; чүнки Атаныз бирдир, сәмави Атадыр. Нә дә насеһ дедиртмәјин; чүнки Насеһиниз бирдир — Мәсиһдир» (Матта 23:8-10).
Мәсиһчиләрдән кимсә өзүнүн башгаларындан үстүн олдуғуну дүшүнмәлидирми? (Ромалылара 3:23, 24; 12:3).
5) Биз әминик ки, бәшәријјәтин јеҝанә үмиди Аллаһын Падшаһлығыдыр. «Буна ҝөрә сиз белә дуа един: “Еј ҝөјләрдә олан Атамыз, адын мүгәддәс тутулсун. Сәлтәнәтин ҝәлсин. Ҝөјдә олдуғу кими, Јердә дә Сәнин ирадән олсун”». «Лакин әввәлҹә Аллаһын Сәлтәнәтини вә Онун салеһлијини ахтарын» (Матта 6:9, 10, 33).
‘Әввәлҹә Аллаһын Сәлтәнәтини ахтармаг’ бирлији горумаға неҹә көмәк едир? (Микеја 4:3; 1 Јәһја 3:10-12).
6) Мүгәддәс руһ Јеһованын хидмәтчиләриндә мәсиһчи бирлији үчүн зәрури кејфијјәтләр јетишдирир. «Руһун сәмәрәси исә будур: мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» (Галатијалылара 5:22, 23).
Аллаһын руһунун биздә өз сәмәрәсини јетишдирмәси үчүн нә етмәлијик? (Һәвариләрин ишләри 5:32).
Аллаһын руһу һәмиманлыларымызла мүнасибәтимизә неҹә тәсир ҝөстәрир? (Јәһја 13:35; 1 Јәһја 4:8, 20, 21).
7) Аллаһа һәгигәтән ибадәт едәнләрин һамысы Падшаһлыг һаггында хош хәбәри тәблиғ едирләр. «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Матта 24:14).
Тәблиғ ишиндә там сурәтдә иштирак етмәјә бизи нә тәшвиг етмәлидир? (Матта 22:37-39; Ромалылара 10:10).
11. Мүгәддәс Китаб һәгигәтләрини һәјатда тәтбиг етмәјимиз һансы бәһрәләри ҝәтирир?
11 Јеһоваја бирликдә ибадәт етмәк бизи Она јахынлашдырыр вә һәмиманлыларымызла арамызда тәравәтләндириҹи үнсијјәт јарадыр. Мәзмур 133:1 ајәсиндә дејилир: «Нә јахшыдыр, нә хошдур гардаш олуб, бир јашамаг!» Дүнјанын худбинлијиндән, әхлагсызлығындан вә зоракылығындан узаглашыб, Јеһованы һәгиги мәнада севән вә Онун ганунларына табе олан инсанларла бирликдә топлашмаг неҹә дә хошдур!
Өзүнүзү парчалајыҹы тәсирләрдән горујун
12. Нәјә ҝөрә өзүмүзү мүстәгиллик руһундан ҝөзләмәлијик?
12 Бизә чох әзиз олан үмумдүнја бирлијимизи горујуб сахламаг үчүн парчалајыҹы тәсирләрдән узаг олмалыјыг. Бу тәсирләрдән бири Аллаһдан вә Онун ганунларындан мүстәгил јашамаг руһудур. Јеһова бу руһун мәнбәјинин Шејтан Иблис олдуғуну ачыгламагла она гаршы дурмағымыза көмәк едир (2 Коринфлиләрә 4:4; Вәһј 12:9). Мәһз Шејтанын тәһрики илә Адәмлә Һәвва Аллаһын әмрини гулаг ардына вуруб Онун ирадәсинә зидд аддым атдылар. Бунунла онлар һәм өзләрини, һәм дә бизи бөјүк фәлакәтә дүчар етдиләр (Јарадылыш 3:1-6, 17-19). Бу дүнјада Аллаһдан вә Онун ганунларындан мүстәгил јашамаг руһу һөкм сүрүр. Буна ҝөрә дә, бу руһу дахилимиздә боғмалыјыг.
13. Салеһлијин һөкм сүрәҹәји Аллаһын јени дүнјасында јашамаг үчүн үрәкдән һазырлашмағымыз нәдән ҝөрүнмәлидир?
13 Ҝәлин Јеһованын индики пис дүнјаны ‘салеһлијин өмүр сүрәҹәји’ јени ҝөјләр вә јени јерлә әвәз едәҹәјинә даир вердији севиндириҹи вәдин үзәриндә дүшүнәк (2 Петер 3:13). Мәҝәр бу бизи салеһлијин һөкм сүрәҹәји дөврдә јашамаг үчүн индидән һазырлашмаға тәшвиг етмәмәлидир? Әҝәр беләдирсә, Мүгәддәс Китабын ајдын мәсләһәтинә — «дүнјаны вә дүнјада олан шејләри севмәјин. Ким дүнјаны севәрсә, онда Атанын мәһәббәти јохдур» мәсләһәтинә гулаг асаҹағыг (1 Јәһја 2:15). Буна ҝөрә дә, өзүмүзү бу дүнјанын сәрбәстлик, худбинлик, әхлагсызлыг вә зоракылыг руһундан горујуруг. Гејри-камил тәбиәтимизин мүгавимәтинә бахмајараг, Јеһоваја гулаг асмағы вә Она үрәкдән итаәткар олмағы өзүмүзә вәрдиш едирик. Дүшүнҹә тәрзимизи вә нијјәтләримизи Јеһованын ирадәсини иҹра етмәјә јөнәлтдијимизи бүтүн һәјатымызла нүмајиш етдиририк (Мәзмур 40:8).
14. а) Әлимиздәки фүрсәтдән истифадә едәрәк, Јеһованын јолларыны өјрәнмәк вә өјрәндикләримизә мүвафиг јашамаг нәјә ҝөрә ваҹибдир? б) Абзасда ҝәтирилмиш ајәләр һәр биримизә неҹә аиддир?
14 Бу пис системи вә ону дәстәкләјәнләри мәһв етмәк вахты чатанда, Јеһова ҝөзләмәјәҹәк. Бу дүнјадан бәрк јапышыб, Аллаһын ирадәсини көнүлсүз өјрәнәнләрә вә она мүвафиг јашамаға һәвәси олмајанлара ҝөрә Јеһова Өз нормаларыны дәјишдирмәк вә ја о ҝүнү тәхирә салмаг нијјәтиндә дејил. Инди гәти аддымлар атмағын әсл вахтыдыр! (Лука 13:23, 24; 17:32; 21:34-36). Буна ҝөрә дә, бу имканы гијмәтләндирәрәк Јеһованын Өз Кәламы вә тәшкилаты васитәсилә вердији рәһбәрлији сәјлә ахтаран вә јени дүнјаја Онун ҝөстәрдији јол илә ҝедән бөјүк издиһамы ҝөрмәк неҹә дә хошдур! Јеһова һаггында даһа чох өјрәндикҹә, Она гаршы мәһәббәтимиз вә хидмәт етмәк истәјимиз бир о гәдәр артаҹаг.
Тәкрар үчүн суаллар
• Јеһованын ибадәтлә бағлы нијјәти нәдән ибарәтдир?
• Мүгәддәс Китабын әсас тәлимләрини өјрәндикдән сонра нәјә ҹан атмаг лазымдыр?
• Јеһованын диҝәр хидмәтчиләри илә олан бирлијимизи горујуб сахламаг үчүн һәр биримиз нә едә биләрик?
[4-ҹү сәһифәдәки шәкил]
‘Һәлимләр дүнјаны мирас алаҹаг вә сүлһ боллуғунда ләззәт тапаҹаглар’